Кавказ биосфернэ заповедникым мышъэхэм ялъытэн щаублагъ. Мы илъэсымкIэ ащ ичIыналъэкIэ ар апэрэ шIэныгъэ Iофтхьабз ыкIи кIэлъытыкIыжьыным хэлажьэхэрэм тхьамафэр заповедникым имэзхэм ащагъэкIощт.

Зэрэхабзэу, мышъэхэм япчъа­гъэ игъэунэфын гъэмафэрэ рекIокIы, сыда пIомэ а уахътэм псэушъхьэхэм гъэхъунэхэм закъыратэкъу. Арышъ, лъы­тэ­гъошIу.
Мышъэхэм якIэлъытыкIы­жьынкIэ заповедникым ичIы­налъэ Iахь 21-у зэтыраутыгъ. Ары пэпчъ зы куп фэгъэнэфагъ. Псэушъхьэ пчъагъэм игъэу­нэфын шIэныгъэлэжьхэр, инспекторхэр ыкIи волонтерхэр хэлажьэх.
Кавказ заповедникым ипресс-­къулыкъу къызэритырэмкIэ, аужырэ илъэсхэм КъохьэпIэ Кавказым имышъэ къарэхэм якъызэтегъэнэнкIэ чIыопс ухъу­мапIэм мэхьанэшхо иIэ хъугъэ. Ащ къыпыщылъ чIыгухэр мышъэхэр ащыпсэунхэмкIэ къе­кIужьырэп, арышъ, заповедни­кыр пстэуми шъхьаегъэзыпIэ афэхъу.
БлэкIыгъэ кIэлъытыкIыжьынхэм язэфэхьысыжьхэм къы­зэрагъэлъэгъуагъэмкIэ, чIыопс ухъумапIэм имэзхэм мышъэ 300 — 350-р ахэс, загъорэ япчъагъэ 470-м нэсы. Ахэмы­хъомэ, ахэмыкIэу шIэныгъэлэжьхэм алъытэ.
КъохьэпIэ кавказым имышъэ къарэ инэп. ГурытымкIэ килограмми 120-рэ къещэчы, 270-рэ зихьылъагъэхэр къазыхафэрэр зэгъо дэд. Нэшэнэ шъхьаIэу иIэр — ышхырэм ипроцент 80-р къэкIыхэрэр ары.
Кавказ биосфернэ
заповедникыр