Урысыем и Мафэ ехъулIэу Адыгэ республикэ кIэлэцIыкIу тхылъеджапIэм мызэу, мытIоу Iофтхьэбзэ зэфэшъхьафхэр щызэхащэх.

«Мыр мэфэкI ин ыкIи лъапI, — еIо тхылъеджапIэм ипащэу Елена Демьянковам. — Ащ ыуасэ ыкIи имэхьанэ елъытыгъэу мэфэкI Iоф­тхьэбзэ зэфэшъхьафхэр — зэIукIэгъухэр, тхылъ къэгъэлъэгъонхэр, зэхахьэхэр зэхэтэщэх. Ахэм яшъып­къэу тиотделхэр ахэлажьэх. Мы зэкIэм Урысыем и Мафэ имэхьанэ кIагъэтхъы, титарихъ тэри зэрэтлъэкIэу лIэужхэм алъытэгъэIэсы».
Урысыем и Мафэ цIыф лъэпкъыбэу тикъэралыгъошхо щыпсэухэрэм зэфэдэу зэдагъэмэфэкIы. Тхылъ­еджапIэм къыщызэIуахыгъэ къэгъэлъэгъонхэу «Многоликая Россия», «Россия: вчера, сегодня, завтра», «Родина моя, нет тебя прекрасней» зыфиIохэрэр кIэлэеджакIоу ныбжь зэфэшъхьафхэм арытхэм ягулъытэ къэзгъэущырэх, яшIэныгъэ хэзыгъа­хъорэх ыкIи хэгъэгу шIулъэгъур зыгъэлъэшырэх. Мы уахътэр гъэмэфэ зыгъэпсэфыгъом тефагъэми, тхылъеджапIэм къалэм дэт гурыт еджапIэхэм къащызэIуахыгъэ мэфэ лагерьхэм ащыIэ кIэлэцIыкIухэр къащэх. «Родина» зыфиIорэ гущыIэм имэхьанэ IупкIэу афыраIотыкIызэ, ащкIэ тхылъеджапIэм чIэлъ литературэ баим фагъэнэIуасэх. «Родинэр — зы, ар Ным ычIыпI!» зыфиIорэ гупшысэ куур кIагъэтхъэу, Iофыгъуабэ зэшIуахы, Урысыем и Мафэ анахь мэфэкI инэу мэфэпчъым зэрэхэтыр, уи Хэгъэгу зыми пэпшIынэу щымытэу, ухэтми уфэрэзэн ыкIи уфэшъыпкъэн зэрэфаер агурагъаIо.
Дзэукъожь Нуриет.