Адыгеим и ЛIышъ­хьэу КъумпIыл Мурат къэралыгъо фон­дэу «Хэгъэгум иухъумакIохэр» зыфиIорэм ишъо­лъыр къутамэ ты­гъуасэ щыIагъ.

Урысыем и Президентэу Владимир Путиным иунашъо тетэу илъэскIэ узэ­кIэIэбэжьмэ ар зэхащэгъагъ, хэушъ­хьафыкIыгъэ дзэ операцием хэла­жьэ­хэрэмрэ ахэм яунагъохэм арысхэмрэ IэпыIэгъу ятыгъэным фытегъэпсыхьагъэу щыт.
Фондыр зызэхащагъэр илъэс зэрэ­хъугъэм фэгъэхьыгъэ зэIукIэу щыIа­гъэм Iофэу ашIагъэм икIэуххэр щызэфа­хьысыжьыгъэх. Iэшэ зэпэуцужьынхэм яветеранхэм, хэушъхьафыкIыгъэ дзэ операцием хэлажьэхэрэм, хэкIодэгъэ зэолI­хэм яунагъохэм арысхэр ягъусэхэу ахэм къыхагъэщыгъэр къэралыгъо фондэу «Хэгъэгум иухъумакIохэм» икъутамэ иIофшIэн тапэкIи нахь дэгъоу зэригъэцэкIэщтымкIэ пшъэрылъхэр гъэнэфэ­гъэнхэ зэрэфаер ары.
ЗэдэгущыIэгъум хэлэжьагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м Iоф­шIэнымрэ социальнэ хэхъоныгъэмрэкIэ иминистрэу Мырзэ Джанбэч, фондым ишъолъыр къутамэ ипащэу ПIатIэкъо Аслъан, общественнэ организациехэм ялIыкIохэр, хэушъхьафыкIыгъэ дзэ опе­рацием хэлажьэхэрэм, ахэм яунагъохэм арысхэм ащыщхэр.
КъумпIыл Мурат къыхигъэщыгъ рес­публикэм икъутамэ чанэу Iоф зэришIэ-­рэр ыкIи къэралыгъо фондым къыгъэуцугъэ пшъэрылъхэу хэгъэгум и Президент иунашъо зигугъу къыщишIыгъэ-
хэр гъэцэкIагъэ хъунхэм пае яIофшIэн джы­ри нахь агъэлъэшын зэрэфаер.
Республикэм и ЛIышъхьэ анаIэ зыты­раригъэдзагъэхэм ащыщ хэушъхьафыкIыгъэ дзэ операцием хэлажьэхэрэм IэпыIэгъу ятыгъэным мэхьанэшхо зэриIэр ыкIи ащ екIолIэкIэ тэрэз фыряIэн зэрэфаер. ЗэдэгущыIэгъум илъэхъан фондым иIофшIэн тапэкIи зэрэзэхэ­щэгъэщтыр, анахь Iофыгъо шъхьаIэхэу анаIэ зытырагъэтын фаеу щытхэр къыхагъэщыгъэх.
«Фондым зигугъу къышIырэ пчъагъэ­хэм, Iофэу агъэцэкIагъэм цIыфыбэмэ ящыIэныгъэ къырыкIуагъэмрэ къыры­кIощтымрэ япхыгъэх. ЦIыфхэм яфэныкъоныгъэхэм анаIэ лъэшэу атырагъэтын, цIыфыгъэ шэпхъэ дахэхэм арыгъозэнхэ фае. Урысыем и Президентэу Владимир Путиным пшъэрылъ къызэрафи­шIыгъэм тетэу «Хэгъэгум иухъумакIохэр» зыфиIорэр зэхащэгъагъ. ХэушъхьафыкIыгъэ дзэ операцием хэлажьэрэ ыкIи ащ иветеран пэпчъ социальнэ лъэныкъомкIэ ищыкIагъэхэр, ахэм яуна­гъохэм, джащ фэдэу хэкIодагъэхэм ягупсэхэм IэпыIэгъу ятыгъэным, икъоу анаIэ атырагъэтыным мэхьанэшхо яI. Ар тэ ти­пшъэрылъ, тичIыпIэгъухэм, тиухъумакIо­хэм псэемыблэжьныгъэу зэрахьэрэм къыкIэкIуагъ ащ фэдэ фыщытыкIэр», — къыхигъэщыгъ КъумпIыл Мурат.
Ветеранхэм ыкIи ахэм къапэблэгъэ цIыфхэм ягумэкIхэм, яIофыгъохэм ренэу зэрищыкIагъэм тетэу Адыгеим щыIэ къутамэм ынаIэ атырегъэты, ыпа­шъхьэ ит пшъэрылъхэр, социальнэ, медицинэ, юридическэ Iофыгъохэу

къэу­цухэрэр зэшIуехых, зыщищыкIагъэу хъурэм психологическэ IэпыIэгъуи реты.
