Урысые Iофтхьабзэу «Тэ — Урысыем тырицIыф» зыфиIорэм Адыгеир хэлэ­жьагъ. АР-м и ЛIышъхьэу КъумпIыл Мурат ащ къыдыхэлъытагъэу республикэм исхэу илъэс 14 зыныбжь хъугъэхэм пас­портхэр ариты­жьыгъэх.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Апшъэрэ хьыкум итхьаматэу Шумэн Байзэт, Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу, тхакIоу МэщбэшIэ Ис­хьакъ, муниципалитетхэм ялIыкIохэр, ны-тыхэр ыкIи кIэлэ­еджакIохэм яныбджэгъухэр.
Тхылъ шъхьаIэр къыратыжьынымкIэ апэу фитыныгъэ зэратыгъэхэр еджэнымкIэ, творчест­вэмкIэ ыкIи спортымкIэ зэнэ­къокъухэм текIоныгъэхэр къащыдэзыхыгъэ кIэлэеджэкIо нэ­бгырипшIыр ары. Ахэм ащыщых: Матвей Жилиныр (гурыт еджапIэу N 10-р, къ. Мыекъуапэ), Хьаджыу Тимур (гурыт еджапIэу N 7-р, къ. Мыекъуапэ), Роман Радуловыр (Мыекъопэ районымкIэ гъэсэныгъэ зыщарагъэгъотырэ гупчэу N 4-р), ЛэупэкIэ Замирэ (гурыт еджапIэу N 3-р, Адыгэкъал), Брафтэ Эммэ (гурыт еджапIэу N 3-р, Кощхьэблэ район), Хьэлэщтэ Светланэ (гурыт еджапIэу
N 6-р, Теуцожь район), Анастасия Харлашинар (гурыт еджапIэу N 2-р, Джэджэ район), Ника Орловар (гимназиеу N 1-р, Красногвардейскэ район), Тулпэрэ Дамир (гурыт еджапIэу
N 4-р, Шэуджэн район), Бэрэтэрэ Аслъанбый (гурыт еджапIэу N 24-р, Тэхъутэмыкъое район).
Тихэгъэгу ицIыф ныбжьыкIэ­хэм тикъэралыгъошхорэ тигупсэ республикэрэ яхэхъоныгъэ акIуачIэ зэрэрахылIэщтым ицы­хьэ зэрэтелъыр Адыгеим и ЛIышъхьэ къыIуагъ.
«Урысые къэралыгъоу тихэгъэгогъу лIэужыбэмэ якъарыукIэ ыкIи ялIыхъужъныгъэкIэ агъэпы­тагъэр джыри нахь зэтегъэпсы­хьагъэ шъушIынэу къышъупыщылъ. Тихэгъэгу, ащ итарихъы­шхо, дунэе культурэм иIахьэу хишIыхьагъэм, гъэсэныгъэмрэ шIэныгъэмрэ алъэныкъокIэ гъэ­хъэгъэшхоу ышIыгъэхэм непэ тарэгушхо», — къыIуагъ КъумпIыл Мурат.
КIэлэеджакIохэу Урысые Фе­дерацием ицIыфхэу зэрэщытхэр къэзыушыхьатырэ паспортыр къызэратыжьыгъэхэм ацIэкIэ къэгущыIагъ Матвей Жилиныр. Гъэсэныгъэм ихэхъоныгъэ, ныбжьыкIэ ыкIи волонтер движением ынаIэ къызэратетырэм, къыткIэхъухьэхэрэр зыгъэгумэкIырэ Iофыгъохэм язэшIохын къызэрэхэлажьэрэм, гъэсэныгъэр тапэкIи лъагъэкIотэнымкIэ, яамалхэр къызэIухыгъэ хъунхэмкIэ ишIогъэшхо къызэрякIырэм апае Адыгеим и ЛIышъхьэ зэрэфэразэхэр ащ къыIуагъ.
Мы Iофтхьабзэм хэлэжьагъэ пэпчъ паспортымрэ шIуфэс гу­щыIэхэмрэ анэмыкIэу республи­кэм и ЛIышъхьэ ыцIэкIэ шIухьафтын лъапIэ — планшет къыратыгъ. ИкIэухым КъумпIыл Мурат кIэлэцIыкIухэм афэлъэIуагъ псауныгъэ пытэ яIэнэу, гъэхъэ­гъакIэхэр ашIынхэу, шIоу щыIэр зэкIэ къадэхъунэу.
«Адыгеир къыжъурэгушхо ыкIи къышъущэгугъы. Джыри зэ сышъуфэгушIо мы хъугъэ-шIэгъэшхом пае. Тэ цыхьэ къышъу­фэтэшIы, Урысыем ыкIи ащ амалышхоу иIэхэм, инеущырэ мафэ тицыхьэ ателъ», — къы­Iуагъ КъумпIыл Мурат.