ЩыIэныгъэм уилъагъо зэрэщыбгъотыщтым, узэрэзыфырикъужьыщтым, уигухэлъхэр къызэрэзыдэбгъэхъущтхэм, гъэхъагъэхэм ыкIи къыбдэмыхъугъэхэу уишэн нахь псыхьагъэ зышIыхэрэм яшыхьат къыхэтыутырэ тхыгъэр.

Спортсменэу Михаил Игольниковым ыцIэ пстэуми зэлъашIэ. СамбэмкIэ ыкIи дзюдомкIэ ТIопсэ еджапIэм зыщызыгъэсагъэу, зэлъашIэрэ спорт­сменэу, къэралыгъом дзюдомкIэ анахь гъэхъэгъабэ щызышIы­гъэ­мэ ащыщэу, Урысыем ­илъэпкъ хэшыпыкIыгъэ куп хэтэу мыгъэ ар Париж щыкIощт Олимпиадэм хэлэжьэнэу зегъэхьазыры. Ащ къушъхьэ зекIоныр икIас. Илъэ­ситIу хъугъэ къэбэртэе шы лъэп­къышIоу Алибек зыцIэр ишъэогъухэмрэ «Шыу Хасэм» хэтхэмрэ къызыратыгъэр. Урысые географическэ обществэм хэт. Адыгэ лъапсэхэр зиIэ ­кIэлэ шэнышIоу, зэIухыгъэу щыт.
Чемпионэу Игольниковым янэу Фатимэ бэмэ ашIэ. Ар ижъырэ шапсыгъэ лIакъоу Алалэ къыхэкIыгъ, ыкъо игъусэ зэпыт. ИкIалэ фэдэу гъэхъэгъабэ ­ышIыгъ.
ТIопсэ районым ит псэупIэу Новомихайловскэм Алалэ Шырахьмэтрэ Зоерэ яунагъо ар къихъухьагъ. Гурыт ыкIи музыкальнэ еджапIэхэр къызэдиухыгъэх.

— Илъэсищ сыныбжьэу апэ­рэу «Дом быта» зыфиIорэм сятэ сыригъусэу сызычIафэм, парикмахер сэнэхьатым сыкIэхъопсэу сыублагъ, — къеIотэжьы Фатимэ. — Ар къызIэкIэзгъэхьанымкIэ техникумым сычIэхьанэу зызгъэхьазыры зэхъум ся­нэ-сятэхэр бэрэ фэягъэхэп. Уахътэм диштэу сятэ бухгалте­рэу се­джэнэу шIоигъуагъ, сянэ тхылъ­еджапIэм иIофышIэ сыхъу­нэу фэягъ. Нахьыжъхэм аIорэм се­дэIуи, къоджэ тхылъеджапIэм илъэсырэ Iоф щысшIагъ. Ау ащ сызэрэфэмыщагъэр нахь лъэшэу зэхэсшIагъ. Парикмахер сыхъу­ным игугъапIэ ау щытми зыдэ­сIыгъыгъ. Уахътэр сымыгъакIоу сиIахьылхэм, сипшъэшъэгъухэм ашъхьацхэр афыкIэсыупхъухьэщтыгъ, мэфэкI горэм кIонхэ хъумэ дахэу афызэIэсхыщтыгъ.
ТхылъеджапIэм ипащэу ­Ольга Бодуэн Фатимэ янэ зэрэдэгущыIагъэм ишIогъэшхо къэкIуагъ. Ныр къешIуи, пшъэшъэжъыем 1989-рэ илъэсым парикмахерскэ курсхэр Мыекъуапэ къыщиу­хыгъ, «диплом плъыжьи» къыраты­жьыгъ. Илъэситфырэ Новомихайловскэм зыщэлажьэм ыуж Москва кIуагъэ, къэлэшхоми иIэпэIэсэныгъэ щихигъэхъуагъ. Зичэзыу десэхэри «диплом плъыжькIэ» ыкIугъ.
— Къызысэгъэзэжьым унагъо сихьагъ, сигухэлъхэри IукIотыгъэх, — къыддэгощагъ шъхьэ­ихыгъэу Фатимэ. — Парикмахерэу Iоф сшIэщтыгъ, ащ заочнэу сыдеджэжьыщтыгъ (ТIопсэ къэралыгъо гидрометеороло­гическэ университетым сычIэ­хьэгъагъ), сабыищ къысфэхъугъэу дэспIущтыгъ. Экономист-­менеджер сызэрэхъугъэр къэзыушыхьатырэ дипломыр къызысатыжьым сятэ езгъэлъэ­гъугъ ыгу рэхьат хъуным пае. Ау сэ сырырэзагъэп. Арэп сызкIэхъо­псыщтыгъэр. Шъхьацыр дахэу зэгъэфэгъэнымкIэ зэнэкъокъу­хэм сахэлэжьэнэу, цIыфхэр згъэ­гушIонхэу ренэу сыфэягъ. Зы мафэ горэм сищыIэныгъэ зэрэщытэу зэхъокIыгъ…

