ПэIудзыгъэ шIыкIэм тетэу гъэпцIагъэ зыхэлъ бзэджэшIагъэ къыдызэрахьагъэу Адыгэкъалэ щыщ бзылъфыгъэу илъэс 30 зыныбжьым Тэхъутэмыкъое район полицием идежурнэ часть зы­къыфигъэзагъ.

Хъулъфыгъэм гъэпцIагъэкIэ ахъщэ шIуатыгъуным фэшI бзэджашIэхэм бэшIагъэу агъэфедэрэ шIыкIэу цIыф зэфэшъхьафхэм ацIэкIэ телефонымкIэ фытеуагъэх.
Апэрэ гъэпцIакIом финанс учреж­дением иIофышIэу ыIозэ хъулъфы­гъэм и СИМ-картэу ымыгъэфедэщтыгъэм къинэгъэ ахъщэр исчет ригъэхьанэу риIуагъ. ГъэпцIакIом цыхьэ фишIи, къыриIорэр хъулъфыгъэм ыгъэцэ­кIагъ.
Ащ ыуж хъулъфыгъэм нэмыкI гъэп­цIакIор къыфытеуагъ. Мыщ ыпэкIэ къыдэгущыIагъэр гъэпцIакIоу зэрэщытыгъэр ышIошъ ыгъэхъугъ, ащ къы­хэкIэу исчет илъ ахъщэр рахыным ищынагъо щыIэу къыриIуагъ.
Банкым иIофышIэ къыдэгущыIэу хъулъфыгъэм ышIошъ хъуи банкым чIыфэу сомэ мин 790-рэ къыIихыгъ. Мы пчъагъэм игъусэу ежь икартэ илъыгъэ сомэ мин 280-р «щынэ­гъончъэ» счетым ригъэхьагъ.
Ыужми гъэпцIакIохэр къыфытеохи, джыри банкым чIыфэ къаIихынэу къызыраIор ары хъулъфыгъэр зэрагъэпцIагъэр къызыгурыIуагъэр.
Ащ къыхэкIэу хъулъфыгъэм зэрарэу рагъэшIыгъэр сомэ миллионым ехъу. Мы уахътэм УФ-м хэгъэгу кIоцI Iоф­хэмкIэ и Министерствэ иотделэу Тэхъутэмыкъое районым щыIэм уго­ловнэ Iоф къызэIуихыгъ.
АР-м хэгъэгу кIоцI IофхэмкIэ и Министерствэ
ипресс-къулыкъу