Адыгэ Республикэм и ЛIышъхьэ пшъэ­рылъ зэрафишIыгъэм тетэу Мыекъуапэ игупчэ унэ хъоо-пщау къащыфыха­гъэкIыгъ, ар игъэкIотыгъэу агъэцэкIэ­жьыгъ ыкIи къутамэм иIофшIэн тэрэзэу ыгъэцэкIэнымкIэ ищыкIэгъэ амалхэр зэкIэ рагъэгъотыгъэх. Техникэ амалхэу реабилитациемкIэ къызфагъэфедэщтхэр зэрагъотылIэщтхэ пункт къызэIуахыгъ, сэкъатныгъэ зиIэ хъугъэ зэолIхэм зэралъыплъэщтхэм фэгъэсэгъэнхэмкIэ Iофтхьабзэхэр зэшIуахых, ны-тыхэм якIэлэцIыкIухэр ягъусэхэ зыхъукIэ, уахътэр зыщагъэкIощт кIэлэцIыкIу джэгупIэхэр, тхылъеджапIэхэр ащ хэтых. Муниципалитетхэм ащыпсэурэ унагъо пэпчъ социальнэ координатор къыфэ­гъэзагъэу щыт. Республикэм иведомствэ ыкIи иорганизациябэхэр, МФЦ-р, IофшIэн ягъэгъотыгъэнымкIэ Гупчэр, социальнэ фондыр, медико-социальнэ экспертизэмкIэ бюрор ыкIи нэмыкIхэр а Iоф­тхьабзэхэм къахэлажьэх. Хэгъэгум иухъу­макIохэм IэпыIэгъу ятыгъэнымкIэ IофшIэнэу агъэцакIэрэм лъэплъэ, ахэм якIэуххэр зэфехьысыжьых къутамэу зигугъу къэтшIыгъэм.
Къэралыгъо фондым ишъолъыр къутамэ ипащэу ПIатIэкъо Аслъан къызэриIуагъэмкIэ, ахэм Iоф ашIэ зыхъугъэм къыщыублагъэу нэбгырэ 2000 ехъумэ закъыфагъэзагъ, Iофыгъо 4300-м ехъу-
мэ ахэплъагъэх, ахэм япроцент 85-р зэшIуахыгъах. IэпыIэгъоу аратырэр лъэ­ныкъо зэфэшъхьафхэм япхыгъэу щыт — «Зэо зэпэуцужьынхэм яветеран» зыфиIорэ статусым икъэгъэшъыпкъэжьын къыщыублагъэу гъэпсэфыпIэ-IэзэпIэ чIыпIэхэм агъэкIонхэм епхыгъэ тхылъхэм ягъэхьазырын нэсыжьэу. Мы фондым хэушъхьафыкIыгъэ дзэ операцием иветеранхэр общественнэ проектхэм чанэу ахегъэлажьэх. Ахэр зыфэгъэхьыгъэхэр тицIыфхэр яхэгъэгу шIу алъэгъоу пIу­гъэнхэр, тарихъ шIэжьыр къэухъумэ­гъэныр, Урысыем хабзэ щыхъугъэ гушъхьэлэжь баиныгъэхэр ыкIи цIыфыгъэ шэпхъэ дахэхэр гъэпытэгъэнхэр ары. Яхэгъэгу шIу алъэгъоу, ащ фэ­шъыпкъэхэу пIугъэнхэм пае мэхьанэ­шхо зиIэ хагъэунэфыкIырэ мафэхэм япхыгъэ Iофтхьабзэхэр ренэу зэхащэх. А IофшIэным фэгъэхьыгъэу зэIукIэгъум хэлажьэхэрэм ащыщхэу Iэшэ зэпэуцужьыныгъэхэм яветеранхэу Илья Донцовым, Александр Юнниковым, Эдуард Бараевым къаIотагъ. ХэушъхьафыкIыгъэ дзэ операцием хэкIодагъэм янэу ыкIи фондым икоординаторэу Ирина Ми­роненкэм, дзэ операцием хэлэжьагъэ­хэм, Урысыем и ЛIыхъужъ хъугъэхэм яшъхьэгъусэхэу Елена Тороховам, Еле­на Бронниковам ыкIи Татьяна Колотий къаIуагъ республикэм ипащэхэм IэпыIэгъоу къаратырэм пае зэрафэра­зэхэр. Нафэу зэрэщытымкIэ, Татьяна Колотий ишъхьэгъусэ хэушъхьафыкIыгъэ дзэ операцием хэкIодагъ.
«ЛIыхъужъхэм тарэгушхо, тичIыпIэ­гъухэу зипшъэрылъ зэрифэшъуашэу зыгъэцакIэхэрэм тарэгушхо. ТизэолIхэмрэ тиветеранхэмрэ щысэшIух ныбжьыкIэхэм япIункIэ, яхэгъэгу фэшъыпкъэхэу, цIыфыгъэ шэпхъэ дахэхэм арыгъуазэхэу ахэр щытынхэмкIэ. Нэбгырэ пэпчъ ты­гукIэ инэу тызэрэфэразэр къэтэIо», — къыхигъэщыгъ КъумпIыл Мурат.
