Лъэныкъо зэфэшъхьаф­хэм ялIыкIо анахь дэ­гъухэм хэгъэгум ыкIи ­республикэм якъэралыгъо шIухьафтынхэр ятыжьыгъэнхэм фэ­гъэхьыгъэ Iофтхьабзэ АР-м и Къэралыгъо филармоние тыгъуасэ ­щыкIуагъ.

Мы Iофтхьабзэм хэлэ­жьагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Апшъэрэ Хьыкум итхьаматэу Шумэн Байзэт, Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу, тхакIоу МэщбэшIэ Ис­хьакъ, Урысыем ошIэ-дэмы­шIэ IофхэмкIэ и Министерст­вэ и ГъэIорышIапIэу АР-м щыIэм ипащэу Станислав Илющенкэр, АР-м и ЛIышъхьэрэ АР-м иминистрэхэм я Кабинтрэ я Администрацие ипащэу Владимир Свеженец, АР-м иминистрэхэм я Кабинет хэтхэр, депутатхэр, муниципалитетхэм ялIыкIохэр.
Къэзэрэугъоигъэхэм за­къыфигъазэзэ Адыгеим и ЛIы­шъхьэу КъумпIыл Мурат къыхигъэщыгъ Iофтхьабзэр Урысыем и Мафэ зэрэфэгъэ­хьыгъэр. МэфэкIыр лъэпкъ зыкIыныгъэм итамыгъэу щыт ыкIи ти Хэгъэгушхо инепэрэ ыкIи инеущрэ мафэ зыфэдэщтхэмкIэ зэкIэми пшъэдэ­кIыжь зэрэтхьырэр къегъэ­лъагъо. Джэгъогъуныгъэ зыгу къытфилъ лъэныкъохэм лъэ­бгъу къытадзы нахь мышIэми, Урысыем нахьышIум ылъэныкъокIэ зэхъокIыныгъэхэр фэхъух, УФ-м и Президентэу Владимир Путиным къыгъэуцугъэ пшъэрылъхэм япхырыщын ахэр епхыгъэх.

Къэралыгъом ипащэ къызэрэхигъэщыгъэмкIэ, «лъэпкъ гухэлъхэр пхырыщыгъэнхэм пае IофшIэн шъхьаIэр, Iо хэ­лъэп, кабинетхэр арэп гъэцэ­кIагъэ зыщыхъурэр, ащ фэгъэхьыгъэу ренэу къэтэIо. ЧIы­пIэхэр, Федерацием ишъо­лъырхэр, тикъалэхэр ыкIи тинэмыкI псэупIэхэр ары а IофшIэныр зыщыкIорэр». Мы гущыIэхэм джыри къахэдгъэ­хъожьымэ хъущт республикэм игъэхъэгъэ пстэуми алъапсэр тичIыпIэгъухэм яIофшIакI, Адыгеим ыкIи Урысыем яхэхъоныгъэ яIахьышхо ахэм хашIыхьэ ыкIи а пстэуми уарымыгу­шхон плъэкIырэп, уичIыгу гупсэрэ уилъэпкърэ апае упсэуным ыкIи Iоф пшIэн зэрэ­фаем ящысэ шIагъоу ахэр щытых», — къы­Iуагъ КъумпIыл Мурат.
АР-м и ЛIышъхьэ къызэрэхигъэщы­гъэмкIэ, непэ мы унэм къыщызэрэугъои­гъэхэр джащ фэдэ цIыфых. Ахэр сэнэ­хьат зэфэшъхьафхэм ялIыкIох, Iофэу ха­хыгъэм гъэхъэгъэшхохэр щашIых, обществэм уфэлэжьэн зэрэфаемкIэ хэ­бзэ шIагъоу щыIэ хъугъэхэр лъагъэ­кIуатэх.
УФ-м и Президент и УказкIэ щытхъу­цIэу «УФ-м изаслуженнэ кIэлэегъадж» зыфиIорэр къыфагъэшъошагъ Мыекъопэ гимназиеу N 22-м икIэлэегъаджэу Елена Ли илъэсыбэ хъугъэу гъэсэныгъэм ылъэныкъокIэ гъэхъагъэу ышIыгъэхэм афэшI; транспортым ылъэныкъокIэ гъэ­хъагъэу иIэхэм ыкIи гуетыныгъэ фыриIэу илъэсыбэ хъугъэу Iоф зэришIэрэм пае щытхъуцIэу «УФ-м транспортымкIэ иза­служеннэ IофышI» зыфиIорэр къы­фагъэшъошагъ ДСУ N 3-м иводителэу Андрей Зогиным; щытхъуцIэу «УФ-м чIыпIэ зыгъэIорышIэжьынымкIэ изаслуженнэ IофышI» зыфиIорэр афагъэшъошагъ муниципальнэ образованиеу «Красногвардейскэ районым» иадминистрацие мэкъу-мэщымкIэ игъэIорышIапIэ испециалист шъхьаIэу Галина Голдоби­нам ыкIи муниципльнэ образованиеу «Теуцожь районым» иадминистрацие культурэмкIэ ыкIи киномкIэ игъэIорышIапIэ ипащэу Теуцожь Мариет. Джащ фэдэу IофшIэнымкIэ гъэхъагъэу ашIыгъэ­хэм ыкIи илъэсыбэ хъугъэу гуетыныгъэ фыряIэу Iоф зэрашIэрэм апае УФ-м и Президент иунашъокIэ рэзэныгъэ тхылъ аратыгъ проект документациемкIэ Къэ­ралыгъо экспертизэм ибухгалтер шъхьа­Iэу Любовь Грицевам, Федеральнэ гъогу агентствэм автомобиль гъогухэмкIэ и ГъэIорышIапIэу къалэу Мыекъуапэ щыIэм иводителэу Николай Борщевым, СМУ-2-м имашинистэу Сергей Васильевым, зэфэшIыгъэ шIыкIэм тетэу Iоф зышIэрэ хэушъхьафыкIыгъэ Мыекъопэ учреждениеу егъэджэн-пIуныгъэ Iофым фытегъэпсы­хьагъэм ипащэу Хъут Ас­лъан. Джащ фэдэу АР-м и ЛIышъхьэ и Указ диштэу республикэ шIухьафтын заули афагъэшъошагъ.

