Теннис цIыкIумкIэ Лэбапэ щыкIогъэ район первенствэм тиспортсменхэм гъэхъэгъэшIухэр щашIыгъэх.

Мыекъопэ спорт еджапIэу С.М. Джэнчатэм ыцIэ зыхьырэм зыщызыгъэсэрэ нэбгыри 9 турнирым хэлэжьагъэх.
ЗэхэщакIохэм къызэраIуагъэмкIэ, Краснодар краим ыкIи Мыекъуапэ яспортсмен 60-м ехъумэ заушэтыгъ, текIоныгъэм фэбэнагъэх. Аныбжь елъытыгъэу пшъашъэ­хэри кIалэхэри купищэу гощыгъагъэх. Мыекъуапэ щыщ илъэсий зыныбжь Эльдар Матюшиным текIоныгъэр къыдихыгъ. Илъэ­сибл зыныбжь Бзаго Даринэ джэрз медаль къыфагъэшъошагъ. Ахэм тIэкIу анахьыжъхэу Адам Матюшинымрэ Артем Вариводинымрэ ящэнэрэ чIыпIэхэр къахьыгъэх. Джащ фэдэу республикэр къэзыгъэлъэгъуа­гъэхэм ащыщэу нэбгыриплIыр хагъэунэфыкIырэ чIыпIэхэр къыдахынхэм пэблэгъагъэх, ау яплIэнэрэ хъугъэх.