Урысые Федерацием и Правительствэ зэхэсыгъоу иIагъэм 2024-рэ илъэсымкIэ ыкIи 2025-рэ, 2026-рэ илъэсхэм ячэзыу пIа­лъэкIэ бюджетым ехьылIэгъэ законым, хэбзэIахьхэмкIэ ыкIи бюджетымкIэ Кодексхэм гъэтэрэзыжьынхэр афэшIы­гъэн­хэм афэгъэхьыгъэ законопроект­хэу Урысыем финансхэмкIэ и Министерствэ къахилъхьагъэ­хэм къащыдыригъэштагъ.

Ахэр зытегъэпсыхьагъэхэр цIыф къы­зэрыкIохэми, бизнесменхэми яхахъохэм хэбзэIахь зэратыралъхьэрэ шIыкIэм зэхъокIыныгъэхэр фэшIыгъэнхэр ары. Гъэтэрэзыжьынхэм къазэращыдэлъы­тагъэмкIэ, цIыфхэм яхахъохэм хэбзэ­Iахьэу атыралъхьэрэр зыфэдизыгъэм (процент 13-м) тетэу къэнэжьыщт. Ау федэшхо зиIэхэм яхахъо диштэу хэбзэ­Iахьыр атызэ ашIыщт. Ар нахьыбэ къэс хэбзэIахьри нахьыбэщт.
— Законопроектхэм гъэтэрэзыжьынхэр афэтшIыхэ зэхъум, Къэралыгъо Ду­мэм игъо ылъэгъугъэхэр къыдэтлъытагъэх. Мыщ фэдэ законопроектхэр заштэхэкIэ, мы илъэси 6 благъэм хэ­бзэIахьхэм ятынкIэ цIыфхэми, бизнесменхэми, шъолъырхэми амал дэгъухэр яIэщтых, хэгъэгум иэкономики зыкъиIэтыщт, — къыIуагъ финансхэмкIэ министрэу Антон Силуановым.
Гъэтэрэзыжьынхэм къазэращыдэлъы­тагъэмкIэ, сомэ миллиони 2,4-м нэс ха­хъоу зиIэхэм (нэмыкIэу къэпIон хъумэ, мазэм сомэ мин 200 къызIэкIахьэхэрэм) хэбзэIахьэу атыщтыр зэрэпроцент пшIыкIущыгъэу къэнэжьыщт. Илъэсым къыкIоцI сомэ миллиони 2,4-м къыщегъэ­жьагъэу миллиони 5-м нэс къызIэкIа­хьэхэрэм ащ ипроцент 15, миллиони 5-м къыщегъэжьагъэу миллион 20-м нэс хахъоу зиIэхэм ащ ипроцент 18, сомэ миллион 20-м къыщегъэжьагъэу мил­лион 50-м нэс къызыхахъохэрэм — процент 20, сомэ миллион 50-м нахьыбэ къызыхахъохэрэм процент 22-рэ хэбзэIахьэу атыщтыр. Мазэм сомэ мин 250-рэ къэ­зылэжьырэм хахъоу иIэм тыралъхьэрэ хэбзэIахьым шIокIэу сомэ мин ныIэп ытын фаеу хъущтыр.
— ЗэхъокIыныгъэхэм къазэращыдэлъытагъэмкIэ, шэпхъакIэхэм атетэу хэ­бзэIахьхэр зыщатын фаеу хъущт чIыпIэ­хэри къыхэкIыщтых. Прогрессивнэ сис­темэр мы лъэныкъом щагъэфедэ зы­хъу­кIэ, экономикэм нахь зыкъиIэтыщт, социальнэ зыпкъитыныгъэри нахь пы­тэщт. ЕтIани къэIогъэн фае сабыитIу ыкIи ащ нахьыбэ зэрыс унагъохэм социальнэ вычетэу къаратыжьыщтми къы­зэрэхэ­хъощтыр, — къыIуагъ Урысые по­ли­тическэ партиеу «Единэ Россием» и Адыгэ шъолъыр къутамэ игъэцэкIэ­кIо комитет ипащэу АфэшIэгъо Рэмэзан.