Илъэс 70-м сыкъехъугъэми, сыд фэдэрэ унэгъо Iоф сиIэми, силъэпкъ гъэзетэу «Адыгэ макъэр» къысIэкIэхьэфэ сыдэгуIэу сежэ ыкIи сигуапэу седжэ. Седжэрэ къодыеп, ащ бэмэ сарегъэгупшысэ, Iофыгъо зэфэшъхьафэу къыIэтырэмэ сынаIэ атырысегъадзэ.

Сыкъызщыхъугъэр къуаджэу Нэшъукъуай, ау Мые­къуапэ сыщэпсэу. КIыкI лIакъом сыкъыхэкIыгъ, сицIыкIугъом къыщегъэжьагъэу «Адыгэ макъэр» (ащыгъум «Социалистическэ Адыгей» ыцIагъэр) тиунэ къихьэщтыгъ. Непэ згъэшIагъоу сызэгупшысэжьырэр сабыибэ зэрыс унэгъо Iужъоу тыщытыгъэ нахь мышIэми, тянэ гъэзетым зэрежэщтыгъэр, еджэнэу уахътэ къызэрэхигъэкIыщтыгъэр ары.
ЗэкIэ гъэзетым щылажьэхэрэм Iофышхо агъэцакIэ, япшъэрылъ ины. Iофыгъо горэ къэпIэтынышъ, икъоу ар къызэхэпфыныр, цIыфхэм алъыбгъэIэсыныр псынкIагъоп. ЕтIани тхьамафэм гъогогъуитфэ ар къызэрэдэкIырэр къызыдэплъытэкIэ.
Сэ анахьэу сыгукIэ сызыфэщагъэу сызаджэхэрэр лъэпкъ культурэмрэ бзэмрэ афэгъэхьыгъэ тхыгъэхэр ары. КIыкI лIакъоу сыкъызхэкIыгъэм щыщхэу адыгэ лъэпкъым идахэ языгъэIуагъэр макIэп. Ахэм яапэрэ сатырхэм ахэтых орэдыIо цIэрыIоу КIыкI Зулхьаджэ, композиторэу КIыкI Хьисэ, артист бэлахьэу КIыкI Юрэ. Ахэр лъэшэу ясэнэхьат фэшъыпкъагъэх. Зул­хьаджэ сэ сятэшыпхъу. ЩытхъуцIабэ къыфагъэшъошагъ. Ау ежь анахьэу ыгъэлъапIэщтыгъэхэм ащыщ «РСФСР-м изаслуженнэ артистк» зыфиIоу къыфаусыгъагъэр.
Адыгэ къэралыгъо институтым иректорщтыгъэу А. ЯкIыкъом Иркутскэ къырищыжьи, а лъэхъаным музыкальнэ факультетыкIэу институтым къыщызэIуахыгъагъэм идеканэу КIыкI Хьисэ ыгъэнэфэгъагъ. А IэнэтIэшхоу Iофтхьэбзабэ къыдэзылъытэщтыгъэр дэгъоу ыгъэцакIэзэ илъэсыбэрэ ащ Iоф ышIагъ.
Джащ фэдэу КIыкI Юри артист цIэрыIоу щытыгъ. Бэдэд ащ театрэм ролэу къыщишIыгъэр. Драматургэу Шъхьаплъэкъо Хьисэ ытхыгъэ пьесэу «Даут» зыфиIорэм (Советскэ Союзым и ЛIыхъужъэу Нэхэе Даутэ фэгъэхьыгъагъ) роль шъхьаIэр Юрэ къызыщешIым, ЛIыхъужъым янэу Щэрифэ спектаклэ ужым рэзэныгъэ гущыIэхэр къыриIогъагъэх: «Непэ сикIалэ сынэгу къызэрэкIэбгъэуцожьыгъэм пае инэу сыпфэраз. БэгъашIэ охъу».
Мы зыцIэ къесIуагъэхэм анэмыкIэу Нэшъукъуае бэдэд цIэрыIоу къыдэкIыгъэр.
Тинахьыжъ лъапIэхэу щымыIэжьхэм ягугъу дахэкIэ ренэу зэрэшъушIырэм, къыткIэхъухьэхэрэм ахэр ащымыгъупшэнхэм шъунаIэ зэрэтежъугъэтырэм апае инэу сышъуфэраз. Тхыгъэу тилъэпкъ гъэзет къихьэрэ пэпчъ шъуишIэныгъи, шъукIуачIи хэлъ. Тызэрэгушхорэ ти «Адыгэ макъэ» джыри нахь зэтегъэпсыхьагъэ, нахь дэгъу хъунэу, шъори шъуиамалхэм заушъомбгъунэу сышъуфэлъаIо.
Шэуджэн Рэбихьат.