Студентхэм ыкIи кIэлэеджакIохэм еджэныр аухэу гъэмафэм къызатIупщыхэкIэ зызэрагъэпсэфыщтым имыза­къоу Iоф ашIэн ыкIи ахъщэ къагъэхъэн алъэкIыщт.

АщкIэ амалышIоу щыт Урысые общественнэ организациеу «Урысыем истудент отрядхэр» зыфиIорэм и НыбжьыкIэ Адыгэ шъолъыр къутамэ. Илъэс еджэгъум къыхэфэрэ зыгъэпсэфыгъо уахътэм Iоф зышIэ зышIоигъо ныбжьыкIэ купхэр Урысые студент отрядым хэхьэх. Гъэ­мэфэ зыгъэпсэфыгъо уахътэр шIуагъэ хэлъэу зыгъэкIон зыгу хэлъ, Iоф ышIэныр къыхэзыхырэ, Iоф­тхьабзэхэм чанэу ахэлэжьэнхэу фэе студентхэр а отрядхэм зэрапхых.
Урысые студент отрядыр — тикъэралыгъо иныбжьыкIэ организацие анахь инхэм ащыщ, шъолъыр 72-мэ ащыпсэурэ ныбжьыкIэ мин 240-рэ фэдизмэ охътэ гъэнэфагъэкIэ IофшIэпIэ чIыпIэхэр арегъэгъоты, ащ нэмыкIэу граждан ыкIи патриотическэ пIуныгъэм фэIорышIэ, творчествэм ыкIи спортым ылъэныкъокIэ ныбжьыкIэхэм IэпэIэсэныгъэу аIэкIэ­лъым хегъахъо. 2004-рэ илъэсым къыщегъэ­жьагъэу Урысые общественнэ организациеу «Урысыем истудент отрядхэр» зыфиIорэм и НыбжьыкIэ Адыгэ шъо­лъыр къутамэ Iоф ешIэ.
Урысые студент отрядхэм пшъэрылъ шъхьаIэу агъэцакIэрэр охътэ гъэнэфагъэм ныбжьыкIэхэм IофшIэпIэ чIыпIэ къафэгъотыгъэныр ары. ПсэолъэшIыным, мэкъу-мэщым, кIэлэегъэджэным, нэ­мыкI лъэныкъохэмкIэ ахэм IофшIапIэхэр къа­раты. Мыщ фэдэ шIыкIэм ишIуагъэкIэ ныбжьыкIэхэм ахъщэ къазэраIэкIахьэрэм дакIоу IофшIэнымкIэ IэпэIэсэныгъэ гъэ­нэфагъэ зэрагъэгъоты, нэужым, еджэныр заухыкIэ, зыщылэжьэщтхэ чIыпIэр къы­хэхыгъошIу афэхъу.

АР-м ишъолъыр штаб ипащэу Ольга Борсук тызэрэщигъэгъозагъэмкIэ, рес­публикэм ит университетхэм, гурыт гъэсэныгъэ зыщызэрагъэгъотырэ еджапIэхэм Iоф адашIэ.
— Лъэныкъо зэфэшъхьафхэмкIэ гъэхъэгъэшIухэр зышIыхэрэ ныбжьыкIэхэр тиотряд щызэрэугъо­игъэх, — къытфе­Iуатэ Ольгэ. — ЗищыIэныгъэ нахьышIум ылъэныкъокIэ зэзыхъокIырэ, зыгъэпсэфыгъо уахътэу иIэр шIуагъэ хэлъэу зыгъэкIорэ студентхэр ары тикуп хэтхэр. Студентым ащ фэдэ уахътэр зэрифэшъуашэу ыгъэ­кIуагъэмэ, «целинар» ыкIугъэкIэ алъытэ ыкIи уцышъо кIако къыраты. Непэрэ мафэм ехъулIэу гъэмафэм IофшIэпIэ чIыпIэ зэрагъэгъотынэу фаехэу респуб­ликэм щыщ нэбгырэ 300 фэдизмэ штабым зыкъыфагъэзагъ. Ахэм ащыщэу 100-м IофшIапIэхэр къа­фагъотыгъэх.
Федеральнэ ахъщэу къатIупщырэмкIэ гурыт сэнэхьат языгъэгъотырэ еджапIэхэм зэзэгъыныгъэ адыряIэу студентхэр илъэс къэс рагъаджэх. Анахьэу Iоф зыдашIэрэр Мыекъопэ къэралыгъо гуманитар-техническэ колледжыр ары. Егъэджэнхэм ауж, шапхъэу пылъымкIэ, охътэ гъэнэфагъэм къыкIоцI студентхэм Iоф ашIэн фае. Гъэмафэм нахьыбэу Краснодар краим ичIыпIэ зэфэшъхьаф­хэм, хым Iоф къащашIэнэу макIох. Анахьэу пщэрыхьакIохэр, къэгъэнэжьа­кIохэр, барменхэр, хьакIэщхэм Iоф ащызышIэхэрэр ары къыхахыхэрэр.
— Анахь мэхьанэ зиIэ IофшIэнэу дгъэцакIэрэр студентхэм Iоф­шIэпIэ чIыпIэхэр къазэрафэдгъотырэр ары. Джащ фэдэу патриотическэ пIуныгъэм тынаIэ тетэгъэты. Ащ нэмыкIэу лъэныкъо зэфэшъхьафхэмкIэ егъэ­джэнхэр афызэхэтэщэх. Хэбзэгъэуцугъэм диштэу, студент отрядхэм ахэтхэм илъэсым зэ сэнэхьат тедзэ ыпкIэ хэмылъэу зэрагъэгъотын амал яI. IофшIэпIэ чIыпIэ къэзытыхэрэр нахь зыщыкIэрэ сэнэхьатхэр къыхэтэхых. Арэущтэу еджэгъэ студентхэм IофшIэн агъотыныр нахь IэшIэх къафэхъу, — еIо Ольгэ.
— НыбжьыкIэхэр зыдэкIощт, Iоф зыщашIэщт чIыпIэхэр къы­хэтхы зыхъукIэ, студентхэр гупсэфэу, зыщыпсэущтхэ чIыпIэр дэгъоу, ыпкIэ хэмылъэу къа­фэгъотыгъэным тыпылъ. Мы аужырэ илъэсым IофшIапIэ зыгъотыгъэ студентхэм япчъагъэ хэпшIыкIэу хэхъуагъ. Анахьэу Краснодар краим къыкIэлъэIух, сыда пIомэ Iоф зэрашIэщтым дакIоу шIуагъэ къытэу языгъэ­псэфыгъо уахътэ агъэкIон алъэ­кIы, — еIо тигущыIэгъу.
Студентым сэнэхьат шъхьаIэу зэригъэгъотырэм имызакъоу, ыгукIэ зыфэщэгъэ лъэныкъом ыпкIэ хэмылъэу зыфигъэсэн амал зэриIэм мэхьанэшхо иI. ГъэрекIо республикэмкIэ студент 250-рэ фэдиз рагъэджагъ. ДжырэкIэ анахь къыхахырэр «сервис» зыфаIорэ лъэныкъом щылэжьэнхэр ары, ахэм гурытымкIэ сомэ мин 60, вожатэхэм сомэ мин 30 фэдиз лэжьапкIэ къахьы. Ау ащ нэмыкIэу медицинэм, кIэлэегъэджэ сэнэхьатым япхыгъэуи Iоф ашIэ.

