«Премьера фотографии» зыфиIорэ къэгъэлъэгъон Мыекъуапэ къыщызэIуахыгъ.

АР-м культурэмкIэ и Министерствэ, Урысыем исурэттеххэм яорганизацие икъутамэу Адыгеим щыIэр, Мыекъуапэ икъэлэ сурэттех клубэу «Лэгъонакъэ», культурэм и Унэу «Гигантыр» Iоф­тхьабзэм кIэщакIо фэхъугъэх.
Зэхахьэм хэлэжьагъэх Адыгэ Республикэм культурэмкIэ иминистрэу Аулъэ Юрэ, ащ иотдел ипащэу Шэуджэн Бэлэ, Урысыем изаслуженнэ сурэтышIэу, АР-м исурэттеххэм я Союз ипащэу Аркадий Кирнос, АР-м изаслуженнэ сурэтышIэу, Адыгеим исурэт къэгъэлъэгъуапIэ ипащэу Бырсыр Абдулахь. Ащ нэмыкIэу зэхахьэм искусствэм, гъэсэныгъэм, пIуныгъэм яIофышIэхэр, кIэлэеджакIохэр хэлэжьагъэх.
— Культурэм хэхъоныгъэ ышlыныр къэралыгъом ипшъэрылъ шъхьаIэ­хэм ащыщ. Ащ къыдыхэлъытагъэу тиIофшIэн зэхэтэщэ. Урысыем и Мафэ ипэгъокIэу мыщ фэдэ къэгъэлъэгъон зэрагъэхьазырыгъэм мэхьа­нэшхо иI, — къы­Iуагъ Аулъэ Юрэ.
Нэужым сурэттех ныбжьыкIэхэу Данил Кузнецовымрэ Дарья Усовамрэ Дунэе сурэттех зэнэкъо­къум текIоныгъэ къызэрэщыдахыгъэм фэшI афэгушIуагъэх, ахэм къалэжьыгъэ тынхэр ара­тыжьы­гъэх. Ахэр Адыгэ къэралыгъо университетым истудентых. Урысыем иныбжьыкIэхэу зисурэтхэр анахь дэгъоу къыхагъэщыгъэ­хэм нэбгыритIур ащыщ.

— Урысыем ищыIакIэ къизгъэ­лъэ­гъукIырэ IофшIэгъи 100-у Адыгеим исурэтышI IэпэIэсэ 28-мэ тырахыгъэхэр къэгъэлъэгъоным щызэхэу­гъоягъэх. ЩыIэныгъэм ипчэгу ит цIыфэу зиIофшIэгъэ мыухыжькIэ дунаир зыгъэ­дахэу, зыгъэбайхэрэм ар афэгъэ­хьыгъ. Портрет, пейзаж ыкIи натюрморт пшIы пчъагъэр Адыгеим исурэтышI-сурэттеххэм аIапэ къычIэкIыгъ. Дунэе ыкIи шъо­лъыр зэнэкъокъухэм, къэ­гъэ­лъэгъонхэм тиIэпэIасэхэр ахэлажьэх, хагъэунэфыкIырэ чIыпIэхэр къыдахы, — къыIуагъ Аркадий Кирнос.
Къэгъэлъэгъоным хэт портрет зэфэшъхьафыбэм нэр зыфащэ, анахьэу лIыгъэ напэр зыIэтыгъэ лIыхъужъхэм яехэм. Джащ фэдэу Адыгеим къэралыгъо гъэ­псыкIэ иIэ хъуным дэлэжьэгъэ цIыфхэм ясурэтхэри къэгъэлъэгъуапIэм ифонд хэлъых. 2023 — 2024-рэ илъэс­хэм тырахыгъэхэр Iофтхьабзэм апэрэу къыщагъэлъагъох.
Портрет пэпчъ къыоплъы, къыбдэгущыIэ, ахэтых мыхэм лэжьэкIо Iапшъэ емызэщыжьхэр, псэолъэшIхэр, врачхэр, кIэлэ­егъаджэхэр, нахьыжъ IэпэIасэхэр, спортым щылъэшхэу тиреспубликэ ыцIэ рязыгъаIохэрэр, агрономхэу чIыгум хэшIыкIышхо фызиIэхэр, инженерхэр, шIэныгъэлэжьышхо­хэр.
Къушъхьэхэм ядэхагъэ, тыкъэзыуцухьэрэ дунаим изэхъокIыныгъэхэм, нэмыкIхэм сурэтхэр афэ­гъэхьыгъэх. Ахэм Урысыем ищыIэныгъэ къыраIотыкIы.
— Сурэттеххэм яIофшIагъэхэр дахэу, узыIэпащэу гъэпсыгъэх. ЧIыопсым, тарихъым, лIыхъужъны­гъэм, псэушъхьэхэм, цIыфхэм ящыIакIэ, нэмыкIхэм яхьылIэгъэ сурэтхэр гъэшIэгъоных. ЗекIо сыкIоныр сикIас, сиIофшIэгъи 4-у къэгъэлъэгъоным хэлажьэхэрэр щыIэныгъэ къызэрыкIом къыхэхыгъэх. Анахьэу мыхэм къахэбгъэщын плъэкIыщтыр «Молчание» зыфиIорэм щыIэныгъэ гъогу кIы­хьэ къэзыкIугъэ ныожъэу зиза­къо къэнагъэм ичэтыу кIэрысэу щысыр ары. А сурэтым купкIы­шхо иI, — къыIуагъ кIэлэегъэджэ шIэныгъэхэмкIэ кандидатэу, до­центэу, Мыекъопэ фотоклубэу «Лэгъонакъэ» хэтэу Еутых Саидэ.
Урысыем и Мафэ фэгъэхьыгъэ къэгъэлъэгъоныр мэкъуогъум и 28-м нэс зэIухыгъэщт. Искусствэр зышIогъэшIэ­гъонхэр ащ еплъынхэу зэхэщакIохэм рагъэблагъэх.
Лъэпшъыкъо Фатим.
Сурэтхэр: Артур Лаутеншлегер.