Урысыем и Следственнэ комитет Адыгэ РеспубликэмкIэ иследственнэ гъэIорышIа­пIэ иотделэу анахь мэхьанэшхо зэратырэ Iофхэм язэхэфын фэгъэзагъэм Уры­сые Федерацием и Уголовнэ кодекс ия 290-рэ статья ия 4-рэ Iахь къыдилъытэрэ бзэджэшIагъэ зэрихьагъэкIэ (УФ-м ишъолъыр къэралыгъо IэнатIэ щызыIыгъым къуа­лъхьэ къаIихыгъэ зыхъукIэ) зэрегуцафэхэрэм къыхэкIэу зэгъэшIужь хьыкумышIым уголовнэ Iоф къыфызэIуихыгъ. Урысыем и Следст­веннэ комитет и Тхьамат ары уголовнэ Iофыр къэзы­Iэтыгъэр.
Следствием зэригъэунэфыгъэмкIэ, водителым гъогузекIонымкIэ шапхъэхэр зэриукъуагъэхэм фэгъэхьыгъэ административнэ материалыр хьыкумышIым къы­IэкIэхьагъэу щытыгъ. Ащ хаплъэзэ ыгу къихьагъ шапхъэхэр зыукъуагъэм транспортыр ыгъэIорышIэн фимы­тэу ымышIыным пае къолъхьэ ин къыIихынэу. Хэбзэгъэуцугъэу щыIэм къызэ­рэдилъытэрэмкIэ, тазырэу сомэ мини 5 е транспортыр мэзи 4-м къыщегъэжьагъэу мэзи 6-м нэс ыгъэIорышIэн фимытэу ашIы. Хьыкумы­шIым транспортыр ыгъэ­IорышIэн фитэу, ау сомэ мин 30 къыритын фаеу зэрэхъущтыр икабинет чIищи 2023-рэ илъэсым гъэтхапэм и 29-м гуригъэIогъагъ.
Ащ нэужым Урысыем и ФСБ и ГъэIорышIапIэу ­
Адыгэ Республикэм щыIэм иоперативнэ IофышIэхэм хэбзэнчъэ зекIуакIэу хьыкумышIым зэрихьагъэм гъунэ фашIыгъ. УФ-м ихьыкумышIхэм я Апшъэрэ кол­легие унашъо ышIыгъ уголовнэ Iоф а хьыкумышIым къыфызэIухыгъэнэу.
Непэ ехъулIэу зэгъэшIужь хьыкумышIым иполномо­чиехэр зэпыугъэх отстав-
кэм ар зэрэкIуагъэм къы­хэкIэу.
Следовательхэм Iэубы­тыпIэхэр къаугъоих ыкIи уголовнэ IофымкIэ мэхьанэ зиIэ лъэныкъохэр агъэунэфых. Уголовнэ Iофым изэ­хэфын лъэкIуатэ.