Адыгэ Республикэм и Общественнэ палатэ республикэм ибзылъфыгъэхэм я Союз иIэпыIэгъоу «Непэрэ урысые обществэм ныбжьыкIэ унагъоу хэтхэр зэуалIэрэ къиныгъохэр» ыцIэу пленарнэ зэхэсыгъо зэхищэгъагъ.

Бзылъфыгъэхэм ясоюзхэу Къыблэ федеральнэ шъолъырым щызэхэщагъэхэм, къэралыгъо къулыкъу зэфэшъхьафхэм, общественнэ организациехэм ялIы­кIохэр ащ хэлэжьагъэх.
Зэхэсыгъор къызэIуихыгъ ыкIи зэрищагъ АР-м и Об­щественнэ палатэ итхьаматэу Устэкъо Руслъан. АР-м и Къэралыгъо Совет — Хасэм социальнэ политикэмкIэ, унагъом иIофхэмкIэ, псауныгъэм икъэу­хъумэнкIэ ыкIи культурэмкIэ икомитет итхьаматэу Наталья Широковар зэхэсыгъом хэлэ­жьагъ.
Бзылъфыгъэхэм я Союз ирес­публикэ къутамэ хагъэлажьэзэ мыщ фэдэ зэхэсыгъо апэрэу зэрэзэхащэрэр, организацием чанэу Iоф зэришIэрэм ар зэрепхыгъэр Устэкъо Руслъан къы­Iуагъ. Общественнэ организациехэм ямызакъоу, къэралыгъо хэбзэ къулыкъухэми унагъом игъэпытэн, ащ IэпыIэгъу фэхъу­гъэныр япшъэрылъ шъхьаIэу зэрэщытыр къыкIигъэтхъыгъ. Лъэныкъо зэфэшъхьафхэр Iэпы­Iэгъу зэфэхъухэзэ унэгъо шэн-­хабзэхэр укъуагъэ мыхъун­хэм, ныбжьыкIэхэм унагъо ашIэным кIэгъэгушIугъэнхэм аIэ зэкIэдза­гъэу дэлэжьэнхэ зэрэфаер па­латэм итхьаматэ къыIуагъ.
УФ-м ибзылъфыгъэхэм я Союз ишъолъыр къутамэ илIыкIохэр онлайн зэпхыныгъэкIэ зэхэсыгъом къыхэлэжьэнхэу амал яIагъ. Урысыем ибзылъфыгъэхэм я Союз итхьаматэу Екатерина Лаховар Iофтхьабзэм къыщыгущыIагъ.
— УФ-м и Президент 2024-р унагъом и Илъэсэу ыгъэнэфагъ. Ащ елъытыгъэу къэралыгъом
ис цIыф пчъагъэм хэгъэхъогъэныр ыкIи ахэр къэухъумэгъэнхэр пшъэрылъ шъхьаIэу къэуцу. Аужырэр тикъэ­ралыгъо джыдэдэм къэзыухъумэрэ кIа­лэ­хэм апшъэ дэкIы. Владимир Путиным къызэри­IуагъэмкIэ, Урысыем тапэкIэ къы­рыкIощтыр унэгъо шэн-ха­бзэу тыухъумэхэрэм бэкIэ япхыгъ. Бзылъ­фыгъэхэр граждан обществэм ча­нэу хэтых. Темыр Осетием щашIыгъэ ушэтынхэмкIэ, пшъэшъэ ныбжьыкIэу зэуп­чIыгъэхэм янахьыбэм гъэсэ­ныгъэ агъотыныр, IофшIапIэм щылъыкIо­тэнхэр, IэнатIэхэм анэсынхэр уна­гъо ашIэным ыпэ рагъэшъы. ЕтIани, унагъо зашIэ­кIэ сабый зытIу ныIэп яIэнэу агъэнафэрэр. Ащ фэдэу лъыкIотэщтмэ цIыф пчъагъэм ихэгъэхъонкIэ Пре­зидентым къыгъэуцурэ пшъэ­рылъыр дгъэцэкIэн тлъэкIыщтэп, — къы­зэфихьысыжьыгъ Екатерина Ла­ховам.
