2020 — 2022-рэ илъэсхэм ковидымкIэ республикэм анахь сымэджэщ ин къы­зыщызэIуахыгъэгъэ Мыекъопэ къэлэ клиническэ сымэджэщым медицинэм иIофышIэхэу коронавируснэ инфекцием ебэныжьыгъэхэм ясау­гъэт къыщызэIуа­хыгъ.

Iофтхьабзэм хэлэжьагъ ­Адыгэ Республикэм и ЛIышъхьэу Къум­пIыл Мурат. Джащ фэдэу саугъэтым икъызэIухын къекIолIагъэх АР-м и Къэралыгъо Совет — Хасэм и Тхьаматэу Владимир Нарожнэр, Адыгеим иминист­рэхэм я Кабинет и Тхьаматэ игуадзэу, финансхэмкIэ иминистрэу Виктор Орловыр, АР-м псауныгъэм икъэухъумэнкIэ ими­нистрэу Мэрэтыкъо Рустем, Мыекъопэ къэралыгъо клиническэ сымэджэщым иврач шъхьа­Iэу Владимир Лобода, псауныгъэм икъэухъумэнкIэ учреждениехэм яврачхэр ыкIи яIофы­шIэхэр, республикэм псауны­гъэм икъэухъумэнкIэ и Министерствэ, Роспотребнадзорым икъутамэу АР-м щыIэм яIофы­шIэхэр, медицинэм иветеранхэр, республикэм иорганизациехэу медицинэ гъэсэныгъэ зыщарагъэгъотыхэрэм ястудентхэр, общественнэ IофышIэхэр.
Къэзэрэугъогъэхэм закъыфигъазэзэ, Адыгеим и ЛIышъхьэ къыхигъэщыгъ медицинэм иIофышIэхэу коронавирусым пэшIуекIогъэнымкIэ лIыхъужъныгъэ зезыхьагъэхэм ясаугъэт къегъэ­лъагъо эпидемиологие лъэныкъомкIэ лъэшэу Iофхэр къызэ­хьылъэхэм цIыфхэм якъэгъэнэ­жьын зышъхьамысыжьэу фэбэнагъэхэм лъытэныгъэ ин зэрафашIырэмрэ зэрафэразэхэмрэ.
«Тэ ренэу тыгу илъыщтых врачхэу, медсестрахэу, фельдшерхэу, санитархэу, лаборантхэу, IэпыIэгъу псынкIэм ибригадэхэу, студент-волонтерхэу, зышъхьасымыжьэу пандемием пэуцужьыгъэхэр. ЕжьхэмкIи щынагъоу а лъэхъаныр щытыгъэми, медицинэм иIофышIэхэм япшъэрылъ гуетыныгъэ фыряIэу, пшъэдэкIыжь инэу ахьырэр зэ­хашIыкIэу агъэцэкIагъ. Зышъхьа­мысыжьхэу, чэщи, мафи, яунагъохэм арысхэри тхьамэфэ пчъагъэрэ амылъэгъухэу ахэм Iоф ашIагъ. IэпэIэсэныгъэ ин зэрахэлъыгъэм, яIоф зэрэфэшъыпкъагъэхэм яшIуагъэкIэ а чIыпIэ зэжъум тыкъыхэкIыжьын тлъэкIыгъ», — къыIуагъ КъумпIыл Мурат.
Мы саугъэтым икъызэIухын игъоу алъэгъугъ псауныгъэм икъэухъумэн иIофышIэхэм, иветеранхэм, республикэм иобщественнэ организациехэм, къэлэ­дэсхэм. Республикэм и ЛIышъхьэ цIыфхэм якъэгъэнэжьынкIэ зышъхьамысыжьхэу зисэнэхьат пшъэрылъ зыгъэцэкIэгъэ цIыф­хэу медицинэм щылажьэщты­гъэхэм яшIэжь мыкIосэным пае саугъэтым кIэщакIо фэхъугъэхэм инэу зэрафэразэр къыхигъэ­щыгъ. Саугъэтыр сурэтышIэу Дыгъу Айтэч ипроекткIэ агъэуцугъ.
«Ковиднэ сымэджэщыр зыдэщыIэгъэ медицинэ учреждени­ем щагъэуцугъэ мы саугъэтыр Адыгеим иврачхэм яIэпэIэсэны­гъэрэ ялIыхъужъныгъэрэ ятамыгъэу зэрэхъущтым имыза­къоу, медицинэм иIофышIэхэу къыткIэхъухьащтхэми щысэшIу зэрафэхъущтым сицыхьэ телъ», — къыхигъэщыгъ Адыгеим и ЛIышъхьэ.
Пандемием илъэхъан АдыгеимкIэ псауныгъэм икъэухъумэн иIофышIэ мини 3,5-м ехъурэ сымаджэ хъугъагъ. Медицинэм иIофышIэ 18 дунаим ехыжьыгъ. Ахэм ащыщхэм, щымыIэжьхэми, къэралыгъо тын лъапIэхэр къа­фагъэшъошагъэх.