Мэкъуогъум и 12-м зэрэхэгъэгоу Урысыем и Мафэ щагъэмэфэ­кIыгъ.

Къэлабэмэ урысые, тематическэ Iоф­тхьабзэхэр ащыкIуагъэх. Мыекъуапэ Iофтхьабзэу «Урысыер тихэгъэгушху» зыфиIорэмкIэ мэфэкIыр щырагъэжьагъ.
Патриотическэ орэдхэр къызэдаIозэ, Iофтхьабзэм хэлэжьэгъэ нэбгырэ 300-м ехъумэ Урысыем, Адыгэ Республикэм, ТекIоныгъэм ябыракъышхохэр зэпаIыгъ­хэу Зэкъошныгъэм ипчэгу къырахьа­гъэх. Культурэм и Унэу «Гигантым» народнэ къашъомкIэ иансамблэу «Иван-да-Марья» зыфиIорэр, Мыекъопэ дзэ гарнизо­ным идзэкъулыкъушIэхэр, юнармейцэхэр, общественностым илIыкIохэр Iофтхьа­бзэм хэлэжьагъэх. Ащ икIэух зэкIэми Урысые Федерцием игимн къызэда­Iуагъ.
Iофтхьабзэм изэхэщэн зигукъэкIыр Мыекъуапэ щыщ пшъэшъэ ныбжьыкIэу Алиса Зоринар ары. ИгупшысэкIэ ар Урысые Федерацием и Президентэу Владимир Путиным зыдэгуащэм, къэралыгъом ипащэ флэшмобым изэхэщэнкIэ къыдыригъэштагъ.
— «Апэрэхэм я Движение» исовет хэт сипшъашъэ Владимир Путиным тхыгъэ фигъэхьыгъ. ТиIофтхьабзэ къызэ­рэдыригъаштэрэмкIэ Владимир Владимир ыкъом ащ джэуап къыритыжьыгъ. Ащ фэдэ Iофтхьабзэхэр тапэкIэ -Краснодар краим, Москва, Липецкэ, Смоленскэ ащызэхэтщэнхэу итэхъухьэ», — къыIуагъ лъэпкъ къашъохэмкIэ ансамблэу «Иван-­да-Марья» ипащэу Алексей Зо­риным.
Республикэм игуфэкIо купхэмрэ объединениехэмрэ яфорумэу «Адыгеим ифронт зыкI» зыфиIорэри Урысыем и Мафэ щыIагъ. Хъытыухэм яхъынкIэ, шэф остыгъэхэу, нэмыкI пкъыгъохэу хэушъхьа­фыкIыгъэ дзэ операцием хэлажьэхэрэм афарагъэщэщтхэм ягъэхьазырынкIэ ма­стер-классхэр гуфакIохэм зэхащагъэх.
ГуфэкIо купэу «Сетевой плацдарм 01» зыфиIоу Елена Кутимскаяр зипащэм дзэкъулыкъушIэхэм IэпыIэгъу афэхъугъэ­нымкIэ Iофышхо зэшIуехы. ГуфакIохэм илъэс имыкъукIэ хъытыу 600-м ехъу фронтым арагъэщагъ.
Купыр зыдэщыIэ чIыпIэр: къ. Мыекъуа­пэ, урамэу 8 Мартэр, 24. Мафэ къэс мыщ нэбгырэ 25-м фэдизмэ Iоф щашIэ, Зы мафэм къыкIоцI гуфакIохэм хъытыуи 2 — 4-рэ ахъын алъэкIы. Хьазыр хъурэ хъытыухэр нэмыкI хьылъэхэм ягъу­сэхэу фронтым арагъащэх.
Фо­ру­мым хэлэжьагъэхэм дзэ шъуашэхэр зыщалъэнхэу, Iэшэ лъэпкъхэм нэIуасэ зафашIынэу, гуфакIохэм къагъэхьазырыгъэ пкъыгъохэм гущыIэ фабэхэр атыратхэнхэу амал яIагъ.
Джащ фэдэу Мыекъуапэ дэсхэри, къалэм ихьакIэхэри зыгъэпсэфыпIэ къэ­лэ паркым къыщатыгъэ концертхэм яплъыгъэх. Самодеятельнэ, муниципальнэ творческэ купхэр ары концертхэр къэзытыгъэхэр.
Адыгэ Республикэм иартистхэр зыхэ­лэжьэгъэ концертышхоу Лениным ­ипчэгу щыкIуагъэмкIэ мэфэкIыр аухыгъ. Артист ныбжьыкIэхэмрэ «Апэрэхэм я Движение» ишъолъыр къутамэ хэтхэмрэ Урысыем ибыракъышхо зэпаIыгъэу пчэгум къырахьагъ.