Илъэс къэс зыгъэпсэфыпIэ чIыпIэхэм Iоф ащызышIэрэ вожатэхэр рагъаджэх, ащ нэмыкIэу псэолъэшI ыкIи оперативнэ отрядхэр яIэх. «Черкесский десант» зыфиIорэ Iофтхьабзэм хахьэу кIэлэ­еджакIохэм мастер-классхэр, джэгукIэхэр, зэнэкъокъухэр афызэхащагъэх. Хэушъхьа­фыкIыгъэ дзэ операцием хэ­лажьэхэ­рэм апае пкъыгъо зэфэ­шъхьафхэр зэдашIыгъэх.
Урысые ныбжьыкIэ общественнэ организациеу «Урысые студент отрядхэр» зыфиIорэм и Адыгэ шъолъыр къутамэ 2015-рэ илъэсым къыщегъэжьагъэу ипащэх зэшъхьэгъусэхэу Ярославрэ Ольгэрэ. Ольгэ 2017-рэ илъэсым щыублагъэу шъолъыр штабым ипащ. Зэ­шъхьэ­гъусэхэр студент отрядым хэтхэм яшIэныгъэхэм зэрахагъэхъощтым, зэгурыIоныгъэ азыфагу илъэу шIуагъэ къэзыхьыщт Iофтхьабзэхэр зэрэзэхащэщтхэм ыуж итых. Лъэныкъо зэфэшъхьаф­хэмкIэ грантхэр къахьых, яIофшIэн хэхъоныгъэ рагъэшIы. Патриотическэ гъэсэныгъэми отрядым мэхьанэшхо реты, «Южный десант» зыфиIорэ акцием чанэу хэлажьэх.
Рустам Мыекъопэ къэралыгъо технологическэ университетым иятIонэрэ курс щеджэ. Урысые студент отрядхэм захэтыр илъэс хъущт. Ащ къызэрэтфиIотагъэмкIэ, купыр ыгукIэ пэблагъэ хъугъэ. Отрядхэм яшIуагъэкIэ зыгъэпсэфыгъо уахътэм Iоф ышIэн амал иI, илъэс еджэгъуми Iофтхьэбзэ зэфэшъхьафхэм ахэлэжьэн елъэкIы.
ТигущыIэгъу гъэмэфэ зыгъэпсэфы­гъом Iоф зыщишIэщтыр ыгъэнэфагъ. Геленджик дэт аквапаркым инструкторэу кIонэу зегъэхьазыры. ЫпэкIэ Iоф ышIэу къыхэкIыгъэп, ау ар зэрэфэгъэцэкIэщтым ицыхьэ телъ.
Урысые студент отрядхэм ахэтхэм еджэгъу уахътэр гъэшIэгъонэу, чэфэу, гум къинэжьынэу агъакIо. НыбжьыкIэ форумэу, слетэу зэхащэхэрэм, респуб­ликэм щырекIокIырэ Iофтхьабзэхэми ахэлажьэх.
Ольгэ къызэриIуагъэмкIэ, мыгъэ организациер зызэхащагъэр илъэс 65-рэ мэхъу. Ащ къыхэкIэу илъэсым къыкIоцI зиIофшIагъэкIэ къахэщыгъэ студент анахь чанхэр агъэнэфэщтых ыкIи студентхэм я Урысые Слетэу шэкIогъум Москва щыкIощтым хагъэлэжьэщтых.
КIАРЭ Фатим.
Сурэтхэр: шъолъыр штабым ихъарзынэщ .