Урысые шIэныгъэ-практическэ конференциеу «Къэралыгъуабэхэр Урысыем къызыщыпэуцугъэ­хэ лъэхъаным лъэпкъ щы­нэгъончъагъэр гъэпы­тэгъэнымкIэ стратегическэ лъэныкъохэр гъэ­нэфэгъэнхэр» зыфиIорэр Мыекъопэ къэралыгъо технологическэ университетым щыкIуагъ.

Ащ хэлэжьагъэх тарихъ шIэныгъэхэмкIэ кандидатэу, доцентэу, Кемеровскэ къэралыгъо университетым ныбжьыкIэхэм граждан еплъыкIэ тэрэз яIэным­кIэ, лъэпкъ ыкIи дин зэпэуцужьхэм, терроризмэм ахэщагъэхэ мыхъунхэмкIэ и Координационнэ гупчэ ипащэу Вадим Шиллер, АР-м терроризмэм пэуцужьыгъэнымкIэ икомиссие и Аппарат ипащэу ЛIый Азэмат, Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет итхьаматэу Шъхьэлэхъо Аскэр, шIэныгъэлэжьхэр, хэбзэухъумэкIо къулы­къухэм, общественнэ ыкIи дин организациехэм, муниципальнэ образованиехэм ялIыкIохэр.
Iофтхьабзэм ипшъэрылъ шъхьа­Iэр Урысые Федерациер гумэкIыгъо лъэхъан зыщыхэтым лъэпкъ щынэгъончъагъэр гъэпы­тэгъэнымкIэ стратегическэ лъэ­ныкъохэм атегущыIэныр, екIо­лIакIэхэр къыхэхыгъэнхэр ары.
Мыекъопэ къэралыгъо технологическэ университетым иректорэу Къуижъ Саидэ шIуфэс гущыIэхэмкIэ Iофтхьабзэм хэлажьэхэрэм закъыфигъэзагъ. Тикъэралыгъо зыхэт гумэкIыгъо лъэхъаным ныбжьыкIэхэр къэбар нэпцIхэм ащыухъумэгъэнхэмкIэ непэрэ зэIукIэгъум мэхьанэшхо зэриIэр ащ къыIуагъ.
— Тиапшъэрэ еджапIэ къызэрэхэшъухыгъэр тигуапэ. Конференцием мы Iофыгъом фэ­гъэзэгъэ тишIэныгъэлэжьхэри хэлажьэх, ахэм аIэкIэлъ шIэныгъэхэмкIи къыжъудэгощэщтых, — хигъэунэфыкIыгъ Къуижъ Саидэ.
Тарихъ шIэныгъэхэмкIэ кандидатэу Вадим Шеллер илъэс 30 хъугъэу ныбжьыкIэхэм адэлажьэ, социальнэ хъытыухэм къащекIокIырэ къэбар нэпцIхэм ахэщагъэхэ мыхъунхэм фэIорышIэщт шIыкIэхэр къегъотых.

— ХэушъхьафыкIыгъэ дзэ операциер зыщыкIорэ лъэхъаным тикъэралыгъо ыпашъхьэ къиуцорэ щынагъохэр щыгъэзыегъэнхэмкIэ, геополитическэ пыеу тиIэхэм ныбжьыкIэхэр агъэдэIонхэмкIэ шIыкIэу агъэфедэхэрэр къыхэгъэщыгъэнхэмкIэ амалэу тиIэхэр афэдгъэIорышIэнхэ фае. Джырэ технологиехэр къызфагъэфедэзэ къэбар нэпцIхэр зыгъэIухэрэм ныбжьыкIэхэр ямыдэIунхэу, экстремизмэр, терроризмэр зыщыщхэр ядгъэшIэнхэу щыт. Джащ фэдэ Iофыгъо шъхьаIэхэм адэлэжьэрэ, хэшIыкI куу афызиIэ цIыфхэр непэрэ Iофтхьабзэм зэрэхэлажьэхэрэр сигуапэ, сэри IэпэIэсэныгъэу сIэкIэлъымкIэ садэгощэщт. ПэшIорыгъэшъ ыкIи общественнэ IофшIэным фэгъэ­хьыгъэ методическэ тхыгъэу сиIэхэр къэзгъэлъэгъощтых, — къыхигъэщыгъ Вадим Шеллер.
Нэужым Кемеровскэ уни­верситетым и Координационнэ гупчэ ипащэ «Актуальные тренды деструктивных проявлений в среде учащейся молодежи» зыфиIорэ доклад гъэшIэгъон къышIыгъ.
ЫпшъэкIэ зигугъу къэтшIыгъэ Комитетым итхьаматэу Шъхьэлэхъо Аскэр къызэриIуагъэмкIэ, мыщ фэдэ Iофтхьабзэхэр апэрэп республикэм зэрэщызэхащэхэрэр.
— Хэгъэгум къыщыхъурэ гумэкIыгъохэм ялъэхъан зэщы­хъокIо кIуачIэхэм ныбжьыкIэхэр амыгъэплъэхъунхэм, дин ыкIи лъэпкъ зэгурымыIоныгъэхэм ахэ­­щагъэ мыхъунхэм япхыгъэ Iофтхьабзэхэр зэпымыоу зэхэт­щэнхэм мэхьанэ яI. Мы апшъэ­рэ еджапIэм къэралыгъо зэфэшъхьафхэм къарыкIыгъэ студентхэр зэрэщеджэхэрэр къы­дэт­лъыти зэIукIэгъур щыред­гъэ­кIо­кIынэу къыхэтхыгъ, — хи­гъэу­нэфыкIыгъ Шъхьэлэхъо Аскэр.
Iофыгъоу къаIэтыгъэм фэгъэ­хьыгъэу шIэныгъэлэжьхэр, хэ­бзэухъумакIохэр, динлэжьхэр кон­ференцием къыщыгущыIа­гъэх, кIэух зэфэхьысыжьхэр ашIыгъэх.
Iэшъынэ Сусан.