ХэушъхьафыкIыгъэ дзэ операцием хэкIодагъэхэм яшIэжь мыкIосэным пае IофшIэнэу агъэцакIэрэм мэхьанэу иIэр Адыгеим и ЛIышъхьэ къыхигъэщыгъ, джащ фэдэу Хэгъэгум иухъумакIохэу хэушъхьафыкIыгъэ дзэ операцием хэлэжьагъэхэм ямыжъосын гъэуцугъэным иIофыгъо Iоф дэшIэгъэнымкIэ пшъэрылъ гъэнэфагъэхэр зэрафишIыгъэхэр къыIуагъ. КъумпIыл Мурат къызэрэхигъэщыгъэмкIэ, хэбзэ къулыкъухэр ренэу дзэ частьхэм, тичIыпIэгъухэм къулы­къур зыщахьырэ чIыпIэхэм зэпхыныгъэ адыряI, IэпыIэгъу тедзэ ренэу ахэм араты. ХэушъхьафыкIыгъэ дзэ опера­цием хэлажьэхэрэм зэтыгъо ахъщэ Iэ­пыIэгъоу аIэкIахьэрэр республикэм фэдэ пчъагъэкIэ нахьыбэ щашIыгъ. Ащ нэмыкIэу муниципалитетхэми зэтыгъо ахъщэ IэпыIэгъу ахэм аIэкIагъахьэ. Дзэ къулыкъушIэхэм яунагъохэм мылъку, юридическэ IэпыIэгъу араты, IофшIапIэхэм аIухьанхэмкIэ яшIуагъэ арагъэкIы, ящыIэкIэ-псэукIэ нахьышIу шIыгъэным епхыгъэ Iофтхьабзэхэр зэшIуахых, гущыIэм пае, социальнэ газификациемкIэ ягумэкIыгъохэр зэшIуахых. Дзэ операцием хэлажьэхэрэм якIэлэцIыкIухэми IэпыIэгъу афэхъух, шIушIэным епхыгъэ Iофтхьабзэхэр зэхащэх. Чанэу къадеIэх общественнэ ыкIи политическэ организациехэр: партиеу «Единэ Россием» ишъолъыр къутамэ, шIушIэ фондэу «Народный фронт. Все для Победы» зыфиIорэр, Урысые народнэ фронтыр.
ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм IэпыIэгъоу аратырэр тапэкIи нахь дэгъоу зэхэщэгъэнымкIэ зэшIохыгъэн фэе пшъэрылъхэр АР-м и ЛIышъхьэ къыгъэнэфагъэх. Ащ пае хэгъэгум и Президент федеральнэ проектхэмрэ программэхэмрэ къадыхилъытэгъэ амалыкIэхэр агъэфедэщтых. Джащ фэдэу къэралыгъо фондым, общест-
веннэ организациехэм, Адыгэ Респуб­ликэм ис бзылъфыгъэхэм я Союз, хэгъэгум идзэкIолIхэм яунагъохэм я Комитет ишъолъыр къутамэ ыкIи нэмыкIхэм гъу­сэныгъэ адыряI.
«Анахь мэхьанэ зиIэр дзэкIолIхэмрэ ахэм яунагъохэм арысхэмрэ ящыкIэгъэ IэпыIэгъур икъоу ятыгъэныр ары. Хэу­шъхьафыкIыгъэ дзэ операцием хэла­жьэщтыгъэ кIалэхэу къэзгъэзэжьыгъэхэр ма­мыр щыIакIэм, общественнэ ыкIи патриотическэ IофшIэным амал зэриIэкIэ нахь псынкIэу ахэщэгъэнхэ, ренэу тиветеранхэмрэ ахэм яунагъохэмрэ тафэгумэкIын, тынаIэ атетын фае. Владимир Путиным къызэриIуагъэм фэдэу, «заом тыIутым фэдэу Iоф тшIэн фае», зэкIэхэми тихэгъэгу нахь зэрэпытэщтым, текIоныгъэр къызэрэдэтхыщтым тызы­шъхьамысыжьэу тыдэлэжьэн фае. Ветеранхэм, дзэкIолIхэм яунагъохэм псау­ныгъэ пытэ, щыIэкIэшIу яIэнэу, тикIалэхэм ТекIоныгъэр къыдахыгъэу ядэжь псынкIэу къагъэзэжьынэу сафэлъаIо», — къыхигъэщыгъ КъумпIыл Мурат.
ЗэIукIэгъум икIэухым къэралыгъо фондэу «Хэгъэгум иухъумакIохэр» зыфиIорэм икъутамэ иIофышIэ анахь дэгъухэм ыкIи общественнэ движениехэм ялIыкIохэу анахь чанэу зыкъэзыгъэлъэгъуагъэхэм шIухьафтынхэр афагъэшъошагъэх.
АР-м и ЛIышъхьэ
ипресс-къулыкъу