Псауныгъэр къэухъумэгъэным исистемэ нахьышIум ылъэныкъокIэ зэрэзэхъокIырэр непэ тинэрылъэгъу. ПсэолъакIэхэр къызэIуахых, медицинэ учреждениехэм гъэцэкIэжьынхэр ащэкIох, аужырэ шапхъэхэм адиштэу зэтырагъэпсыхьэх.

Адыгеим иIэзапIэ пэпчъ медицинэ фэIо-фашIэхэр зэрэщагъэцакIэрэм идэгъугъэ зыкъызэриIэтыщтым зэкIэ фэбанэ. Непэ зигугъу къэтшIыщт Лъэустэнджэл Мариет Казбек ыпхъур илъэс 50 хъугъэу иIофшIэн дэгъоу егъэцакIэ, физиотерапевт, IофшIэным иветеран.
Лъэустэнджэл Мариет жъоныгъуакIэм и 1-м 1953-рэ илъэсым къуаджэу Хьатыгъужъыкъуае къыщыхъугъ. Тыжьын медалькIэ гурыт еджапIэр къыухыгъ, нэужым Краснодар дэт медицинэ институтым чIэхьагъ. Апшъэрэ гъэсэныгъэ зызэрегъэгъотым ыуж ихэку къыгъэзэжьыгъ. ИсэнэхьаткIэ илъэсныкъорэ Iоф ышIагъэу Украинэм агъэкIуагъ. Мариет инасып къыкъокIи, Владимир Андреевым дэкIуагъ, якIалэу Лъэустэнджэл Руслъан зэдапIугъ ыкIи ылъакъо пытэу тырагъэуцуагъ. Непэ ар партиеу «ЦIыфыкIэхэр» зыфиIорэм АдыгеимкIэ ишъолъыр къутамэ ипащ. КъорылъфитIоу Лейлэрэ Алиярэ апIу. Ащ ыужкIэ къалэу Шъачэ санаторием Iутэу, IэзэпIэ-диагностическэ отделением ипащэу 1993-рэ илъэсым нэс щылэжьагъ. А илъэс къин­хэм санаториехэр зэфашIыщтыгъэх ыкIи ащ къыхэкIэу ихэку къыгъэзэжьыгъ. 2015-рэ илъэсым щыублагъэу Мыекъопэ къэлэ поликлиникэу N 1-м сымаджэхэм япсауныгъэ зыщызэтырагъэуцожьырэм иотделение ипащэу мэлажьэ. Мариет илъэс 70-рэ ыныбжь, ащ щыщэу лIэшIэгъуныкъор цIыфхэм ягъэхъужьын фигъэ­хьыгъ. Игъэхъагъэхэм къакIэлъыкIоу щытхъу тхылъыбэ къыфагъэшъо­шагъ.
— Сымаджэм ищыкIэгъэ медицинэ IэпыIэгъу едгъэгъотыныр типшъэрылъ шъхьаI, — еIо Мариет. — Мафэм къыкIоцI нэбгыри 100-м нэс къытэуалIэ. Ахэм тишIуагъэ ятэгъэкIы. Аужырэ шапхъэхэм адиштэрэ оборудование тIэкIэлъ, шIэныгъэ куухэр зиIэ специалистхэр мыщ щызэхэугъоягъэх. Сэкъатныгъэ зиIэ цIыфхэмкIэ медицинэ учреждениер Iэрыфэгъу, курэжъыем исхэм апае чIэхьапIи иI.
Сымаджэр Iэзэгъу уц закъокIэ бгъэ­хъужьын плъэкIыщтэп. ЦIыфым уеIэзэным бэ къыдилъытэрэр: шIэныгъэ куур, гукIэгъур, жэбзэ дахэр, сэмэркъэу гохьыр. Ащ фэшъхьафэу физиоIэзэныри дихьын фае. Зипсауныгъэ зэщыкъогъэ цIыфым физиотерапевтыр аппаратхэмкIэ еIазэ, ищыкIагъэмэ массажым егъа­кIо, амалэу щыIэр зэкIэ рехьылIэ.
— Псауныгъэм икъэухъумэн фэгъэзэгъэ IэзапIэхэм зыкIыныгъэ тиIэу тызэдэлажьэ. Сымаджэр зыгъэгумэкIырэм елъытыгъэу ищыкIэгъэ врачым дэжь тэгъа­кIо. ТиIофшIэн адрэхэм атекIы, сыда пIомэ апэрэ физиоIэпыIэ­гъоу цIыфым ыгъотырэм бэ елъы­тыгъэр, ащкIэ пшъэдэ­кIыжь ин тэхьы. Уврач хъумэ, зэпымыоу уишIэныгъэхэм ахэбгъэхъон фае, сыныбжь хэкIо­тагъ нахь мышIэми, ащ ренэу сэри сыпылъ. Мы уахътэм физиотерапием ылъэныкъокIэ сишIэныгъэ хэсэгъахъо, амалыкIэхэр сэгъэфедэ. Непэрэ мафэм удиштэнымкIэ ныбжьыр пэрыохъу къыпфэхъунэу щытэп, — еIо Мариет.
IазапIэм Iутхэм шIэныгъэу яIэр яIэубытыпIэу сымаджэхэр агъэхъужьых. Мариет иIофшIэгъухэм шъхьэкIафэ къы­фашIы, ар ящысэтехыпI.
Лъэпшъыкъо Фатим.
Сурэтыр авторым ий.