Сабыигъор орэнасыпышIу!
Адыгэ республикэ кIэлэцIыкIу тхылъеджапIэр, хабзэ зэрэхъугъэу, зэпыуи зэпычи имыIэу, Iэтахъохэм ыкIи кIэлэцIыкIухэм япIуныгъэ-гъэсэныгъэ хэгъэхъогъэным, къыткIэхъухьэрэ лIэужыкIэр акъыл-Iушыгъэ хэлъэу пIугъэным ишъыпкъэу дэлажьэ.
ТхылъеджапIэм ипащэу Елена Демьянковам зэрилъытэрэмкIэ, цIыфыкIэм ипIун мафэ къэс Iоф дэпшIэн фае. Мары Адыгеим икIэлэцIыкIухэм ягъэмэфэ зыгъэпсэфыгъо уахътэ рагъэжьагъ ыкIи ащ ишъыпкъэу хэлэжьэщт республикэ кIэлэцIыкIу тхылъеджапIэр. Ямэфэ IофшIэн план еджэкIо цIыкIухэр нахьыбэу мэфэкIхэм ахэгъэлэжьэгъэнхэр къыделъытэ, гущыIэкIэ тэрэзым фэгъэсэгъэнхэр, тхылъым фэщагъэхэу ыкIи еджэхэу пIугъэнхэр, Iэдэб ахэлъэу егъэсэгъэнхэр ыкIи къяшIэкIыгъэ чIыопсым фэсакъхэу, ащ икъэбзэныгъэ сыдигъуи къэухъумэгъэныр.
Республикэ кIэлэцIыкIу тхылъеджапIэм иIофышIэхэм кIэлэцIыкIухэм якъэухъумэн и Дунэе мафэ фэгъэхьыгъэ Iофтхьабзэхэм язэхэщэнкIэ шъошэ зэфэшъхьафхэр агъэфедэх: литературнэ зекIохэр, IупкIэ къеджэнхэр, тхылъым тегущыIэгъэныр, зэдэгущыIэгъухэр, темэ гъэнэфагъэхэмкIэ зэхахьэхэр ыкIи зэнэкъокъухэр. Мыхэр зэкIэ шIэныгъакIэхэр аIэкIэлъхьэгъэнхэм, еджэныр якIасэу еджакIохэр пIугъэнхэм, заджэхэрэр къагурыIоу ыкIи яхэгъэгу итарихъ блэкIыгъэ ягъэшIэгъэным фэшIушIэх.
КIэлэцIыкIухэм якъэухъумэн и Дунэе мафэ имэхьанэ кIагъэтхъэу Адыгэ республикэ кIэлэцIыкIу тхылъеджапIэм Iутхэм мэфэкI Iофтхьабзэу «Детство – лучшая планета» зыфиIорэр рагъэкIокIыгъ, зытегъэпсыхьагъэр а 1 – 4-рэ классхэм арысхэр арых.
Библиодесантэу, къэгъэлъэгъонэу «Сабыигъор чIыналъэм щэзекIо» зыфиIорэр кIэлэеджэкIо Iэтахъохэм ателъытэгъагъ. Сабыигъом илъэпIэгъэ-дэхагъэ къыраIотыкIэу, мы уахътэр, хэти зыдимышIэжьэу ныбжьырэу ыгу къызэринэрэр къэгъэлъэгъонхэм ащыкIэгъэтхъыгъагъ.
ТхылъеджапIэм иотдел пэпчъ пIоми хъунэу мэфэкI Iофтхьабзэхэр ащызэхэщагъэх: мамыр щыIакIэр къызэрагурыIорэр сурэтхэмкIэ еджакIохэм къагъэлъэгъуагъ, джащ фэдэу джэгукIэ-викторинэу «Мир всем детям на планете» зыфиIоу адыгэ литературэмкIэ отделым, «Поем о мире!» зыфиIоу нотнэ музыкэ литературэмкIэ отделым ащыкIуагъэхэм мэфэкIыр къагъэбаигъ. Ахэм зэкIэми гупшысэшхо ахэлъыгъ ыкIи ахэпхыщтыгъ.
Дзэукъожь Нуриет.