Гъэмафэм иапэрэ мазэу мэкъуогъур къихьагъ. ИжъыкIэ къыщегъэжьагъэу мыр шIулъэгъум, унэгъо насыпым, джэныкъом иухъумакIо итхьэу алъытэ. МэфэпчъымкIэ мэкъуогъум и 1-м гъэмафэр къехьэ, ау астрономием ылъэныкъокIэ мафэмрэ чэщымрэ якIыхьагъэ зэфэдиз зыщыхъурэ мэ­къуогъум и 22-р ары гъэма­фэр къихьагъэу залъытэрэр.

ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм ипащэу Александр Митровым тызэрэщигъэгъозагъэмкIэ, илъэс зэкIэлъыкIохэм уплъэкIунэу ашIыгъэ­хэмкIэ мэкъуогъур «шIухьафтынхэмкIэ» баигъэ. Мы аужырэ илъэс 60-м гъэмафэм иапэрэ мазэ нахь фабэу къызщыхэкIыгъэр 2018-р ары, фабэу градус 39-рэ агъэунэфыгъагъ. Илъэс къэс мэкъуогъум фабэу щыIэр градус 30-м къехъу.
Статистикэм къызэригъэнафэрэмкIэ, мэкъуогъур шынэгъакIэу щыт. ГущыIэм пае, 1987-рэ илъэсым мы мазэм ощхэу къещхыгъэр миллиметрэ 285-рэ хъугъэ, шапхъэу щыIэхэм а пчъагъэр фэди 3-кIэ нахьыбагъ.
Мэкъуогъум фабэр Темыр Африкэм ыкIи Средиземноморьем къа­рыкIыщт. ГурытымкIэ температурэу щыIэщтыр шапхъэм макIэу шIокIыщт, ощхэу къещхыщтым ибагъэ шапхъэхэм анахь мэкIэщт. Мазэм къыкIоцI ощх ыкIи ошъу къехыщт. Чэщым фабэу градус 13 — 18 щыIэщт. Аужырэ ящэнэрэ мэфипшIым фабэр градус 20-м нэсыщт. Мэкъуогъум иапэрэ мэфитфым фабэу градус 22 — 27-рэ щыIэщт. КъыхэкIыщтых мафэхэр фабэр градус 34-м кIахьэу.
Мэкъумэщ культурэхэм якъэгъэ­кIынкIэ мэкъуогъум гумэкIыгъо къыз­дихьыщтэп. Псыхъохэм адэт псыр шапхъэу щыIэхэм ашIокIыщтэп. Ау лъэшэу къызещхырэм, псыр къыдэкIоен ылъэкIыщт.
КIАРЭ Фатим.