Украинэм хэгъэгу кIоцI IофхэмкIэ икъулыкъу­хэм, Донецкэ ыкIи Луганскэ народнэ респуб­ликэ­хэм, Запорожскэ, Херсон хэкухэм якъэралыгъо къулыкъухэм къаратыгъэ Iизын тхылъхэмкIэ аIыгъ Iашэр агъэфедэн зэралъэкIыщт шIыкIэмкIэ Росгвардием макъэ къегъэIу.

2023-рэ илъэсым мэкъуогъум и 13-м аштэгъэ Федеральнэ законэу N 207-р зытетэу «Iашэм игъэфедэнкIэ ыкIи ухъумэн Iо­фымкIэ правовой зэфыщытыкIэхэр гъэтэрэзыгъэнхэм, Урысые Федерацием ишъолъырхэм общественнэ щынэгъончъагъэм­рэ рэхьатыныгъэмрэ къащыу­хъумэгъэнхэмкIэ амалэу зэра­хьащтхэм яхьылIагъ» зыфиIорэм диштэу Урысые Федерацием игражданхэу Донецкэ ыкIи Луганскэ народнэ республикэхэм, Запорожскэ, Херсон хэкухэм ренэу ащыпсэухэрэм е ащы­псэугъэхэм, Урысыем ихэбзэгъэуцугъэ диштэу регистрацие амышIыгъэ Iашэ зиIэхэм:
— яIашэ учет шIыгъэнымкIэ лъэIу тхылъыр аIыгъэу Росгвардием ичIыпIэ къулыкъу 2024-рэ илъэсым мэкъуогъум и 13-м нэс зыфагъэзэн фае. Учет зэрагъэуцухэрэм пае Iизын тхылъхэр зэблахъунхэу ищыкIагъэп.
— Украинэм, ДНР-м, ЛНР-м яуполномоченнэ къулыкъухэм къаратыгъэ Iизын тхылъхэмкIэ Iашэр аIыгъын, агъэфедэн алъэ­кIыщт 2026-рэ илъэсым щылэ мазэм и 1-м нэс.
— Украинэм, ДНР-м, ЛНР-м яуполномоченнэ къулыкъухэм къаратыгъэ Iизын тхылъхэр къызфагъэфедэхэзэ, 1996-рэ илъэсым тыгъэгъазэм и 13-м аштэгъэ Федеральнэ законэу
N 150-р зытетэу «Iашэхэм яхьы­лIагъ» зыфиIорэм щыгъэнэфагъэм нахьи нахьыбэу цIыфхэм Iашэ 2024-рэ илъэсым бэдзэогъум и 1-м нэс аIыгъын алъэ­кIыщт. Ащ ыуж коллекциехэм яугъоинкIэ лицензие зиIэ за­къохэр ары Iэшэ пчъагъэ зыIыгъын зылъэкIыщтхэр.
— Урысые Федерацием игражданхэу автоматическэ Iа­шэ зиIэхэм, Украинэм, ДНР-м, ЛНР-м яуполномоченнэ къулыкъухэм къаратыгъэ Iизын тхылъхэмкIэ Iашэхэр зезыхьэхэрэм, зыIыгъхэм 2024-рэ илъэсым мэкъуогъум и 13-м нахь мыгужъоу Урысыем хэгъэгу кIоцI IофхэмкIэ и Министерствэ ахэр ратыжьынхэ, е Iашэ къыдэзыгъэкIырэ юридическэ лицэм рахьылIэнхэ, е гражданскэ Iашэ ахэм ахашIыкIыжьыным пае къэралыгъо дзэ организацием IэкIагъэхьанхэ фае.
— Украинэм, ДНР-м, ЛНР-м якъулыкъухэм ялицензиехэмкIэ (яIизын тхылъхэмкIэ) Iашэ къыз­IэкIагъэхьан фитхэп.
— Зыщыпсэухэрэ чIыпIэр за­хъожькIэ, мазэм къыкIоцI Iизын тхылъхэр зэблахъун алъэ­кIыщт.
— ЗиIашэ Урысые Федерацием регистрацие щязыгъэшIы­хэрэм фитыныгъэ яIэщт Iашэм ралъхьащт патронхэр Урысые Федерацием ишъолъырыкIэхэм къащащэфынхэу.
— Украинэм, ДНР-м, ЛНР-м якъулыкъухэм къаратыгъэ Iизын тхылъхэр яIэубытыпIэу цIыфхэм Iашэр зэрагъэфедэгъэ илъэс пчъагъэр къызыдалъытэрэр шэ­кIо Iашэ яIэнымкIэ лицензие къараты зыхъукIэ ары.
— Урысые Федерацием ихэ­бзэгъэуцугъэу Iашэм ехьылIагъэм диштэу Iашэр аIыгъы, зэ­рахьэ, агъэфедэ ыкIи ащэ.
— Украинэм, ДНР-м, ЛНР-м якъулыкъухэм яIизын тхылъхэм ачIыпIэ Iашэ зэрахьанымкIэ Росгвардием Iизын тхылъхэр заритырэр гражданскэ, къулыкъу Iашэмрэ патронхэмрэ я Къэралыгъо кадастрэ е сертификатхэм я Реестрэ зыкI ащ фэдэ Iашэм ехьылIэгъэ къэбархэр итхэ зыхъукIэ ары.