Теуцожь районым иадминистрациерэ гъогурыкIоныр щы­нэгъончъэнымкIэ Къэралыгъо автоинспекциемрэ зэгъу­сэхэу цIыфхэм зэIу­кIэ афызэхащагъ, ар гъогум щынэ­гъончъэу щызекIогъэным фэгъэхьы­гъагъ.

Гъогухэм къатехъухьэ­хэрэ хъугъэ-шIагъэхэм кIэлэцIыкIухэр, кIэлэ Iэта­хъохэр ыкIи ныбжьыкIэхэр бэу зэрахэкIуадэхэрэм игумэкIыгъу ары зытегущыIагъэхэр.
КIэлэцIыкIу зыгъэпсэфыгъо мафэхэр къэсы­гъэх, ахэр мыхъо-мышIэ Iофхэм ахэмыфэнхэм, «сабый-водительхэр» гъо­гухэм къатемыхьанхэм яIофыгъохэм зыщатегущы­Iэгъэхэ зэхахьэр лъэпкъ культурэм и Гупчэу къуа­джэу Пэнэжьыкъуае дэтым щырагъэкIокIыгъ. Ащ хэлэжьагъэх общественностыр, Къэралыгъо ав­тоинспекцием, районым щыпсэурэ нахьыжъхэм ялIыкIохэр, динлэжьхэр, ныбжьыкIэхэр ыкIи кIэлэ­еджакIохэр.
Теуцожь районым иадминистрацие ипащэу УдыкIэко Адам гумэкIыгъор дэгъэзыжьыгъэнымкIэ анахьэу анаIэ зытырагъэ­тын фэе лъэныкъохэм къа­щыуцугъ.

Теуцожь районым федеральнэ гъогуитIу пхырэкIы: зыр — «М4-Дон», ятIонэрэр — «Инэм — Адыгэкъал — Бжъэды­гъухьабл». ГъогурыкIоным ишапхъэхэр зэраукъохэ­рэм ыкIи псынкIащэу зэ­рэзечъэхэрэм гъогу-транспорт хъугъэ-шIагъэхэр къакIэлъэкIох. Ащ фэшI УдыкIэко Адам Къэралыгъо автоинспекцием иIофышIэхэми общественностыми къяджагъ гъогу­рыкIоныр щынэгъончъэу щытыным епхыгъэ IофшIэныр агъэлъэшынэу.
Зэхахьэм къыщыгущыIагъэх районым инароднэ депутатхэм я Совет итхьа­матэу ПчыхьэлIыкъо Аюбэ, Къэралыгъо автоинспекци­ем и ГъэIорышIапIэ иIофы­шIэхэу, полицием иподполковникхэу Бзэ­джэ­жъыкъо Муратэрэ Алексей Чмы­ре­вымрэ, Адыгэ Хасэм итхьаматэу ЛIымыщэкъо Рэмазан, районым щыпсэу­рэ нахьыжъхэм я Совет итхьаматэу Хьабэ­хъу Джантэмыр, Iимамэу Абази Неджмедин, нэмыкIхэри.
Теуцожь районым пхырыкIырэ гъогухэм язытет, ешъуагъэхэу транспортыр зезыфэхэу къыхагъэщы­гъэхэм, гъогурыкIоным ишапхъэхэр зэраукъохэ­рэм зэхахьэм щатегущы­Iагъэх.
Авариехэр нахь гъэмэкIэгъэнхэм, гъогухэм щы­нэ­гъончъэу ащызекIонхэм афэгъэхьыгъэ предложениехэр ащ къыщахьыгъэх.
Джащ фэдэу полицейскэхэр ны-тыхэм къя­джагъэх ясабыйхэм нахь тэ­рэзэу алъыплъэнхэу. Зыныбжь имыкъугъэхэм алъэ­ныкъокIэ пшъэдэкIыжь зэрахьырэр, транспортыр араты зэрэмыхъущтыр араIуагъ.
Iофтхьабзэм икIэухым УдыкIэко Адам джыри зэ къэзэрэугъоигъэхэм къариIуагъ мы Iофым изэшIохын зэкIэми акIуачIэ рахьылIэн зэрэфаер.
Къэралыгъоь автоинспекцием и
ГъэIорышIапI