Илъэси 10-кIэ узэкIэIэбэжьмэ IэпэIасэу Гульнара Чекоевам иIофшIагъэхэр Фатимэ апэрэу дунэе хъытыум щилъэгъугъэх ыкIи ащ и Академие чIэхьанэу ыгукIэ рихъухьагъ.
— Илъэс пчъагъэхэм а гухэ­лъыр зыдэсIыгъыгъ, сызтещыны­хьажьыщтыгъ, — ыгу къэкIы­жьы Фатимэ. — Илъэс пчъагъэрэ Iоф сшIагъэу, зэгъэуIугъэ шIэныгъэхэри сиIэу, анахь лъэ­бэкъу шъхьаIэр сфэдзыжьыщтыгъэп. Сигуе-мыягъэ сытезгъэкIуагъэр къушъхьэхэр ары…
Илъэс 49-рэ ыныбжьэу Фатимэ апэрэу Эльбрус дэкIоягъ.
— Къушъхьэ шыгум сытетэу ар къыздэхъугъэми сшIошIы хъужьыщтыгъэп, — икIэрыкIэу текIоныгъэр зэхишIэжьырэм фэдэу Фатимэ къеIуатэ. — Сызэрэзыфырикъужьыгъэм ишы­хьат пытэу джыри плIэгъогогъо Iошъхьэмафэ — арыба Эльбрус адыгэхэр зэреджэхэрэр, сыдэкIоягъ!
Илъэс тешIи Фатимэ Гималаи къушъхьэ зэхэтым адэкIоягъ. Ащ Эверест къыкIэлъыкIуагъ. ЧIыгум анахь къушъхьэ лъагэу тетым дэкIуаи, тыгъэр зэрэкъо­хьажьырэр щилъэгъугъ. Анахь зэхэшIэ кIуачIэхэр а уахътэм Фатимэ ыушэтыгъэх.
— Джащ фэдэу метрэ 6165-рэ зилъэгэгъэ Айлендпик къу­шъхьэу Неаполь щыIэм, Джомолунгмэ икъушъхьэу Чугунг Ри метрэ 5800-рэ хъурэм са­дэкIоягъ. СыкъызэкIожьым сигу­хэлъ сыфэбэнэным сызэрэ­фэ­хьазырыр къызгурыIуагъ. Гульнара Чекоевам ионлайн-курсхэр апэ скIугъэх. Ащ гу къыс­лъитагъ. ЦIэмэз (Новороссийскэ) тыщызэIукIэнэу сыкъыригъэблэгъагъ. НэIуасэ тызызэфэ­хъум ыуж Iоф зэдэтшIэнэу итхъу­хьагъ, — къеIуатэ ­Фатимэ.
Чекоевам и Академиеу Владикавказ дэтым Фатимэ рагъэ­блэгъагъ. Илъэс пчъагъэхэм зыкIэхъопсыщтыгъэр ащ къыщыдэхъугъ. Ыныбжь емылъы­тыгъэу Фатимэ зэнэкъокъухэм ахи­­гъэлэжьэнэу IэпэIасэм унашъо ышIыгъ. Джащ фэдэу парикмахер искусствэмкIэ, макияжымкIэ, Iэбжъэнэ шIынымкIэ 2023-рэ илъэсым шэкIогъум Шъачэ щыкIогъэ зэнэкъокъум Фатимэ хэлэжьэнэу хъугъэ. Къэ­ралыгъо 22-мэ къарыкIыгъэ IэпэIэсэ нэ­бгырэ минитIу ащ къекIолIэ­гъагъ.
— Къэралыгъом урилIыкIоу мыщ фэдэ зэнэкъокъум ухэлэ­жьэныр насыпыгъэшху ыкIи гъэ­хъэгъэ ин, — хегъэунэфыкIы Фа­тимэ. — СэркIэ ар апэрэ дунэе зэнэкъокъоу хъугъэ. Лъэ­шэу сыгумэкIыщтыгъ. Пшъэ­дэ­кIыжьыр зэрэиныр зэхасшIэщтыгъ. А зы уахътэм парикмахери 180-рэ пчэгум зэдитыгъ. Зэнэкъокъухэр шэпхъэ анахь лъагэмэ адиштэу зэхэщэгъэнхэр зишIушIагъэр Шъачэ щыщэу, мы Iофтхьабзэм тIогъогогъо дышъэ медаль къыщызыхьыгъэу, дэхагъэм и Дунэе Академие зэхэзыщагъэу Георгий Кот.
Урысыем иIэпэIэсэ 22-мэ ахэтэу, къэралыгъо зэфэшъхьаф­хэм къарыкIыгъэ парикмахер­хэм аготэу, Фатимэ зэнэкъо­къум хэлэжьагъ, шIэныгъэ гъэ­нэфагъэхэр зэригъэгъоты­гъэх, джы пшъэрылъыкIэхэр зыфегъэуцужьых. Творческэ хэхъоныгъэ пшIыным пае укъэ­мыуцоу ыпэкIэ улъыкIотэн фае. Арышъ, ыкъо-чемпион фэдэу, ныр гъэхъэгъакIэхэм афэкIоным фэхьазыр.
Ныбэ Анзор.
Сурэтхэр: Фатима Игольниковам ихъарзынэщ.