Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу шъолъыр мэхьанэ зиIэ гъогоу Тэхъутэмыкъуае къыщегъэжьагъэу Отраднэм нэсырэм километритIу хъурэ иIахь агъэцэкIэжьы, ар мы гъогум иятфэнэрэ километрэ къыщежьэ.

Сомэ миллион 45-рэ зытефэщт Iоф­шIэнхэр зыгъэцакIэрэр хъызмэтшIапIэу «Тэхъутэмыкъое ДРСУ» зыфиIорэр ары. Джырэ уахътэм асфальтыр зытелъыщт лъапсэр аузэнкIы, трассэр бгъуитIумкIи зэзыпхыщт гъогубгъухэр агъэтэрэзыжьых, ащ ыуж гъогур зэтыраутыщт ыкIи тамыгъэхэр тырагъэуцощтых.
ЯтIонэрэ едзыгъом къыдыхэлъыта­гъэу автомобиль гъогоу «Инэм – Бжыхьэкъо­якIэр» зыфиIорэм изы Iахь агъэцэкIэ­жьыщт. Мы организацие дэдэр гъогум изэтегъэпсыхьан дэлэжьэщт. Гъогу Iахьыр анахь дэйхэм ащыщэу, адрэхэм апэ игъэшъыгъэн фаеу Адыгеяавтодорым ыгъэнэфагъ. Ащ иотдел ипащэу Дмитрий Бороненкэм къызэриIуагъэмкIэ, мониторингэу ашIырэм ишIуагъэкIэ, къоджэ псэупIэхэм ягъогу анахь дэйхэр къыхагъэщых. Федеральнэ шапхъэхэм адиштэу ахэр агъэцэкIэжьынхэр пшъэрылъ шъхьаI. Непэрэ мафэм ехъулIэу муниципалитетхэм ягъогухэм япроцент 63-р шапхъэ­хэм адештэх.
Мыгъэ агъэцэкIэжьырэ шъолъыр гъо­гухэр зэкIэ къихьащт 2025-рэ илъэсым иплан къыдыхэлъытагъэх. Зэзэгъыныгъэ­хэм къызэрагъэнафэу, гъэцэкIэжьынхэр 2024-рэ илъэсым иIоныгъо мазэ ехъулIэу аухынхэ фае, ау мэкъуогъум ыкIэм нэс Тэхъутэмыкъое районым пхырыкIырэ гъогухэр зэкIэ зэрагъэцэкIэжьыщтхэм уицыхьэ тебгъэлъы хъущт.