Балли 100 изыгъэкъугъэ ныбжьыкIэ Адыгеим иI. АР-м иат­тестационнэ къулыкъу къызэритырэмкIэ, жъоныгъуакIэм и 23-м рекIокIыгъэ зыкI къэралыгъо ушэтынымкIэ зэфэхьысыжьхэр къэнэфэ­гъахэх.

Шъугу къэдгъэкIыжьын, мы мафэм я 11-рэ классыр къэзыухыхэрэм литературэр, химиер ыкIи географиер атыгъэх. Химиер нэбгырэ 300-мэ къыхахыгъ. Ахэм ащыщ ныбжьыкIэу Мыекъуапэ илицееу N 19-м къычIэкIырэм балли 100 къыхьыгъ. Ушэтыным пхырыкIынхэмкIэ анахь макIэу 36-рэ рагъэкъун фэягъ.
АдыгеимкIэ я 11-рэ классыр къэзыухырэ нэбгырэ 90-мэ атыгъ, 3-мэ балл 90-рэ къалэжьыгъ.
ГеографиемкIэ ныбжьыкIэ 72-мэ заушэтыгъ. КъэгъэлъэгъонышIухэр нэбгырищымэ яI, балл 90-м ехъу къахьыгъ. Шъугу къэдгъэкIыжьын, ушэтынхэмкIэ зэфэхьысыжьхэр еджапIэхэм ыкIи хъытыу нэкIубгъоу «chechege.rustest.ru» зыфиIорэм ащызэжъугъэшIэн шъулъэ­кIыщт.
Непэрэ неущрэ я 11-рэ классыр къэ­зыухырэ еджакIохэм зичэзыу зыкI къэ­ралыгъо ушэтыныр акIущт. IэкIыб къэралыгъуабзэхэмкIэ (инджылызыбзэр, испаныбзэр, нэмыцыбзэр) жэрыIо Iа­хьыр, информатикэр атыщтых.
Мэкъуогъум и 11-м биологиер ыкIи IэкIыб къэралыгъуабзэхэр, джы тхэн IофшIэнхэр, къапыщылъых.
Анцокъо Ирин.