КIэлэцIыкIухэмрэ ныбжьыкIэхэмрэ я Дунэе фестиваль-зэнэкъокъоу «Адыгеим ижъогъо­жъыехэр» зыфиIорэр мы мафэхэм Мыекъуапэ щы­кIуагъ.

Мыгъэ ар я 15-у зэхащагъ. Iофтхьабзэр Лениным ыцIэ зыхьырэ гупчэм щызэхащагъ. АР-м культурэмкIэ и Министерствэрэ Лъэпкъ культурэм и Гупчэмрэ ащ кIэщакIо фэхъугъэх. Федеральнэ лъэпкъ проектэу «Культурэм» къыдыхэ­лъытагъэу рагъэкIокIыгъ.
КIэлэцIыкIу фестивалым ипшъэ­рылъ шъхьаIэр искусствэм хэхъоныгъэхэр ышIынхэм, сэнаущыгъэ зыхэлъ ныбжьыкIэхэр къыхэгъэщыгъэнхэм Iоф адэ­шIэгъэныр ары. КIэлэцIыкIумэ афытегъэпсыхьэгъэ къэгъэлъэгъонхэр нахьыбэу зэхащэнхэр фестивалым къыдыхэлъытагъ. Ащ ишIуагъэкIэ кIэлэцIыкIу сэнаущхэм культурэмрэ искусст­вэмрэ алъэныкъокIэ гъэхъагъэу щыIэхэм нэIуасэ зафашIын амал яIэщт.
АР-м культурэмкIэ и Минис­терствэ ыцIэкIэ Iофтхьабзэм къеблэгъагъэхэм шIуфэс гущы­IэхэмкIэ закъыфигъэзагъ Адыге­им культурэмкIэ иминистрэ игуа­дзэу Кушъу Светланэ.
— «Адыгеим ижъогъожъыехэр» зыфиIорэ фестивалыр куль­турэмкIэ Iофтхьэбзэ анахь шъхьаIэмэ ащыщ хъугъэ. Ащ хэлэжьэрэ кIэлэцIыкIухэм яIэпэ­Iэсэныгъэ хагъахъо. Ар зихьаты­рыр зыгъасэхэу зыгъэхьазырхэ­рэр ары. Мыщ фэдэу дахэу Iоф­тхьабзэр зэрэзэхэщагъэмкIэ ахэм рэзэныгъэ гущыIэхэр афэз­гъазэ сшIоигъу. Мыгъэрэ Iофтхьабзэм Урысыем ишъо­лъыр 12-мэ къэралыгъуи 8-мэ ялIыкIохэр хэлэжьагъэх, тапэкIэ джыри ащ нахь зедгъэушъомбгъущт, — къыIуагъ Кушъу Светланэ.
ПстэумкIи фестивалым илъэ­си 6 — 22-рэ зыныбжь нэ­бгырэ 200-м нахьыбэ хэлэжьагъ. Ахэр республикэм ирайонхэм къарыкIыгъэ творческэ купых, къэшъуакIох ыкIи орэдыIох. Къэгъэ­лъэгъоныбэ ахэм къагъэхьа­зырыгъ. Зэнэкъокъур заочнэ шIы­кIэм тетэу рагъэкIокIыгъ, анахь дэгъухэр осэшIхэм къыхахыгъэх. Ары Iофтхьабзэр гъэ­шIэгъон къэзышIыгъэри. ЕплъыгъэхэмкIэ ар зы жьы къэщэгъоу кIуагъэ. Ахэм яIэгу­шъо тео макъэ зэпыугъэп. Фес­тивалым хэлэжьагъэхэм зэкIэм ар къэзыушыхьатырэ тхылъхэм­рэ шIухьафтынхэмрэ аратыгъэх.
— КъокIыпIэм щыпсэурэ лъэпкъхэм яискусствэкIэ Къэра­лыгъо музеим икъутамэу Мые­къуапэ щыIэм ипащэу, фестиваль-зэнэкъокъум иосэшI купым итхьаматэу ШъэуапцIэкъо Ами­нэт къыIуагъ:
— Илъэс 15 хъугъэу кIэлэцIы­кIухэм ыкIи ныбжьыкIэхэм сэнаущыгъэу ахэлъыр къызыщагъэлъэгъон алъэкIыщт фестивалыр зэхэтэщэ. Мыщ хэла­жьэ­хэрэм якъэгъэлъэгъонхэр гъэшIэгъоных. ОсэшI купым хэтхэм IофшIэнышхо зэшIуахыгъ, куп пэпчъ ифэшъуашэу хагъэунэфы­кIыгъ. Тихэгъэгу жъогъожъыякIэхэр къыщынэфыгъэх, джыри нахь лъэгэпIэ инхэм анэсынхэу афэтэIо.
Мы илъэсым дунэе фестивалым и Гран-при зыфагъэ­шъоша­гъэр Чэчэн Республикэм ­Лъэпкъ Iэмэ-псымэхэмкIэ икIэ­лэ­цIыкIу-ныбжьыкIэ оркестрэу «Хьал­къан мукъамаш» зыфи­Iорэр ары. Ан­самблэм ипащэр Чэчэным культурэмкIэ изаслуженнэ Iофы­шIэу Арсан Кусариевыр ары. КъэкIорэ илъэсым мы купым фестивалыр къызэ­Iуихыщт.
— Тэ Чэчэн Республикэм тыкъикIыгъ. Лъэпкъ Iэмэ-псы­мэхэм къядгъэIорэ мэкъамэу «Че­ченское поппури»зыфиIорэр къэтщагъ. Дунэе зэнэкъокъубэ­мэ текIоныгъэ къащыдэтхыгъ. «Адыгеим ижъогъожъыехэм» къыщыфагъэшъошэгъэ Гран-при цIэ лъапIэм тырыраз. МэзищкIэ узэкIэIэбэжьмэ «Урысыем иза­служеннэ куп» зыфиIорэ щытхъуцIэр къытфагъэшъошагъ, — къыIуагъ Арсан Кусариевым.
Аныбжь елъытыгъэу текIоныгъэ къыдэзыхыгъэхэр агъэнэфагъэх. Зэнэкъокъум илауреат хъугъэ нэбгырэ 56-рэ.
Iофтхьабзэм хэлэжьэгъэ хьа­кIэхэм Адыгэ Республикэм ичIыпIэ дахэхэр арагъэлъэгъугъэх, тилъэпкъ шэн-хабзэхэр, Адыгеим итарихъ къафаIотагъ, цIыф гъэшIэгъонхэм аIуагъэкIагъэх. Iофтхьабзэр хьакIэхэмкIи, бысымхэмкIи мэфэкI ин хъугъэ. Ащ лъыпыдзагъэу «Фестиваль Красок» зыфиIорэр рагъэжьагъ.
Лъэпшъыкъо Фатим.