СурэтышIым идунай сыд фэда, тхьапэм тыришIыхьащтым сыда икъэкIуапIэр ыкIи сыд фэдэ гупшысэхэр хилъхьэхэра?

Мыхэм ыкIи нэмыкI упчIэхэм яджэуапхэр агъотыгъэх Адыгеимрэ Къэрэщэе-Черкес Респуб­ликэмрэ язаслуженнэ сурэтышIэу, УФ-м культурэмкIэ иIофышIэшхоу, АР-м исурэт къэгъэлъэгъуапIэ ипащэу Бырсыр Абдулахь имастер-класс хэлэжьагъэхэм. Мыщ фэдэ зэIукIэ ащ зэрэзэхищэрэр апэрэп, ау мызэгъэгурэр ахэу­шъхьафыкIыгъ — сурэтышI цIэ­рыIом игущыIэгъу къыкIэлъэIу­гъэхэр республикэм изекIозещэхэу, тишъолъыр, лъэпкъ культурэм, тарихъым Адыгеим къеблэгъэрэ хьакIэхэр нэIуасэ фэзышIыхэрэр ары.
ЗэIукIэгъур зыфэгъэхьыгъагъэу, ылъап­сэу хъугъэр Бырсыр Абдулахь иIофшIэгъэ зэхэубытагъэу «Къуаджэхэм яорэд» зыфиIорэр ары.
Кавказ зэо ужым адыгэ хэкум къи­нэгъэгъэ къуаджэхэм афэгъэ­хьыгъэ орэд жэрыIо лъэпкъ твор­чествэм къыхэнагъ. Ар зыусы­гъэм чылэхэр зэкIэ къыкIухьэхи Кавказ заом лъэпкъым лъэуж инэу къы­тыригъэнагъэр къыриIотыкIыгъ, афэусагъ, яуз, ягукIае хилъхьагъ. А орэдыр Бырсыр Абдулахь иIэубытыпIэу гущыIэу хэтхэр сурэтым рилъхьажьыгъэх ыкIи къуаджэ пэпчъ къыригъэлъэ­гъукIыгъ. ГущыIэм пае, пшъашъэр чэщныкъо шыум рихьыжьагъэу Хьакуры­нэхьаблэ къэгъэлъэгъуагъ. Бзылъ­фы­гъэм гуIэм хэтэу мазэм зыпи­гъэнагъ, ау хъулъфыгъэм ащ мэ­хьанэ ритырэп, пшъа­шъэр зэрихьырэр лIыгъэу елъытэ. Е гущыIэм пае, ХьакIэмзые. Къуаджэм дэс­хэм мацIэр агъэкIодынэу къы­дэкIыгъэхэу ежьхэм заукIыжьы. Сурэтхэм зэкIэм чIэгъчIэлъ гуп­шысэхэр ахэушъэ­фагъэх.
— Кавказ заом илъэхъан къо­джэ шъэ пчъагъэ тырагъэсты­кIыгъ. Къэнагъэхэм алъапсэхэр кIэхыгъэм фэдэ хъугъагъэх, нэшхъэигъорэ тхьамыкIагъорэ нэмыкI адэлъыгъэп. «Къуаджэхэм яорэд» зыусыгъэм а пстэур гущыIэкIэ къыриIотыкIын ылъэ­кIыгъ. Ау узедэIурэм къыIорэ гущыIэ къызэрыкIохэм мэхьанэ гъэ­бы­лъыгъэу ахэлъыр, ежь зыусыгъэм ыгу зэрэузырэр, лъэп­къым шIокIодырэм зэрэфэгумэкIырэр къахэщы. А пстэур сурэтхэм къарызгъэлъэгъукIыным сыпылъыгъ. Иллюстрациер угу къэкIыгъэр сурэт пшIыным фэдэп. КъэIуа­гъэм чIэгъчIэлъыбзэу хэлъыр плъэгъуни тхьапэм ебгъэкIужьын фае, — еIо Бырсыр Абдулахь.
Сыхьатым ехъурэ кIогъэ зэIукIэгъум къыкIоцI Фэдз къыщегъэжьагъэу адыгэ къуаджэхэм зэкIэм афэгъэхьыгъэ сурэтэу ышIыгъэхэм язырызыгъоу ар къатегущыIагъ ыкIи шъхьадж гупшысэу хэлъыр зекIозещэхэм къафиIотагъ.
— «Тхьэм егъэпсау» есIо сшIоигъу Бырсыр Абдулахь. Чыжьэу сызэкIэплъэжьи, джырэ нэс гу зылъысымытэщтыгъэр тигъэлъэгъугъэм фэд. Гуузыри, тхьамыкIагъори сынэ кIэкIыгъ, зыгорэм ипкIыхьапIэ сеплъыгъэм фэдэу зэхэсшIагъ. Сынэпсхэр къы­гъэ­кIуагъэх, — къыхигъэ­щыгъ зекIозещэу НэпшIэкъуй Ольгэ.
Анцокъо Ирин.
Сурэтыр: Анцокъо Ирин.