«Непэ Адыгеим хэхъоныгъэ ешIы, шъо нэбгырэ пэпчъ Iофэу шъушIэрэм бэкIэ елъытыгъ гъэхъагъэу тиIэхэр. Къэ­ралыгъо шIухьафтынхэр шъуиIофшIакIэ, шъуиIэпэIэсэныгъэ, шъуигуетыныгъэ яшыхьатэу щытых. Ау джыри бэ гухэлъэу тиIэр, проектышхоу къытпыщылъхэр макIэп. Президентым къыгъэуцугъэ пшъэрылъхэр гъэцэ­кIагъэ хъунхэм пае къэ­кIуапIэхэри, амалышхохэри щыIэх. ТапэкIи тихэ­гъэгурэ тиреспубликэрэ джы­ри нахь зэтегъэпсы­хьагъэ хъунхэм, цIыфхэм щыIэкIэ-псэукIэу яIэм зыкъыIэтыным апае тфэлъэ­кIыщтыр зэкIэ тшIэщт. ШIуа­гъэ къытэу Iоф зэрэшъушIэрэм, пшъэдэкIыжь, гуетыныгъэ, IэпэIэсэныгъэ зэрэшъухэлъым, тихэгъэгу шъузэрэфэшъыпкъэм апае сышъуфэраз. Шъо шъузы­шъхьамысыжьэу Iоф зэ­рэшъушIэрэр Адыгеим ис пстэухэмкIи, анахьэу къыт­кIэхъухьэхэрэмкIэ, щысэ дэгъу хъущт», — къыIуагъ КъумпIыл Мурат.
Iофтхьабзэм хэлажьэхэрэм къыхагъэ­щыгъ республикэм зэхъокIыныгъэшIухэр зэрэфэхъухэрэр, цIыфхэм яIэпэIэсэныгъэ нахь хэхъонымкIэ хэгъэгум ыкIи республикэм япащэхэм анаIэ къызэратырагъэтырэм апае зэрафэразэхэр. ГущыIэм пае, сабыибэ зиIэ Анна Корнеевам социальнэ контрактым тегъэ­псыхьэгъэ проектыр IэпыIэгъу къыфэ­хъугъ унэе предпринимателэу хъунымкIэ ыкIи гъэхъагъэ хэлъэу иIоф лъигъэкIотэнымкIэ. Колхозэу «Радугэм» бизнесым хэхъоныгъэ щишIынымкIэ къэралыгъо IэпыIэгъум иамал зэфэшъхьафхэр щагъэфедэх. Ащ фэгъэхьыгъэу къыIотагъ предприятием игъэцэкIэкIо пащэу, чIыгулэжьыным зятэжъ пIашъэхэр фэгъэзэгъэгъэ, джы ахэм ягъогу рыкIорэ Сапый Ерстэм.
АР-м и ЛIышъхьэ къызэрэхигъэщы­гъэмкIэ, IэпыIэгъум къыдилъытэрэ Iоф­тхьэбзабэ зэшIохыгъэ хъунымкIэ къэралыгъор къадеIэ, чанэу Iоф зышIэхэрэм, социальнэ пшъэрылъхэм ягъэцэкIэн зиIахь хэзышIыхьэхэрэм амал дэгъухэр арегъэгъотых.
«Непэ зэкIэми тызэгъусэу ыкIи зэдедгъаштэу хэгъэгум инеущырэ мафэ лъапсэ фэтэшIы. Лъэныкъо зэфэшъхьаф­хэм ялIыкIо анахь дэгъухэм IофшIэнымкIэ гъэхъагъэу яIэхэм, ягуетыныгъэ ыкIи ячаныгъэ нахь тызэрапхы, ти Хэгъэгу­шхо игъэхъагъэхэм нахь заушъомбгъунымкIэ, ищытхъу нахь чыжьэу IунымкIэ гуетыныгъэ къытхалъхьэ!» — къыхигъэщыгъ КъумпIыл Мурат.
АР-м и ЛIышъхьэ ипресс-къулыкъу
Сурэтхэр: А. Гусев.