Урысыем и Мафэрэ кушъхьэфачъэм и Дунэе мафэрэ яхъулIэу къалэу Мыекъуапэ кушъхьэфачъэкIэ къыщызэпэчъагъэх. Километрэ 18 хъурэ гъогууанэр республикэм икъэлэ шъхьаIэ игупчэ урамхэм апхырыкIыгъ.

МэфэкI Iофтхьабзэм нэбгырэ мини 3-м ехъу хэлэжьагъ. Адыгеим и ЛIышъхьэу КъумпIыл Мурат ахэм ахэтыгъ.
Джащ фэдэу Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, АР-м физическэ культурэмрэ спортымрэкIэ и Комитет итхьаматэу Дэгужъые Мурат, Мыекъуапэ имэрэу Геннадий Митрофановыр, республикэ хэбзэ къулыкъухэм ялIыкIохэр, муниципалитетхэм япащэхэр, кIэлэцIыкIу спорт еджапIэхэм ятренерхэмрэ агъасэхэрэмрэ.
Республикэм и ЛIышъхьэ ку­шъхьэфэчъэ спортыр зикIасэхэм шIуфэс къарихыгъ, агу рихьынэу, гъэхъагъэ хэлъэу Iофтхьабзэм хэлэжьэнхэу афэлъэIуагъ. КъумпIыл Мурат къызэрэхигъэщыгъэмкIэ, мыщ фэдэ спорт Iофтхьабзэхэм яшIуагъэкIэ зипсауныгъэ зыгъэпытэ зышIоигъохэм, физкультурэм пыщагъэхэм къахэхъо зэпыт.
Урамхэу Пионерскэмрэ Лермонтовым ыцIэ зыхьырэмрэ зыщызэуалIэхэрэм дэжь (Зэкъошныгъэм ипчэгу пэчIынатIэу) къызэпачъэр щырагъэжьагъ. Пчэдыжьым сыхьатыр 8-м ехъулIэу спорт Iоф­тхьабзэм хэлэжьэщтхэр атхыгъэх, сыхьатыр 10-м ар рагъэжьагъ.
Iофтхьабзэм хэлажьэрэ пэпчъ гъогууанэу къыкIущтымрэ круг пчъагъэмрэ къыхихынхэу фитыныгъэ иIагъ. Кушъхьэфачъэхэр зызэщыкъохэкIэ ахэр зыщагъэцэкIэжьыщтхэ, псы зыщешъощт- хэ чIыпIэхэр агъэнэфэгъагъэх.
Iофтхьабзэм изэхэщакIохэм кIэлэцIыкIухэр зыщышхэнхэ, зыщыджэгунхэ алъэкIыщт чIыпIэхэр зэтырагъэпсыхьэгъагъэх. Джащ фэдэу творческэ куп зэфэшъхьаф­хэми Iофтхьабзэм еплъыхэрэм концерт къафатыгъ.
Урысые политическэ партиеу «Единэ Россием» и Адыгэ респуб­ликэ къутамэ кIэщакIо зыфэхъугъэ Iофтхьабзэр заухым, анахь ныбжьыкIэм – Дарья Щетинко (илъэсрэ мэзэ 11-рэ ыныбжь), анахьыжъ дэдэм – Анатолий Зуевым (илъэс 78-рэ ыныбжь) шIухьафтынхэр аратыгъэх. Сергеевхэм яунагъо анахь спортивнэ унагъоу, Татьяна Бахметьевар зытесыгъэ кушъхьэфачъэр анахь гъэшIэгъонэу, Даниил Панчикиным ишъуашэ анахь дахэу алъытагъ. Къалэм ифитнес-клубхэм къагъэхьазырыгъэ шIухьафтынхэр пхъэдз радзагъэх.
«Адыгеим ис цIыфхэу физкультурэмрэ спортымрэ ахэщагъэхэр нахьыбэ хъунхэм тэркIэ мэхьанэшхо иI. Мы аужырэ илъэсхэм Iоф­тхьабзэу етхьыжьэхэрэм ныбжь зэфэшъхьафхэр зиIэхэр зэрахэлажьэхэрэр тинэрылъэгъу. ЦIыфыбэ ащ фэдэ къызэпачъэхэм яжэ, ахэм зафагъэхьазыры. ЗырызхэмкIэ ар унэгъо хабзэ мэхъу», — къыIуагъ КъумпIыл Мурат къэ­бар жъугъэм иамалхэм яIофы­шIэхэм зэдэгущыIэгъу задешIым.
Джащ фэдэу Адыгеим и ЛIышъхьэ зэрэхигъэунэфыкIыгъэмкIэ, цIыфхэр жъугъэу зыхэлэжьэрэ спортымрэ физкультурэ движениемрэ язегъэушъомбгъун респуб­ликэм лъэшэу тапэкIи анаIэ щытырагъэтыщт. Адыгеим ипащэ Iофтхьабзэм хэлэжьэгъэ пстэуми къяджагъ цIыфхэм щыIэкIэ-псэукIэ тэрэз яIэным тегъэпсыхьэгъэ проектхэм нахь чанэу къахэлэ­жьэнхэу, япсауныгъэ фэсакъынхэу.