Адыгэ Республикэм ­иуплъэкIокIо-лъытэкIо къулыкъухэм ясеминар-­зэIукIэу бэмышIэу щыIагъэм хахъохэмкIэ чIыфэр зытелъхэм ар зэрэзытырагъэкIыжьырэм епхыгъэ Iофыгъохэм щатегущыIагъэх.

Iофтхьабзэм хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, парла­ментым икомитет итхьаматэ игуа­дзэу Шэуджэн Сэфэр, АР-м ими­нистрэхэм я Кабинет и Тхьа­матэ игуадзэу, Адыгеим финансхэмкIэ иминистрэу Виктор Орловыр, Адыгэ Респуб­ли­кэм къэралыгъо финанс уплъэ­кIунхэмкIэ и ГъэIорышIапIэ ипа­щэу Насыф Мариянэ, рес­публикэм имуниципальнэ образованиехэм яадминистрациехэм, яуплъэкIокIо-лъытэкIо къулыкъу­хэм ялIыкIохэр.
Владимир Нарожнэм депутатхэм ацIэкIэ семинарым хэла­жьэхэрэм шIуфэс къарихи, Адыгэ Республикэм и Уплъэ­кIокIо-лъы­тэкIо палатэ дэгъоу Iоф зэришIагъэмкIэ зэрэфэразэр къыIуагъ.
— Хэбзэгъэуцугъэу щыIэм диштэу парламент уплъэкIунхэр зэхэщэгъэнхэмкIэ, финансхэм ягъэфедэнкIэ, бюджетхэм алъэ­ныкъокIэ хабзэр мыукъогъэ­нымкIэ Iофэу зэшIошъухыхэрэм яшIуагъэ депутатхэм къякIы. Сы­дигъуи фэмыдэу непэ дебитор чIыфэхэр щымыIэнхэмкIэ шэпхъэ зыкIхэр тиIофшIэн щыдгъэфе­дэнхэ, лъэныкъо пстэури къы­зэлъиубытэу Iофхэм тякIолIэн, уплъэкIунхэр ренэу зэхатщэхэзэ тшIын фае. Къэралыгъо, муниципальнэ финансхэр амал зэри­IэкIэ нахьышIоу гъэзекIогъэнхэм тыкъыфэкIон, нахь шIогъабэ къы­тэу бюджет мылъкур гъэфе­дэгъэн фае, — къыIуагъ Адыгэ Республикэм и Къэралыгъо Со­вет — Хасэм и Тхьаматэ.
ХахъохэмкIэ дебитор чIыфэр нахь псынкIэу ятыжьыгъэнымкIэ амал тедзэхэр зехьэгъэнхэм, къэралыгъо (муниципальнэ) финанс уплъэкIунхэр зэхэзыщэрэ къулыкъухэм яIофшIэн агъэлъэшыным атегъэпсыхьагъэу Урысые Федерацием и Президент къыгъэуцугъэ пшъэрылъхэм язэшIохынкIэ семинарым ишIуа­гъэ къызэрэкIощтым ицыхьэ зэрэтелъыр ащ къыIуагъ, зэIукIэм хэлажьэхэрэм гъэхъагъэ хэлъэу Iоф ашIэнэу афэлъэIуагъ.
Адыгэ Республикэм и Уплъэ­кIокIо-лъытэкIо палатэ итхьама­тэу Павел Стаценкэр зэIукIэм къызыщэгущыIэм, финансхэр дэгъу дэдэу зыгъэфедэрэ, бюджет Iофхэр шъхьэихыгъэ дэдэу зезыхьэрэ шъолъырхэм ясатыр Адыгеир джыри зэрэхэтыр къы­Iуагъ.
Джащ фэдэу ащ зэIукIэм хэла­жьэхэрэм агу къыгъэкIыжьыгъ официальнэ сайтэу Палатэм иIэм аналитическэ къэбар зэфэ­шъхьафхэр къызэрэрагъахьэ­хэрэр.
Адыгэ Республикэм иуплъэкIо­кIо-лъытэкIо къулыкъу иIофы­шIэ­хэр дебитор чIыфэр зытегъэкIы­жьыгъэнымкIэ Iофэу ашIагъэм, псэолъэ ныкъошIхэр нахь макIэ хъунхэмкIэ амалэу зэрахьагъэ­хэм къатегущыIагъэх.
ЗиIофшIэн щытхъу пылъэу зы­гъэцэкIэрэ пэщэ заулэмэ зэ­IукIэм тын лъапIэ къащараты­жьыгъ. Илъэсыбэрэ гуетыныгъэ фыряIэу Iоф зэрашIэрэм, къэралыгъо финанс уплъэкIунхэм яIахьышхо зэрэхашIыхьэрэм афэшI муниципалитетхэм яуплъэ­кIокIо-лъытэкIо къулыкъухэм япащэхэу Н. Е. Акиндиновам, Б. К. Джэндарым, С. К. Тра­хъом, Н. В. Минаковам, А. К. Тхьэгъа­нэм, Т. Н. Старинам, С. А. Во­рэ­къом, В.Ч. Джамырзэм, Е. В. Шагъундэкъом Адыгэ Респуб­ликэм и Къэралыгъо Совет — Хасэм и Рэзэныгъэ тхылъ афа­гъэшъошагъ.