Хэбзэ къулыкъухэм­рэ мэкъу-мэщым щылажьэхэрэмрэ зыхэлэжьэгъэхэ зэ­IукIэ АР-м и ЛIы­шъхьэ и Координационнэ гупчэ щы­кIуагъ. Бжыхьасэхэмрэ гъэтхасэхэм­рэ яIухыжьын зэ­рэ­фэхьазырхэм мыщ щытегущыIагъэх.

Адыгеим и ЛIышъхьэу КъумпIыл Мурат пшъэрылъ къызэрэфишIыгъэм тетэу АР-м иминистрэхэм я Кабинет и Тхьаматэ игуа­дзэу ЛIыхэсэ Махьмуд зэIукIэр зэрищагъ.
Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м мэкъу-мэщымкIэ иминистрэу Къуанэ Анзаур, УФ-м ошIэ-дэмышIэ IофхэмкIэ и Ми­нистерствэ АР-мкIэ и Гъэ­IорышIэпIэ шъхьаIэ, Адыгэ Республикэм хэ­гъэгу кIоцI IофхэмкIэ и Министерствэ и Къэра­лыгъо автоинспекцие, федеральнэ, республикэ уплъэкIокIо къулыкъухэм, чIыфэт организациехэм, муниципалитетхэм, агропромышленнэ комплексым ипредприятиехэм япащэхэр.
АР-м мэкъу-мэщымкIэ иминистрэу Къуанэ Ан­заур Адыгеим мы лъэныкъомкIэ иIофхэм язытет, лэжьыгъэм иIухыжьынкIэ пшъэрылъэу яIэхэм къатегущыIагъ. Ащ къызэри­IуагъэмкIэ, мыгъэ бжы­хьасэхэр гектар мини 107,1-м ехъумэ ащашIэ­гъагъ. Бжыхьэсэ коцым гектар мин 81-м ехъу, хьэм — гектар мини 7,9-рэ, рапсым — гектар мини 9,7-рэ, тритикалием — гектар мин 0,3-рэ зэлъаубытыгъ. Гектар мин 81,2-м ехъумэ ежь-ежьырэу къахьыжьыгъэ чылапхъэх ащагъэфедагъэр. ЛэжьэкIупIэхэм япроцент 45,6-мэ чылэпхъэшIухэр арагъэкIугъ.
Мэкъу-мэщым къэра­лыгъо IэпыIэгъу егъэгъотыгъэнымкIэ сомэ мил­лион 573,1-у къыхагъэ­кIыгъэм щыщэу процент 42-р къызфагъэфедэгъах. Гъэ­рекIо хъызмэтшIапIэ­хэм трактори 178-рэ комбайн 18-рэ къызIэкIа­гъэхьагъ.
ЗэIукIэм къызэрэщаIуа­гъэмкIэ, хыныгъом мыгъэ хагъэлэжьэщтхэр регистрацие ашIыгъэхэу тех­никэмкIэ изытет ауплъэ­кIугъэхэр ары. ШышъхьэIум и 20-м нахь мыгужъоу Iоныгъори, ащ къыкIэлъыкIорэ губгъо Iоф­шIэнхэри аухынхэу рахъухьэ.
Бжыхьасэхэр зэрэраутыгъэхэмкIэ мэкъумэщ мэ­хьанэ зиIэ чIыгухэм яхьылIэгъэ федеральнэ къэбарлъыгъэIэс системэ зыкIым игъом къэбархэр рагъэхьанхэ зэрэфаем чIыгулэжьхэм анаIэ ты­рарагъэдзагъ. IэкIыб къэралыгъохэм къащахьыжьырэ культурэхэм ячылэпхъэ­шIухэр зыщыхалъхьащт чIыпIэхэр гъэнэфэгъэнхэ, лэжьыгъэхэр страховать ашIын зэрэфаер зэIукIэм щыхагъэунэфыкIыгъ.
