Мыщ фэдэ цIэ зиIэ пчыхьэзэхахьэу Адыгэ Республикэм и Къэралыгъо академическэ лъэпкъ ансамблэу «Налмэсым» имэфэкI фэгъэхьыгъэр непэ Мыекъуапэ щыкIощт. Купыр зызэхащагъэр илъэс 88-рэ зэрэхъугъэр хегъэунэфыкIы.

«Налмэсым» адыгэ къашъор дахэу къышIызэ лъэпкъыр егъэгушIо, гъэхъагъэу ышIырэмкIэ Адыгеим ыцIэ лъагэу дунаим щеIэты. Ар хэгъэгум ымакъ, республикэм икультурэ инамыс. Сэнаущыгъэ зыхэлъ артист пчъагъэхэм ящыIэныгъэ гъогу ансамблэм рапхыгъ.
1936-рэ илъэсым ар зэхащагъ, илъэс зэкIэлъыкIохэм зыпкъ иуцуагъ, тихэ­гъэгу имызакъоу, дунаим щызэлъашIагъ. Непэ «Налмэсыр» Урысыем, IэкIыб хэгъэгу­хэм яконцерт къэтыпIэ анахь дэгъухэм къащэшъо, ащкIэ лъэпкъхэр зэфещэх, щытхъур Адыгеим къыфехьы.
МэфэкIым ехъулIэу «Налмэсым» къэ­гъэлъэгъонэу къыгъэхьазырыгъэм тыщигъэгъозагъ купым ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ шъолъыр язаслуженнэ артистэу, Адыгеим инароднэ артистэу Хъоджэе Аслъан.
— Ижъырэ къашъохэм къащегъэжьагъэу джырэ уахътэм нэсэу ансамблэм къышIыхэрэр зэхэпхъагъэхэу къэдгъэлъэгъощт. Къашъоу «Ислъамыер», «Лъэ­пэрысэр», «ЗэфакIор», «Уджыр» лъэпкъ шэн-хабзэм инэпэеплъэу тикъэгъэлъэгъон хэмыкIэу хэтых. КъашъохэмкIэ лъэпкъым икультурэ къыкIугъэ гъогур къэтэгъэлъагъо. Адыгэхэм лIэшIэгъу­бэм къапкъырыкIыгъэр непэрэ мафэм игъа­шIэ щыпхырэтэщы. Анахь Iоф­тхьэбзэ инэу тапэкIэ илъыр Москва, Кремлым, тикъэгъэлъэгъонэу щыкIощтым изыфэгъэхьазырын. Лъэпкъ искусствэр хэгъэ­гум нахьышIоу щашIэным фэшI тапэкIи нэмыкI концертхэр зэхэтщэщтых. Бжы­хьэм Урысыем ишъолъыр 15-мэ тащы­Iэщт. Сыбыр тынэсыщт. Къашъохэм ягъэ­хьазырын игъэкIотыгъэу тыдэлажьэ. АР-м и ЛIышъхьэу КъумпIыл Мурат, Правительствэм, Парламентым гущыIэ къодыеу щымытэу гукIэ тафэраз, «тхьа­шъуегъэпсэу» ятэIожьы, яIэпыIэгъу тэр­кIэ лъэпIэ дэд, — къыIуагъ Хъоджэе Аслъан.
«Налмэсым» IофшIэгъэ дэгъухэмкIэ цIыфхэр егъэгушIо. Культурэм, искусствэм цIыфыр апIу, щыIэныгъэм фагъасэ. «ШIуфэс къашъор», «Пшъэшъэ тхьаматэм икъашъу» узIэпащэу гъэпсыгъэх. «Бжъэ­дыгъу зэфакIу» зыфиIорэм артистхэм лъэпкъ культурэм ибаиныгъэ къыщырагъэлъэгъукIы. Купым тыгъэр къышъхьащытэу игъашIэ лъегъэкIуатэ.
«Налмэсым» икъашъохэм искусствэм ибаиныгъэ къыраIотыкIы, аIэты, лъэпкъ зэфэшъхьафхэм алъагъэIэсы.
Лъэпшъыкъо Фатим.