Урысые Федерацием и Президент и Указ диштэу 2001-рэ илъэсым къыщегъэжьагъэу социальнэ IофышIэм и Мафэ мэлылъфэгъум и 8-м илъэс къэс тихэгъэгу щыхагъэунэфыкIы.
Къэралыгъомрэ обществэмрэ анаIэ зытырагъэтынэу зытефэрэ цIыфхэм IэпыIэгъу афэхъухэрэм ясэнэхьат епхыгъэ мэфэкIымкIэ сафэгушIо.
IофшIэнымкIэ ыкIи цIыфхэр социальнэу ухъумэгъэнхэмкIэ республикэ къулыкъухэм нэбгырэ мини 3 фэдиз ащэлажьэ. Ахэр - АР-м IофшIэнымрэ социальнэ хэхъоныгъэмрэкIэ и Министерствэ, Урысыем ипенсионнэ ыкIи исоциальнэ Фонд АР-мкIэ икъутамэ, медико-социальнэ экспертизэмкIэ Бюро шъхьаIэм, IофшIэнымкIэ Къэралыгъо инспекцием, Адыгэ Республикэм исхэм IофшIэн къафэзыгъотырэ къэралыгъо къулыкъум и ГъэIорышIапIэ яспециалистых. Республикэм ис ящэнэрэ нэбгырэ пэпчъ – заомрэ IофшIэнымрэ яветеранхэм, шъхьэзэкъо пенсионерхэм, ны-тыхэр зышъхьарымытыжь кIэлэцIыкIухэм, гъот макIэ, сэ­­къа­т­­­­­ныгъэ зиIэхэм, сабыибэ зэрыс унагъохэм, хэушъхьафыкIыгъэ дзэ операци­ем хэлажьэхэрэм ыкIи ахэм яунагъохэм арысхэм, IофшIэн зимыIэхэм ыкIи нэ­мыкI­хэм яфэIо-фашIэхэм ягъэцэкIэн ыуж итых.
Мы аужырэ илъэсхэм Адыгэ Республикэм исоциальнэ къулыкъухэм гъэхъэгъэшIухэр ашIыгъэх. Демографие Iофхэр нахьышIу шIыгъэнхэм, зыныбжь хэкIотагъэхэм ящыIэкIэ-псэукIэ зыкъегъэIэтыгъэным, ахэр социальнэу ухъумэгъэнхэм, кIэлэцIыкIухэр, зипсауныгъэ пыч фэхъугъэхэр зэрыс унагъохэм яIофхэм язытет нахьышIу шIыгъэным атегъэпсыхьэгъэ шэпхъэ актхэр тиреспубликэ щаштагъэх.
Социальнэ фэIо-фашIэхэр зыгъэцэкIэрэ къулыкъухэм непэ зэхъокIыныгъэхэр зыщафэхъурэ лъэхъаным IофшIэкIэ амалыкIэхэр къызфагъэфедэх, социальнэ фэIо-фашIэхэр цIыфхэм нахьышIоу афызэхэщэгъэнхэмкIэ бэ зэшIуахырэр.
Социальнэ IофышIэм исэнэхьат къызIэкIэзыгъахьэ зышIоигъохэм илъэс къэси къахэхъо. Мы аужырэ уахътэм чIыпIэ къинхэм шъуарыфэу бэрэ къыхэкIыгъэми, щэIагъэ къызыхэжъугъафэзэ, шъукIуачIэ къызэрихьэу Iоф шъушIагъэ.
Шъузыфэгъэзэгъэ Iофым шъузэрэфэшъыпкъэм, гукIэгъушхо зэрэшъухэлъым, зыщикIагъэхэм IэпыIэгъу шъуафэхъуным, шъигуфэбэныгъэ адэжъугощыным шъу­зэрафэхьазырым афэшI сызэрэшъуфэразэр къэсэIо. Сыдигъуи шъуиIэпэIэсэныгъэ дакIоу цIыфыгъэ зэрэшъухэлъыщтым, шъузэрэзышъхьамысыжьыщтым сицыхьэ телъ.
Социальнэ IофышIэхэм псауныгъэ пытэ, щыIэкIэ-псэукIэ дэгъу яIэнэу, гуфэбэныгъэ щымыкIэнхэу, тиреспубликэ исхэм апае гъэхъэгъакIэхэр яIофшIэн щашIынэу мы мэфэкI мафэм сафэлъаIо!
Адыгэ Республикэм IофшIэнымрэ социальнэ хэхъоныгъэмрэкIэ ­иминистрэу Мырзэ Джанбэч