МЧС-м АР-мкIэ и Гъэ­IорышIэпIэ шъхьаIэ ипащэу Станислав Илющенкэм машIом мэкъумэщ псэуа­лъэхэм закъыщимыштэнымкIэ шIэгъэн фаехэр къафиIотагъ. Ащ къызэриIуагъэмкIэ, мы аужырэ илъэси 5-м машIом мэкъу-­мэщым гъогогъуи 178-рэ зыкъыщиштагъэу агъэунэфыгъ. Мэкъумэщ техникэм гъогогъуи 6-рэ къызэра­кIэнагъэм, фышъхьэ лэ­жьы­гъэхэм гъогогъу 11-рэ машIор къызэрягоуагъэм сомэ миллиони 8,2-рэ хъу­рэ чIэнагъэ аригъэ­шIыгъ. Хыпкъым лыгъэ радзы зэрэмыхъущтыр, мэшIогъэкIосэнымкIэ хъыз­мэтшIапIэхэм амалэу яIэхэр Iоныгъом зэрэфэ­хьазырхэр уплъэкIугъэнхэм мэхьанэшхо зэряIэр зэIукIэм къыщыхагъэщыгъ.
АР-м хэгъэгу кIоцI Iоф­хэмкIэ и Министерствэ и Къэралыгъо автоинспекцие ипащэ игуадзэу Дэч­лэжь Руслъан лэжьыгъэр зэращэ зыхъукIэ, гъогу-­патруль къулыкъухэм яIо­фышIэхэр зыдэщытыщтхэ чIыпIэхэм зэхъокIыныгъэу афэхъугъэхэр къафиIотагъ. 2023 — 2024-рэ илъэсхэм мэкъумэщ техникэр зыщыфыкъогъэ, тхьамыкIэгъуи 5 республикэм игъо­гухэм зэратехъухьагъэр, зы нэбгырэ ахэм зэрахэ­кIодагъэр ащ хигъэунэфыкIыгъ. УплъэкIунхэр зэрэзэхащэщтхэм нэмыкIэу, гъогухэр щынэгъончъэнхэмкIэ водительхэм зэра­дэгущыIэщтхэри ащ къы­Iуагъ.
АР-м иминистрэхэм я Кабинет и Тхьаматэ игуа­дзэу ЛIыхэсэ Махьмуд зэрэхигъэунэфыкIыгъэмкIэ, Iоныгъом епхыгъэ Iофыгъохэм Адыгеим и ЛIышъхьэ лъэшэу гъунэ алъефы.
«УплъэкIокIо къулыкъу­хэмрэ республикэм ичIыгулэжьхэмрэ техникэри, водительхэри хыныгъом зэрэфэхьазырхэр, гъэстыныпхъэ-щыфэ материалхэр афикъущтхэмэ икъоу ауплъэкIун фае. Тыдэрэ лъэгапIи хыныгъом хэла­жьэхэрэм — чIыгулэжьхэм IэпыIэгъу щарагъэгъотын фае. Анахь шъхьаIэр авариехэр къэмыгъэхъугъэнхэр, машIом зыкъемыгъэ­штэгъэныр, лэжьыгъэм чIэ­нагъэу фэхъущтыр амал зэриIэкIэ нахь макIэ шIыгъэныр ары», — къыIуагъ ЛIыхэсэ Махьмуд.
ЗэIукIэм икIэух АР-м мэкъу-мэщымкIэ иминист­рэ республикэм и АПК илъэныкъо заулэхэм къэралыгъо IэпыIэгъоу араты­хэрэм къатегущыIагъ. Къо­джэдэсхэм IофшIапIэ къа­фэгъотыгъэнымкIэ IэпыIэгъоу арагъэгъотырэм, мэ­къу-мэщым щылэжьэщтхэр зэрагъэхьазырхэ­рэм, чIыгу­хэр зэрагъэгъушъырэм, илъэсыбэрэ къэкIыхэрэм зэрадэлажьэхэрэм, автотехникэр фэгъэкIотэныгъэ зиIэ уасэкIэ зэраIэкIагъа­хьэрэм, унэгъо фермэхэм язегъэушъомбгъункIэ грант­хэр къазэраратырэм епхыгъэ Iофыгъохэм чIыгулэжьхэм анаIэ тырарагъэдзагъ.
АР-м и ЛIышъхьэ ипресс-къулыкъу