КIэлэцIыкIухэм якъэухъумэн и Дунэе мафэ тефэу Адыгеим и Къэралыгъо автоинспекторхэм гъэсэныгъэ тедзэм игупчэ иIофышIэхэр ягъусэхэу Iофтхьэбзэ чэф ныбжьыкIэ цIыкIухэм ыкIи ахэм янэ-ятэхэм афызэхащагъ. Ащ нэбгырэ 200-м ехъу хэлэ­жьагъ.
КIэлэцIыкIу гъогу фыкъоныгъэ­хэр дэгъэзыжьыгъэнхэм фэIоры­шIэрэ федеральнэ проектэу «Щы­нэгъончъагъэм илабораторие» зыфиIорэм игъэцэкIэн къыдыхэлъытагъэу техническэу ыкIи мето­дическэу зэтегъэпсыхьэгъэ автобус культурэм и Унэу «Гигантым» къыщыуцугъагъ. КIэлэцIыкIухэри, Iэтахъохэри джэгукIэ шъуашэм илъэу гъогурыкIоным ишапхъэхэм фырагъэджагъэх, ыпэкIэ ашIэщтыгъэ шIэныгъэхэр кIаджыкIы­жьы­гъэх.
Ахэр лъэсрыкIохэу, машинэм адисхэ е лъэкъуитIу зыкIэт транспорт амалыр агъэфедэ зыхъукIэ зэрэзекIонхэ фаер нэрылъэгъу афашIыгъ. КIэлэегъаджэхэр ыкIи инспекторхэр ягъусэхэу ныбжьыкIэ цIыкIухэр егъэджэпIэ гъогу зэпырыкIыпIэм щаугъоигъэх. А чIыпIэм электрическэ нэфрыгъуа­зэхэр ыкIи гъогу тамыгъэхэр атырагъэуцуагъэх. КIэлэцIыкIухэм водительхэу ыкIи лъэсрыкIохэу заушэтын амал яIагъ. Кушъхьэфачъэр зезыфэрэр макет шIы­гъэу шапхъэхэр зэрагъэцэкIэнхэ фаери арагъэлъэгъугъ. МэфэкI шъып­къэ афэхъугъэр патруль автомобилым исхэу ахэм сурэтхэр зытырахын амал зэряIагъэр ары.
ГъогурыкIоным ишапхъэхэр дэгъоу къэзыгъэлъэгъогъэ сабый­хэм зэхэщакIохэм къагъэхьазырыгъэ шIухьафтынхэр аратыгъэх.