Мы щытхъуцIэр зыхьыгъэр медицинэ Iофы­шIэм и Мафэ фэгъэхьыгъэ мэфэкI зэIукIэу АР-м и Къэралыгъо филар­моние щыкIуагъэм ­шъхьаихыгъэ къыща­шIыгъ. Адыгеим и ЛIы­шъхьэу КъумпIыл Мурат Iофтхьабзэм хэлэ­жьагъ.

Джащ фэдэу зэIукIэм хэлэ­жьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет хэтхэр, хабзэм ифедеральнэ, иреспуб­ликэ, имуниципальнэ къулы­къухэм япащэхэр, псауныгъэм икъэухъумэн фэгъэзагъэхэр, профсоюз IофышIэхэр, волонтерхэр.
Республикэм и ЛIышъхьэ къэзэрэугъоигъэхэм зафигъа­зэзэ къыхигъэщыгъ зищыIэныгъэ медицинэм фэзыгъэIорышIэхэ­рэм, цIыфхэм япсауныгъэ къэзыухъумэхэрэм зэрафэразэр джыри зэ къэIогъэнымкIэ медицинэ IофышIэм и Мафэ амалышIоу зэрэщытыр.
«ШIэныгъэ куу зэриIэн фаем нэмыкIэу, врачым гукIэгъу хэлъын, сымаджэхэм агу къыIэтын ылъэкIэу щытын фае. Зипсауныгъэ зэщыкъуагъэхэм икъоу шъуафэгумэкIызэ, алъэ къыте­шъогъэуцожьых, хьадэгъур ашъ­хьэщэшъохы. Джары цIыфхэм врачхэм лъытэныгъэ закIыфа­шIырэр», — къыIуагъ КъумпIыл Мурат.
Республикэм ипащэ зэрэхигъэунэфыкIыгъэмкIэ, Адыгеим икъулыкъухэу псауныгъэм икъэу­хъумэн фэгъэзагъэхэм IэпэIэсэныгъэшхо зыхэлъ Iофы­шIабэ ащэлажьэ. АР-м и ЛIышъхьэ къызэриIуагъэмкIэ, IэпэIэсэныгъэшхорэ шIэныгъэ куурэ зиIэхэр, цIыфыгъэшхорэ, гукIэгъурэ зыхэлъхэр ары ащ фэдэ сэнэхьатхэр къыхэзыхыхэрэр.
«ЗыгукIэ фэщэгъэ цIыфхэр ары шъуисэнэхьат рылажьэ­хэ­рэр. ПшъэдэкIыжьышхо зэрэпы­лъыр къызыгурыIорэ, зиIоф фэ­шъыпкъэ, зикIуачIи, зиуахъти ашъхьамысхэу сымаджэхэм ящыIэныгъэрэ япсауныгъэрэ афэбанэхэрэр ары медицинэр къыхэзыхыхэрэр. ИщыкIэгъэ дэдэу щыт Iоф мыпсынкIэр зы­гъэцэкIэрэ медицинэ IофышIэ пстэуми сызэрафэразэр къыхэ­сэгъэщы», — къыIуагъ КъумпIыл Мурат.
Псауныгъэм икъэухъумэнкIэ ветеранхэми, республикэ меди­цинэм игъэкIэжьын хэлэжьэрэ IофышIэхэми рэзэныгъэ гущы­Iэхэр афигъэзагъэх. Феде­ральнэ IэпыIэгъоу къытатырэм, Уры­сыем и Президентэу Владимир Путиным къыгъэуцугъэ пшъэ­рылъхэр зэрагъэцакIэхэрэми шъхьафэу ягугъу къышIыгъ. Рес­публикэм ипащэ зэрилъы­тэрэмкIэ, ащ амал къытеты псауныгъэм икъэухъумэнкIэ шIогъэшхо къэзытыщт системэ Адыгеим щызэхэщэгъэнэу, медицинэ IэпыIэгъур нахьышIоу къалэхэми, къуаджэхэми ащя­гъэгъотыгъэнэу.
КъумпIыл Мурат къызэрэхигъэщыгъэмкIэ, IэзапIэхэр мылъкукIи, техникэкIи нахь зэтегъэ­псыхьагъэ мэхъух, псауныгъэм икъэухъумэн фэгъэзэгъэ псэо­лъакIэхэр агъэцэкIэжьых ыкIи ашIых, медицинэ IофышIэхэм якъэгъотын епхыгъэ Iофыгъохэр зэшIуахых. ГущыIэм пае, гъэ­рекIо къуаджэхэм амбулаториитIу ащагъэпсыгъ, Мыекъуапэ поликлиникэ къыщызэIуахыгъ, Мыекъопэ къэлэ IэзапIэм иотделение агъэцэкIэжьыгъ. Медицинэ колледжым игъэцэкIэжьын лъагъэкIуатэ. Поликлиникэм ишIын Инэм щаухы, къутырэу Гавердовскэм амбулаториякIэ псынкIэу къыдэтэджэщт. Джащ фэдэу мы илъэсым амбулатории 5 ашIынэу рахъухьэ. Гу-лъынтфэ узхэм, адэбз узхэм агъэгумэкIхэрэм зыщяIэзэрэ медицинэ учреждениехэр нахь зэтырагъэпсыхьэх, гъэрекIо ахэм медицинэ оборудование 200-м ехъу къафащэфыгъ.
Адыгеим и ЛIышъхьэ зэIукIэм хэлажьэхэрэм анаIэ тыраригъэ­дзагъ гъэрекIо процент 17,5-кIэ лIэныгъэр республикэм къызэрэщеIыхыгъэм, гу-лъынтфэ узхэм арылIыкIыгъэр процент 15,7-кIэ, адэбз узхэм хьадэгъу къызыфагъэсыгъэр проценти 7-кIэ нахь макIэ зэрэхъугъэм.
