«Къэплъфыгъэм уешхыжьы» аIо цIыфхэм, ау Адыгэ­къалэ щыпсэущтыгъэ пшъэшъэжъыер къэзылъфыгъэмэ «ашхыжьыгъ». Илъэ­сищ зыныбжь пшъэшъэжъые цIыкIоу тым IэкIэукIагъэу зэгуцафэхэрэм исурэт зыплъэгъукIэ нэмыкI гущыIэ къэгъотыгъуай.

Мыщ епхыгъэу Адыгеим ихэбзэухъумакIохэм уголовнэ lоф къызэlуа­хыгъ.
Следствием зэригъэунэфыгъэмкlэ, жъоныгъуакlэм и 30-м Адыгэкъалэ щы­псэурэ хъулъфыгъэр иунэ исэу илъэси 3 зыныбжь исабый утынхэр рихыгъэх ыкlи ищыlэныгъэ къэзы­гъэуцугъэ шъобж хьылъэ­хэр ыпкъынэ-лынэ тырищагъэх.
Къэбарэу щыlэмкlэ, мы илъэсым игъэтхапэ къы­ще­гъэжьагъэу пшъэшъэ­жъыер ны-тыхэм адэпсэу­щтыгъ. Ащ ыпэкlэ социальнэ унэм щапIугъ.
Хъулъфыгъэр аубытыгъ. УФ-м и УК ия 111-рэ статья ия 4-рэ Iахь къыдыхэлъытагъэу ар агъэмысэ. Зэхэфынхэр макlофэхэ хьапсым чlэсыщт.
Iофым ишъыпкъапIэ игъэунэфын хэбзэухъума­кIохэр джырэкIэ дэлажьэх, экспертизэхэр ашIых.
Урысыем иследственнэ комитет АдыгеимкIэ ислед­ственнэ ГъэIоры­шIапIэ тызэрэщигъэгъозагъэмкIэ, ным илъфыгъэ къызэримыухъумагъэм, ылъэгъузэ утынхэр зэрэты­раригъэщагъэхэм афэшI хэбзэгъэуцугъэм къыди­лъытэу ищыкIэгъэ уасэ фашIыщт. Джащ фэдэу, профилактикэмкIэ къулыкъухэм сабыир зыхэтыгъэ хьазабыр зэрамылъэгъугъэр зэхафыщт.
Хъытыу нэкIубгъохэм пшъэшъэжъыем ебэны­гъэ­хэу къарыхьэгъэ къэбар­хэм шъыпкъагъэ зэрахэмылъыр следственнэ Гъэ­IорышIапIэм къеты.
Пшъэшъэжъыер тым зэ­рэIэкIэукIагъэмкIэ уголовнэ lофым изэхэфын макIо. УФ-м и Следственнэ комитет итхьаматэу Александр Бастрыкиным ежь ышъхьэкIэ ащ гъунэ лъефы.
Игъонэмыс хъугъэ сабый цIыкIум Тхьэм джэнэт лъапIэ къырет.
Анцокъо Ирин.