КIэлэцIыкIухэм апае фестиваль
Лъэныкъо зэфэшъхьафхэмкIэ кIэлэцIыкIу творчествэм ия 5-рэ фестиваль Адыгэкъалэ щыкIуагъ. Унагъом и Илъэс къыдыхэлъытагъэу Iофтхьабзэр кIуагъэ. АР-м культурэмкIэ и Министерствэрэ Лъэпкъ культурэмкIэ республикэ Гупчэмрэ ащ кIэщакIо фэхъугъэх. АР-м культурэмкIэ и Министерствэ ыцIэкIэ къеблэгъагъэхэм шIуфэс сэлам къарихыгъ министрэм игуадзэу Кушъу Светланэ.
— Республикэм икультурнэ щыIэныгъэкIэ фестивалыр анахь Iофтхьэбзэ шъхьаIэмэ ащыщ хъугъэ. Илъэс къэс ащ хэлэжьэрэ кIэлэцIыкIухэм яIэпэIэсэныгъэ хэхъо, зеушгъомбгъу. Ар зихьатырыр зыгъасэхэу зыгъэхьазырхэрэр ары. Мыщ фэдэу дахэу Iофтхьабзэр зэрэзэхэщагъэмкIэ рэзэныгъэ гущыIэхэр афэзгъазэ сшIоигъу Адыгэкъалэ культурэмкIэ игъэIорышIапIэ, — къыIуагъ Кушъу Светланэ.
АР-м культурэмкIэ и Министерствэ ирэзэныгъэ тхылъ Адыгэкъалэ культурэмкIэ игъэIорышIапIэ ипащэу НапцIэкъо Марет фагъэшъошагъ.
ПстэумкIи фестивалым нэбгыришъэм нахьыбэ хэлэжьагъ. Ахэр республикэм ирайонхэм къарыкIыгъэ творческэ купых, къэшъуакIох ыкIи орэдыIох. Къэгъэлъэгъоныбэ ахэм къагъэхьазырыгъ. Ары Iофтхьабзэр гъэшIэгъон къэзышIыгъэри. ЕплъыгъэхэмкIэ ар зы жьы къэщэгъоу кIуагъэ. Ахэм яIэгушъо тео макъэ зэпымыоу къэгъэлъэгъонхэр кIуагъэх. Фестивалым хэлэжьагъэхэм зэкIэм ар къэзыушыхьатырэ тхылъхэмрэ шIухьафтынхэмрэ зэхэщакIохэм ацIэкIэ аратыгъэх.
Iофтхьабзэм къыдыхэлъытагъэу АР-м культурэмкIэ и Министерствэ ыгъэуцугъэ стипендиеу «Юные дарования» зыфиIорэр зыфагъэнэфэгъэ ныбжьыкIэхэм ацIэхэр къраIуагъэх ыкIи сертификатхэр аратыжьыгъэх. Ахэр: УФ-м лъэпкъ творчествэмкIэ икупэу, лъэпкъ орэдхэмкIэ ансамблэу «Кубаночка» зыфиIорэм иорэдыIоу Шахсане Акматалиевар (Мыекъопэ район), лъэпкъ творчествэм изаслуженнэ къэшъокIо купэу, адыгэ къашъохэмкIэ ансамблэу «Мыекъуапэ инэфылъхэм» хэтэу ПэкIэшхо Дамир (къ. Мыекъуапэ), кIэлэцIыкIу театральнэ купэу «Радуга» зыфиIорэр къэзыгъэлъэгъорэ Тутэ Анастасие (Шэуджэн район), кIэлэцIыкIухэм апае театрэу «Комсит» иартист ныбжьыкIэу Битэ Ясминэ (Кощхьэблэ район), орэдыIо-эстраднэ студиеу «Радуга» зыфиIорэм хэтэу Татьяна Тарохинар (къ. Мыекъуапэ), орэдыIо купэу «Капелька» илIыкIоу Василиса Чичиневар (Джэджэ район), адыгэ къашъохэмкIэ ансамблэу «Къафэ» икъэшъуакIоу Тхьаркъохъо Рустам (Тэхъутэмыкъое район).
Устэкъо Маргарит.