Лъэпкъ къашъомкIэ Адыгеим и Къэралыгъо академическэ ансамблэу «Налмэсыр» зызэхащагъэр илъэс 88-рэ зэрэхъугъэм фэгъэхьыгъэ Iэнэ хъурае республикэ филармонием щыкIуагъ.

Журналэу «Балет» зыфиIорэм иредактор шъхьаIэу Валерия Уральскаяр, Московскэ къэралыгъо академическэ къэшъокIо театрэу «Гжель» илIыкIохэр, Урысыем культурэмкIэ изаслуженнэ IофышIэу Марина Куклинар, Урысыем ыкIи Дагъыстан язаслуженнэ артистэу, балетмейстерэу Дмитрий Толмасовыр, АР-м культурэмкIэ и Министерствэ иотдел ипащэу Шэуджэн Бэлэ Iофтхьабзэм хэлэжьагъэх.
Лъэпкъ къашъор къэралыгъом ишъо­лъырхэм къащызэтегъэнэгъэным ыкIи культурэм иучреждениехэм язэдэлэжьэныгъэ гъэпытэгъэным Iэнэ хъураер фэгъэхьыгъагъ.
«ЛIэужхэм зэIэпахызэ лъэпкъ къа­шъом ежь-ежьырэу хэхъоныгъэ ешIы, зеушъомбгъу. Ащ зэхъокIыныгъэу фэхъу­хэрэр уахътэм епхыгъ. Икъызэтегъэнэн иIофыгъо зэпхыгъэр джэгукIэу хахьэхэрэм яамал зэрэзэхъокIырэр арэп, сценэм къытырэ шапхъэхэм ар япхыгъ. АдыгеемкIэ ар IэшIэхэп, сыда пIомэ шъо­лъырым ис цIыфхэр зэкIэми къэшъуакIэ ашIэ. Шэн-хэбзэ зэхэтыкIэхэр зызэбгъа­шIэкIэ, ащ иамалкIэ хэушъхьафыкIыгъэ къэшъо къызэрымыкIо къэбгъэлъэгъон плъэкIыщт»,— къыIуагъ В. Уральскаям.

Зэхахьэм тызыгъэгъозэрэ къэбар гъэшIэгъонхэр щызэхэтхыгъэх.
«Къэралыгъо академическэ лъэпкъ ансамблэу «Налмэсыр» зызэхащагъэр илъэс 88-рэ зэрэхъугъэмкIэ тышъуфэгушIонэу тыкъеблэгъагъ. Лъэпкъ къашъом­рэ джырэ уахътэм ихореографиерэ зыщызэдиштэрэ къэгъэлъэгъонхэр купым къытигъэлъэгъугъ. ЛъэгэпIэ иным нэсыгъэ «Налмэсыр» щысэтехыпI», — хигъэ­унэфыкIыгъ М. Куклинам.
Адыгэ Республикэм и Къэралыгъо академическэ лъэпкъ ансамблэу «Налмэсыр» илъэс 88-рэ зэрэхъугъэм фэгъэ­хьыгъэ концертэу «ГъашIэм пхырыщыгъэу…» зыфиIорэр Мыекъуапэ щы­кIуагъ. Лъэпкъ шэн-хабзэм инэпэеплъ хъугъэ къэшъо дахэхэр цIыфхэм къарагъэлъэгъугъ.
НэкIубгъор зыгъэхьазырыгъэр ­Лъэпшъыкъо Фатим.