Адыгэ Республикэм и Къэралыгъо филармоние тыгъуасэ щыкIогъэ зэIукIэр зыфэгъэхьыгъагъэр социальнэ IофышIэм и Маф.

Ащ рагъэблэгъагъэх къулыкъум иIофышIэ­хэр ыкIи иветеранхэр. ПстэумкIи нэбгырэ мини 3-м ехъумэ респуб­ликэмкIэ социальнэ ухъумэныгъэм исистемэ Iоф щашIэ.
Социальнэ IофышIэхэм афэгушIонхэу къэкIуагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, ащ игуадзэу, Урысыем и ЛIыхъужъэу Цэй Эдуард, АР-м финансхэмкIэ иминистрэу Виктор Орловыр, Адыгэ Республикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч, АР-м и Парламент икомитет итхьаматэу На­талья Широковар, Адыгэ Республикэм иминис­трэхэм я Кабинет хэтхэр, депутатхэр, муниципальнэ образованиехэмрэ общес­твеннэ объединениехэмрэ ялIыкIохэр.
ЗэIукIэр рагъэжьэным ыпэкIэ Ады­геим IофшIэнымрэ социальнэ хэхъоныгъэ­м­рэкIэ и Министерствэ къепхыгъэ учреж­дениехэм яэкспозицие зыщагъэгъозэн амал зэкIэми яIагъ.
Адыгеим и ЛIышъхьэу КъумпIыл Мурат ыцIэкIэ Iофтхьабзэм хэлажьэхэрэм шIуфэс къарихыгъ В. Орловым. Ащ къызэрэхигъэщыгъэмкIэ, социальнэ IофышIэхэр ренэу ягъусэх IэпыIэгъу, гуфэбэныгъэ зищыкIэгъэ цIыфхэм. Къи­ныгъохэр щагъэзыенхэмкIэ ахэм яшIогъэшхо къагъакIо.
«Iофэу шъузфэгъэзагъэм шъузэрэфэшъыпкъэм, гуетыныгъэ зэрэшъухэлъым апае тышъуфэраз. Анахьэу тынаIэ зытедгъэтырэр унэгъо ныбжьыкIэхэм, кIэ­лэцIыкIухэм, пенсионерхэм, сэкъатныгъэ зиIэхэм — социальнэ фэIо-фашIэхэр анахь зищыкIэгъэ шъыпкъэу щытхэм IэпыIэгъу ятыгъэныр ары. Хэгъэгум ишъолъырыкIэхэм зышъхьэ къарызыхыжьыгъэхэм Iоф адэшIэгъэным тисо­циальнэ IофышIэхэр хэлажьэх. Мэхьанэшхо зиIэ лъэныкъом — дзэкъулыкъу­шIэхэм, хэушъхьафыкIыгъэ дзэ операцием иветеранхэм, хэкIодагъэхэм яуна­гъохэм IэпыIэгъу ятыгъэным тынаIэ нахь лъэшэу джыри тедгъэтыщт»,— къы­щеIо АР-м и ЛIышъхьэ иджэпсалъэ.
В. Нарожнэр къызэгущыIэм хигъэунэфыкIыгъ социальнэ IофышIэхэм агъэцэкIэрэ Iофым мэхьанэшхо зэриIэр ыкIи япшъэрылъхэр, анахьэу карантиным илъэхъан, агъэцакIэхэ зыхъукIэ пшъэ­дэкIыжьышхо зэрахьырэр икъоу зэрэзэхашIэрэм пае зэрафэразэр къыIуагъ.
— 2001-рэ илъэсым мэкъуогъум и 8-м къыщыублагъэу социальнэ IофышIэм и Мафэ хэтэгъэунэфыкIы. ЩыIэныгъэм чIыпIэ къин ригъэуцогъэ нэбгырэ мин пчъагъэмэ: зыныбжь хэкIотагъэхэм, сэкъатхэм, сабыибэ ыкIи гъот макIэ зиIэхэм, зянэ е зятэ зышъхьарымытыжьхэм, нэмыкIхэми шъуиIэпыIэгъу, шъуигукIэгъу зэхашIэ, ар нафэ къашIы мафэ къэс фэIо-фашIэу афэжъугъэцакIэрэм, — къыIуагъ ­Мырзэ Джанбэч.
Социальнэ учреждениехэм яIофышIэ заулэмэ АР-м и ЛIышъхьэ ирэзэныгъэ тхылъхэр, АР-м и Къэралыгъо Совет —Хасэм ищытхъу ыкIи ирэзэныгъэ тхылъхэр, джащ фэдэу АР-м IофшIэнымрэ социальнэ хэхъоныгъэмрэкIэ и Министерствэ ищытхъу тхылъхэр аратыжьыгъэх.
«Социальнэ IофышIэ анахь дэгъу» зыфиIорэ зэнэкъокъур апэрэу Адыгеим щызэхащагъ. Ащ текIоныгъэ къыщыдэзыхыгъэхэм шIухьафтынхэр зэхахьэм щаратыжьыгъэх. Социальнэ IофышIэ анахь дэгъоу алъытагъ ыкIи шIухьафтынэу сомэ мини 10 фагъэшъошагъ Кощ­хьэблэ районым ит псэупIэу Натырбыем щыпсэурэ Наталья Харламовам.
Iофтхьабзэм икIэухым искусствэм илIыкIохэм концерт къатыгъ.
КIАРЭ Фатим.
Сурэтыр: Iэшъынэ Аслъан.