Апшъэрэ еджапIэхэм ачIэсхэу къэзэрэщэрэ ныбжьыкIэхэм, предприятие инхэм аIутхэу унагъо зышIэрэ IофшIакIохэу сабыибэ зиIэхэм IэпыIэгъу зэ­рящыкIагъэр, ахэм гъунэ алъы­фыгъэн зэрэфаер бзылъфы­гъэ­хэм я Союз итхьаматэ къы­I­уагъ. Унагъом иIофыгъохэмкIэ къэралыгъо хэбзэ къулыкъухэм общественнэ организациехэр ренэу адэлэжьэнхэ фаеу къыкIигъэтхъыгъ. Адыгеим ибзылъфыгъэхэм я Союз а лъэны­къом­кIэ Iофыгъуабэ зэрэзэшIуихырэр, щысэ зытырахырэ проект­хэр яIофшIэн къазэрэхэкIырэр Екатерина Лаховам къыIуагъ. Илъэс 83-рэ зыныбжь Союзыр уахътэм зэрэдэбакъорэр, технологиякIэмэ адиштэу иIофшIэн зэригъэпсырэр къыкIигъэтхъыгъ.
— Мэхьанэшхо иI къэбар жъугъэм иамалхэм уигугъу ашIыным, социальнэ хъытыухэм уахэтыным. Ахэр къыдэмылъытэ зыхъукIэ ущымыIэкIэ лъытэ. Ащ пае студентхэр къызэтэщалIэх. УФ-м и Правительствэ иIэпыIэгъукIэ портал къызэIутхыгъэу, ар илъэсищ хъугъэу мэлажьэ. Союзым иIофшIэн фэгъэхьыгъэ къэбар игъэкIотыгъэхэр мазэм гъогогъуипшIырэ къитэгъахьэх. «Женский вопрос», «Сделано в России» зыфиIорэ къэтын зэкIэлъыкIохэр хъытыум къыщэтэгъэлъагъох. ЫпкIэ зыхэмылъ вебинархэр мазэм тIо зэхэтэщэх, — къыхигъэщыгъ Е. Лаховам.
Урысыем ибзылъфыгъэхэм я Союз IофшIэнэу зэшIуихырэр пстэуми ашIогъэшIэгъон.
Зэхахьэр зыщыкIуагъэр АР-м и Лъэпкъ музей зэрэхэтыр, адыгэ лъэпкъымкIэ хьакIэщым мэхьанэу иIагъэр, унагъом ишэн-хэбзэ анахь пытэу джы нэс ар зэрэщытыр, цIыфыр зэрэрагъэблагъэщтыгъэм имызакъоу, хьакIэщым нахьыжъхэр зэрэщызэрэугъоищтыгъэхэр, унэшъошI чIыпIэу унагъом ылъа­псэу зэрэщытыгъэр ыкIи къызэрэнэжьырэр Устэкъо Руслъан онлайн шIыкIэм тетэу нэмыкI шъолъырхэм ялIыкIохэу зэха­хьэм хэлэжьагъэхэм къафи­Iотагъ.
АР-м ибзылъфыгъэхэм я Союз итхьаматэу Вэрэкъо Хьалимэт нэужым гущыIэр ратыгъ. 2024-р унагъом и Илъэсэу зэрагъэнэфагъэм къыхэкIэу унагъом, ащ илъ шэн-хабзэхэм якъэухъумэнкIэ республикэм Iофтхьэбзэ гъэнэфагъэхэр зэрэщызэшIуахырэр ащ хигъэунэфыкIыгъ. Хабзэм икъэралыгъо къулыкъухэм аготхэу общественнэ организациехэми къатефэрэр зэкIэ агъэцакIэ. Вэрэкъо Хьалимэт къызэриIуагъэмкIэ, унагъом игумэкIыгъохэр, зэри­хьылIэрэ къиныгъохэр Iэшъхьэтетхэм анагъэсы.
