ЦIыфымкIэ, ащ ипсауныгъэкIэ анахь мэхьа­нэшхо зиIэр чIыопсым тыфэсакъэу, ар къы-­
зэрэтыухъумэрэр ары. ГухэкIми, тэр-тэрэу зыдэтымышIэжьыхэу, жьи, пси, чIыгуи тэулъэгух, язытет зэщытэгъакъо.

Ащ къыхэкIэу, чIыопсымрэ цIы­фымрэ язэпхыныгъэ кIагъэтхъэу, мэкъуогъум и 5-р къытэшIэкIыгъэ чIыопсым и Дунэе мафэу хагъэу­нэфыкIы. Зылъы­плъэжьырэ нэбгырэ пэпчъ епIожьын имыщыкIагъэу чIыопсым икъэбзэныгъэ фэсакъы, зэрилъэкIэу ар еухъумэ. Ау ащ хэлъ-хэсым пымы­лъыхэу, зыщытIысырэ чIыпIэр зэхиушIоихьэмэ IукIыжьэу щыIэри макIэп. Шъыпкъэ, мэзыри къэгущыIэщтэп, псыхъори къызэтеуцоу мычъэжьэу щытыщтэп, ау ахэм лыеу мыхъущт дэзекIуакIэу цIыфыбэм афыряIэм иегъэшхо къэкIо. ХэкIыр ящагу дащызэ псы­хъохэм ахатакъо, ащ псым ичъа­пIэ зэпабзы. Мэзхэр пIонышъ, бэмэ ахэр ятIысыпIэ-гъэпсэфыпIэхэми, ямэшIо стафи къыIуамыхыжьэу къыханэ, сыд фэдизэу пIо зэпытыгъэми, нахьыбэм мыхъун зекIуакIэр пщыIэжьынэу зэрэщымытыр джыри зэхашIэрэп. Къэнэжьырэ закъор, мысэхэр зэфэдэу ахъщэкIэ гъэпщынэгъэнхэр ыкIи ащи къызимыубытхэкIэ, хьапс ателъхьэгъэныр ары.
Ары, ныбжьыкIэ волонтер-отрядхэм шэмбэт шIыхьафхэр зэ­хащэх, Мыекъуапэ къешIэкIыгъэ мэзхэр зэралъэкIэу агъэкъабзэх. Ау зым машинэр чъэзэ ишъхьангъупчъэ шхэфэ Iалъмэкъыр къыредзы, мэзым гухахъо хигъуатэу зыщызгъэпсэфыгъэми, псыхъожь къабзэр зыIузыщагъэми, яшIой къаштэжьынышъ, ратэкъужьыныр зэрапэсырэп. Джары Iэдэбэу, цIыфыгъэу, культурэу тхэлъыр, пстэури еджэгъэ закI, ау тхьамыкIэ кIэлъэшъу закIэх агукIэ.
Хэти пытэу тыгу итыубытэн фаер чIыопсым икъэбзэныгъэ — цIыфым ипсауныгъэу зэрэщытыр ары. Мэкъуогъум и 5-р, аукъодыеу къытэшIэкIыгъэ чIыопсым и Дунэе мафэу агъэнэфагъэп. Ини цIыкIуи тидунэе дахэ икъэбзэныгъэ ыгъэгумэкIхэу, ащ фэсакъынхэр япшъэрылъ шъхьаIэу зэрэщытыр мы мафэм кIегъэтхъы.

Мыщ ехъулIэу ублэпIэ, гурыт, сэнэхьат зэгъэгъотыпIэ еджапIэ­хэм къэбзэныгъэм исыхьатхэр, мафэхэр, тхьамафэхэр ащызэ­хащэх. Мы зигъо Iофыгъоу къэуцурэмкIэ чанэу Iоф ашIэ тирес­публикэ ит тхылъеджапIэхэми. Адыгэ республикэ кIэлэцIыкIу тхылъеджапIэм илъэс къэс игъэ­кIотыгъэу экологым и Мафэ ­щыхагъэунэфыкIы. КъяшIэкIыгъэ чIы­опсым ишъэфхэм нахь апэ­благъэ зашIэу, тхылъ къэгъэлъэгъонхэр, зэхэгущыIэгъухэр, кIэлэ­егъэджэ-шIэныгъэлэжьхэр, нэ­­мыкI гъэсагъэхэр зыхэлэжьэрэ Iоф­тхьабзэхэр ащырагъэкIокIых. Ахэр къыткIэхъухьэрэ кIэлэ, пшъэшъэ цIыкIухэр чIыопсым фэсакъхэу, къэкIырэ лъэпкъхэр ашIэхэу, къэ­бзэныгъэр а зэкIэм алъапсэу зэ­рэщытыр ашъхьэ раубытэным, ыкIи цIыфыр ежь-ежьырэу ышъхьэ емыгоожьыным ехьылIагъэх. Мы мафэхэм экологием фэгъэхьыгъэ тхылъ къэгъэлъэгъон зэфэшъхьаф­хэр «Жить в согласии с природой», «Чисто там — где не ссорят», «Как честь — береги окружающую среду» ныбжь зэфэшъхьафхэм арыт еджакIохэм апае къыщызэIуахыгъэх. Джащ фэд экологическэ сыхьатэу «Люби и знай свой край», клубэу «Гостиная Лесного Гнома». ЧIыопсым икъэ­бзэныгъэ — цIыфым ипсауныгъэу зэрэщытыр кIагъэтхъэу, еджакIохэм ащыщхэу усэхэр зикIасэхэр тыкъэзыуцухьэрэ дунаим идэхагъэ къызщыIогъэ усэ дахэхэм езбырэу къяджагъэх.
Къэбзэныгъэр — хэтрэ цIыфкIи ыкIи тыкъэзыуцухьэрэ дуна­имкIэ анахь шъхьаI, ащ тызэкъотэу тыдэлэжьэн ыкIи ищыкIагъэмэ, ты­фэбэнэн фае, джащыгъум тыкIэгушIужьыщт.
Мамырыкъо Нуриет.
Сурэтхэр: Адыгэ республикэ кIэлэцIыкIу тхылъеджапIэр.