Мы блэкIыгъэ шэмбэтым кIэлэцIыкIу­хэм якъэухъумэн и Дунэе мафэ ихэгъэу­нэфыкIын Адыгеири хэлэжьагъ. Респуб­ликэм имуниципалитетхэм зэкIэмэ мэфэкI Iофтхьабзэхэр ащызэхащагъэх. Адыгеим щыпсэурэ кIэлэцIыкIумэ АР-м и ЛIышъхьэу КъумпIыл Мурат къафэгушIуагъ.

— Урысыем щыпсэурэ лIэужыбэхэмкIэ мы мафэр илъэсым къыхэфэрэ анахь мэфэ гушIуагъоу гум къинэжьыхэрэм ащыщ. ЕджапIэхэм гъэмэфэ зыгъэпсэфыгъор зыщырагъажьэрэм мыр тефэ, ащ кIэлэеджакIохэр лъэшэу ежэх, зызэрагъэпсэфыщтым, жьы къабзэм зэрэхэтыщтхэм, зекIо, хым зэрэкIощтхэм дэгуIэх, ягупсэмэ уахътэр гъэшIэгъонэу зэрадагъэкIощтым е ялэгъухэм ягъусэхэу кIэлэцIыкIу лагерьхэм зэращыIэщтхэм егупшысэх. Зыныбжь икъугъэхэмкIи мы мафэр сабыйхэмкIэ пшъэдэкIыжь зэрахьырэр агу къэзгъэкIыжьэу щыт. Мы мафэм Адыгеим щы­псэухэу къыткIэхъухьэрэ лIэужхэр зыпIухэрэм, акIуачIэ хэзылъхьэ­хэрэм рэзэныгъэ гущыIэхэр апэз­гъохы сшIоигъу. Тхьаегъэ­псэух ны-тыхэр, нэжъ-Iужъхэр, кIэлэегъаджэхэр, анахьэу къы­хэзгъэщынхэу сыфай кIалэхэр зыштагъэхэу зыпIухэрэр, ны-тымэ ягуфэбагъэ алъызгъэIэсыхэрэр. ЗэкIэми псауныгъэ пытэ шъуиIэнхэу, шъуигухэлъхэр къыжъудэхъунхэу, Адыгеим ыкIи тихэгъэгушхоу Урысыем ищытхъу бэрэ ряжъугъэIонхэу сышъуфэлъаIо, — къыхигъэщыгъ респуб­ликэм ипащэ.
МыекъуапэкIэ мэфэкIым игуп­чэ зыдэщыIагъэр къэлэ паркымрэ культурэм и Унэу «Гигантымрэ» адэжь. Ащ хьэкIэ цIыкIумэ апае Урысыем ошIэ-­дэмышIэ IофхэмкIэ и Минис­терствэ икъутамэу Адыгеим щыIэм имэшIогъэкIосэ къулыкъу итехникэ къыщигъэлъэгъуагъ, джащ фэдэу викторинэхэмрэ мастер-классхэмрэ щырагъэ­кIокIыгъэх. МашIор щынэгъончъэу щытыным шапхъэу пылъхэр, псыIыгъыпIэхэм уазэрэфэсакъын фаер ыкIи нэмыкIхэр кIэлэцIыкIумэ къафаIотагъ. Джащ фэдэу къулыкъушIэхэм къагъэлъэгъуагъ машIор зэрагъэкIосэрэ пкъыгъохэр, ахэр зэрагъэфедэрэ шIыкIэхэр.
Адыгеим икъэралыгъо авто­инспекцие мэфэкIым чанэу хэлэжьагъ. КIэлэцIыкIухэр къулыкъушIэ машинэхэм арагъэтIыс­хьагъэх, джэгукIэ шIыкIэкIэ гъогур щынэгъончъэным, ащ тэрэ-
зэу щызекIонхэм сабыйхэр фагъэсагъэх. Самокатхэр ыкIи кушъхьэфачъэхэр агъэфедэхэ хъумэ гъогурыкIоным шапхъэу пылъхэр къафаIотагъ. Сабыйхэм шIухьафтынхэр аратыгъэх.
НэмыкI муниципалитетми кIэ­лэцIыкIухэм якъэухъумэн и Ду-
нэе мафэ дэгъоу ащыхагъэунэфыкIыгъ, мультфильмэхэр къафагъэлъэгъуагъэх, фестиваль-
хэр, джэгунхэр ащыкIуагъэх.