Адыгеим илIыкIохэр къахэщыгъэх
ДзюдомкIэ я 11-рэ Урысые зэнэкъокъухэр Мыекъуапэ щыкIуагъэх. СССР-м изаслуженнэ тренерэу Кобл Якъубэ ишIэжь фэгъэхьыгъэ турнирым Адыгеим ибэнакIохэм медали 6 къыщахьыгъ.
Урысыем исубъект 21-мэ ыкIи ифедеральнэ шъолъыри 6-мэ къарыкIыгъэ спортсмен 234-мэ мызэгъэгум заушэтыгъ. БлэкIыгъэ илъэсым егъэпшагъэмэ, мыщ хэлэжьэгъэ бэнакIохэм япчъагъэ фэдитIукIэ нахьыб. Адыгеир дзюдоист 30-мэ къагъэлъэгъуагъ.
Хъулъфыгъэхэм язэнэкъокъу къащыхэщыгъ ЦIыкIу Рэмэзан. Килограмм 60-м нэс къэзыщэчыхэрэм якуп ар щыбэнагъ. Адыгэкъалэ щыщ спорсменым ятIонэрэ илъэс хъугъэу мы турнирым джэрз медаль къыщехьы. Финалныкъом ащ къыщытекIуагъэр Ставрополь краир ыкIи Къэрэщэе-Черкесыр къэзыгъэлъэгъохэрэ Заур Гоговыр ары.
Килограмми 100-м нэс къэзыщэчыхэрэм якуп Адыгеим медалитIу щыриI. Малыщ Аскэр зэнэкъокъум дэгъу дэдэу зыфигъэхьазырыгъ ыкIи ичемпион хъугъэ. Датхъужъ Алый ящэнэрэ чIыпIэр къыдихыгъ.
Бзылъфыгъэхэм язэнэкъокъу ятIонэрэ ыкIи ящэнэрэ чIыпIэхэр къыщыдахыгъэх республикэм илIыкIохэу Татьяна Шаталовамрэ Диана Лобановамрэ. Джащ фэдэу килограмм 70-м нэс къэзыщэчыхэрэм якуп щыбэнэгъэ Мария Лодневам тыжьын медаль къыфагъэшъошагъ.