Медицинэ учреждениехэм яавтопарк гъэкIэжьыгъэн зэрэфаем къытегущыIэзэ КъумпIыл Мурат къызэрэхигъэщыгъэмкIэ, гъэрекIо автомобиль псынкIэ 13, медицинэ IэпыIэгъу псынкIэ языгъэгъотырэ машинэ 20 ахэм къафащэфыгъ. УФ-м и Президент пшъэрылъ къазэрафишIыгъэм тетэу флюорографиемкIэ ыкIи маммографиемкIэ мобильнэ комплекситIу аратыгъ.
ЦIыфхэм ягъашIэ нахь кIыхьэ хъугъэ, 2023-рэ илъэсым гъа­шIэр илъэс 75,4-м нэсыгъ. 2022-рэ илъэсым егъэпшагъэмэ, къэ­­хъугъакIэхэу зидунай зыхъо­жьыгъэр зыщанэкIэ нахь макIэ хъугъэ. ПстэумкIи псауныгъэм икъэухъумэн гъэрекIо сомэ мил­лиарди 9,2-м ехъу пэIуагъэ­хьагъ, мыгъэ ар сомэ миллиард 11,5-м шъхьадэкIынэу рахъухьэ.
Iэзэгъу уцхэм апае мылъкоу къатIупщыгъэр илъэситфым къыкIоцI фэди 2,6-кIэ нахьыбэ хъугъэ. ХэушъхьафыкIыгъэ дзэ операцием хэлэжьагъэхэм япсауныгъэ зыпкъ игъэуцожьыгъэнымкIэ амал зэфэшъхьафхэр зэрахьэх. Республикэ ыкIи кIэлэцIыкIу сымэджэщхэм оборудование къафащэфыгъ. Медицинэ IофышIэхэр зэримыкъу­хэ­рэм епхыгъэ Iофыгъор зэшIо­хы­гъэнымкIэ республикэм ит еджапIэхэм, хэгъэгум иапшъэрэ еджэпIэ пэрытхэм зэдэлэжьэныгъэу адыряIэм зырагъэу­шъомбгъу.
«Участкэ терапевт анахь дэгъу» зыфиIорэ зэнэкъокъу республикэм щызэхащэнэу зэ­рэрахъухьэрэр КъумпIыл Мурат къыIуагъ.
ЗэIукIэм икIэух Адыгеим и ЛIышъхьэ псауныгъэм икъэухъу­мэн фэгъэзагъэхэм къэралыгъо тынхэр аритыжьыгъэх.
Джэджэ район гупчэ сымэ­джэщым имамыку-гинекологическэ отделение ипащэу Ну­риет Гусейновам щытхъуцIэу «АР-м изаслуженнэ врач» зыфиIорэр къыфагъэшъошагъ. ЩытхъуцIэу «АР-м псауныгъэм икъэухъу­мэнкIэ изаслуженнэ IофышI» зыфиIорэр Мыекъопэ къэлэ по­ли­клиникэм имамыку шъхьа­Iэу Любовь Макеевамрэ Адыгэ республикэ клиникэ инфекционнэ сымэджэщым имедсестра шъхьаIэу Цэй Асиетрэ къафагъэшъошагъ.
Республикэ зэнэкъокъоу «Илъэсым иврач анахь дэгъу» зыфиIорэм ишIухьафтын шъхьа­Iэр — «Сэтэнае икъэгъагъэу» ювелирэу Еутых Асе ышIыгъэр мыгъэ зэратыгъэр Адыгэ рес­публикэ клиникэ сымэджэщым иотделение ипащэу Щыко Руслъан. Зэнэкъокъум илауреат хъугъэх Адыгэ республикэ кли­никэ онкодиспансерым иврач анестезиолог-реаниматологэу Наталья Поповар, АРКБ-м иврач-­кардиологэу Абыдэ Жаннэ, медицинэ IэпыIэгъу псын­кIэмкIэ ыкIи тхьамыкIагъохэм ахэфагъэхэм IэпыIэгъу ягъэгъо­тыгъэнымкIэ Адыгэ республикэ гупчэм иподстанциеу Яблоновскэм щыIэм ибригадэ иврачэу Владислав Москвиныр.
Джащ фэдэу зэIукIэм къыщыгущыIагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м псауныгъэр къэухъумэгъэ­нымкIэ иминистрэу Мэрэтыкъо Рустем, псауныгъэр къэзыухъу­мэрэ IофышIэхэм япрофсоюз­хэм я Адыгэ республикэ организацие итхьаматэу Любовь Усачевар.
Псауныгъэм икъэухъумэн фэгъэзэгъэ IофышIэ заулэмэ АР-м и Къэралыгъо Совет —Хасэм и Рэзэныгъэ тхылъхэр, АР-м псауныгъэр къэухъумэгъэ­нымкIэ и Министерствэ итынхэр афагъэшъошагъэх. Джащ фэдэу республикэ зэнэкъокъоу «Гурыт медицинэ гъэсэныгъэ зиIэхэмкIэ IофышIэ анахь дэгъу» зыфиIорэ республикэ зэнэкъокъум щатекIуагъэхэми тын лъапIэхэр къыщаратыжьыгъэх. АР-м псау­ныгъэр къэухъумэгъэнымкIэ ими­нистрэ АР-м ипрофсоюзхэм я Федерацие ибгъэхалъхьэ къы­ратыгъ.
Республикэм итворческэ купхэм Адыгеим имедицинэ IофышIэхэм концерт къафатыгъ.
АР-м и ЛIышъхьэ ипресс-къулыкъу