Илъэс пчъагъэ хъугъэу кIэлэегъэджэ IофшIэным хэхъоныгъэ егъэшIыгъэным фэIорышIэрэ Урысые общественнэ организациеу «Урысыем икIэлэегъаджэхэм язэIукI» зыфиIорэм кIэлэеджакIохэм апае зэнэкъокъоу «Наследники Юрия Гагарина» зыфиIорэр зэхещэ.

Лъэныкъо зэфэшъхьафхэмкIэ мы Iофтхьабзэм текIоныгъэ ыкIи хагъэунэфыкIырэ чIыпIэхэр къыщыдэзыхыгъэ тикъэралыгъо икIэлэеджэкIо 14-м ащыщых Кощхьэблэ районым ит къуаджэу Блащэпсынэ игурыт еджапIэу N 5-м икIэлэеджакIохэу Бэлокъо Надимрэ БрантI Сариетрэ. Ахэм тарэгушхо!
Мэкъуогъум и 10-м просвещениемкIэ УФ-м и Общественнэ палатэ и Комиссие икIэщакIоу Урысые кIэлэегъаджэхэм язэIукIэу «КIэлэегъаджэр, унагъор, обществэр» зыфиIорэм ия XVII-рэ зэ­фэс Москва щыкIуагъ. Урысые зэнэкъокъум текIоныгъэ къыщыдэзыхыгъэ я 11-рэ классыр мыгъэ къэзыухыгъэ Бэлокъо Надимрэ ащ игъэсакIоу, физикэмкIэ ыкIи астрономиемкIэ кIэлэегъаджэу ДышъэкI Жанэ Мыхьамэт ыпхъумрэ Iофтхьабзэм хэлэжьагъэх, щагъэ-­
шIуа­гъэх.
УФ-м ишъолъыр 44-мэ къарыкIыгъэ лIыкIо 175-рэ ащ хэлэжьагъэх, ахэм ахэтыгъэх Донецкэ ыкIи Луганскэ народнэ республикэхэм къарыкIыгъэхэри. Зэфэсым дакIоу «Народное признание педагогического труда» зыфиIорэ зэнэкъо­къум текIоныгъэ къыщыдэзыхыгъэхэм медальхэр афагъэшъошагъэх, джащ фэдэу Урысые зэнэкъокъоу «Наследники Юрия Гагарина» зыфиIорэм къыщыхэщыгъэхэр щагъэшIуагъэх.

Зэфэсым хэлэжьагъэхэм ахэтыгъэх ФедерациемкIэ Советым ыкIи УФ-м и Къэралыгъо Думэ ялIыкIохэр, апшъэрэ еджапIэхэм яIофышIэхэр, кIэлэегъэджэ анахь дэгъухэр.
ТичIыпIэгъу ныбжьыкIэ цIыкIухэм япроектхэм ягъэхьазырын пэщэныгъэ дызэрихьагъ физикэмкIэ ыкIи астрономиемкIэ апшъэрэ категорие зиIэ кIэлэегъаджэу ДышъэкI Жанэ Мыхьамэт ыпхъум. Къыхэгъэщыгъэн фае, IэпэIэсэныгъэ ин зиIэ кIэлэегъаджэм ригъа­джэхэрэм апэрэп мыщ фэдэ зэнэкъокъу­хэм текIоныгъэ къызэрэщыдахырэр, федеральнэ мэхьанэ зиIэ творческэ Iофтхьабзэхэм хагъэунэфыкIырэ чIыпIэхэр мызэу, мытIоу къащыфагъэшъошагъэх.
Бэлокъо Надим иушэтын проектэу «Графический ландшафтный дизайн лунной базы» зыфиIорэмкIэ текIоныгъэ къыфагъэшъошагъ. Ар кружокэу «Дорога в космос» зыфиIорэм хэт. Ушэтын ыкIи графическэ дизайным пылъ. Ащ нэмыкIэу шIогъэшIэгъонэу ежь къы­угупшысыгъэ рекламэр ыкIи аватаркэр YouTube-каналым регъахьэ. Проектым дакIоу шIэныгъэлэжьхэм апае научнэ ушэтынхэр регъэкIокIы. Архитектурнэ ыкIи нэмыкI пкъыгъоу иIофшIэн къыщигъэлъэгъуагъэхэр ежь ыIэкIэ ышIыгъэх. Сэнэхьатэу зыкIэхъопсырэр графическэ дизайнерыр ары.
Я 10-рэ классыр къэзыухыгъэ БрантI Сариет лъэныкъоу «Космический туризм» зыфиIорэ проектымкIэ я 2-рэ чIыпIэр къыдихыгъ. НыбжьыкIэхэр зы­чIэсхэ еджапIэм къызэрэщаIуагъэмкIэ, мыщ фэдэ къэгъэлъэгъонышIум емыжагъэхэу щытэп. Сыда пIомэ, Сариет я 8-рэ классым къыщегъэжьагъэу зекIоным пылъ, организациеу «Движение Первых» зыфиIорэм и Координационнэ совет чанэу хэлажьэ, шIэныгъакIэхэр зэригъэ­гъотынхэм пылъ. Жанэ Мыхьамэт ыпхъум пэщэныгъэ зыдызэрихьэрэ кружокэу «Дорога в космос» зыфиIорэм зыщегъасэ, джащ фэдэу космическэ зекIоным ылъэныкъокIэ ушэтын IофшIэн проектхэм адэлажьэ.
УФ-м просвещениемкIэ и Министерствэ епхыгъэу зэхащэгъэ Общественнэ советым хэтэу, экономикэ шIэныгъэхэмкIэ докторэу, профессорэу Валентина Ивановам апэрэ шъуашэ зиIэ дипломыр Бэлокъо Надим къыритыжьыгъ. Ащ ипащэу ДышъэкI Жанэ рэзэныгъэ тхылъ къыфигъэшъошагъ.
Москва щыкIогъэ зэфэсым тикIэлэ­еджакIохэр хэлэжьэнхэмкIэ яшIуагъэ къарагъэкIыгъэх Кощхьэблэ район администрацием ипащэу Хьамырзэ Заур, гъэсэныгъэмкIэ гъэIорышIапIэм ипащэу Бэрзэдж Асиет, Блащэпсынэ къоджэ псэупIэм ипащэу Шэуджэн Къэплъан.
ТичIыпIэгъу цIыкIухэм ыкIи ахэм якIэлэегъаджэ тафэгушIо, Адыгеим ыцIэ дахэкIэ зэрэрагъэIуагъэм фэшI тафэраз. ТапэкIи ящытхъу арагъаIозэ лъыкIотэнхэу, еджэгъэшхо хъунхэу тафэлъаIо.
КIАРЭ Фатим.