— Унагъом ис нэбгырэ пчъа­гъэр псауныгъэу цIыфхэм яIэм занкIэу епхыгъ. Ащ къыхэкIэу спорт Iофтхьабзэхэм язэхэщэни тыхэлажьэ, — къыIотагъ Вэрэ­къо Хьалимэт. — Егъэджэн зэ­фэшъхьафхэр, психологическэ IэпыIэгъухэр, тренингхэр, культурэ Iофтхьабзэхэр республикэм ирайон зэфэшъхьафхэм ащыретэгъэкIокIых. Унэгъо ныб­жьыкIэхэр зэолIэрэ къиныгъо­хэм ащыщых зыщыпсэунхэ зи­мыIэхэр къызэрэхэкIыхэрэр, IофшIэпIэ чIыпIэхэр зэрамыгъо­тырэр. Пшъэрылъ шъхьаIэу ти­организацие непэ зыфигъэуцу­жьырэр шэн-хабзэхэм якъэу­хъумэн, унэгъо ныбжьыкIэхэм ахэр алъыгъэIэсыгъэныр ары. Унэгъо пытэр — къэралыгъом ылъапс. Ащ елъытыгъэу зэгуры­Iоныгъэр яунагъохэм арылъэу ныбжьыкIэхэр пIугъэнхэ фае. Пшъашъэу къэхъухэрэр аныбжь зикъукIэ ны зэрэхъущтхэм фэбгъэсэнхэ, язэхашIэ къэгъэущыгъэн фае. Унагъом икъэухъумэн фэгъэхьыгъэу къэралыгъом къы­гъэуцурэ пшъэрылъхэм, шъо­лъырхэм ащагъэцакIэрэ программэхэм ягъэцэкIэн общест­веннэ организациехэри чанэу дэлажьэх. Мы IофшIэныр тапэкIи лъыдгъэкIотэщт.
Екатерина Лаховам къызэрэхигъэхъожьыгъэмкIэ, Iоныгъом иапэрэ мафэ щыублагъэу «семьеведение» зыфиIорэ десэхэр гурыт еджапIэм игъэсэныгъэ программэ хагъэуцощт. Унэгъо шэн-хабзэхэм якъэухъумэн ащ щызэрагъэшIэщт.

Бзылъфыгъэхэм ясоюзхэм яшъолъыр къутамэхэм ялIыкIо­хэр джащ фэдэу зэхэсыгъом иIофшIэн онлайн шIыкIэм тетэу хэлэжьагъэх, яшIошIхэр къыра­Iо­тыкIыгъэх.
АР-м иобщественнэ палатэ хэтхэр зэхэсыгъом хэлэжьагъэ­хэм зядэIухэ нэужым хабзэм икъэралыгъо къулыкъухэм, му­ниципальнэ образованиехэм япащэхэм, общественнэ организациехэм анаIэ зытырагъэтын фаеу къыхагъэщыгъэ лъэны­къохэм атегущыIагъэх, зэдаштагъэх. Ахэм ащыщхэр: респуб­ликэм щыпсэурэ унагъохэм псэупIэ яIэмэ, кIэлэцIыкIу IыгъыпIэхэм ясабыйхэр аратын-
хэ алъэкIымэ, медицинэ ыкIи социальнэ IэпыIэгъу агъотымэ гъэ къэс гъэунэфыгъэныр, унэгъо ныбжьыкIэхэм IэпыIэгъоу арагъэкIырэм хэгъэхъогъэныр, ны-ты ныбжьыкIэхэм IофшIэпIэ чIыпIэхэр агъотынымкIэ адеIэгъэныр, республикэм щыпсэурэ цIыфхэм япсауныгъэ къыщымыкIэным анаIэ тырагъэтыныр, унагъом, лIакъом яшэн-хабзэхэм якъэухъумэнкIэ, сабыйхэм япIун­кIэ, ны-ты зэрэхъущтхэмкIэ япшъэдэкIыжьхэр ныбжьыкIэхэм агурызгъэIощт программэхэм, проектхэм мылъкукIэ IэпыIэгъу афэхъугъэныр, нэмыкIхэри.
Унагъом икъэухъумэн фэIоры­шIэщт Iофтхьэбзэ пстэуми нахь гъэлъэшыгъэу анаIэ тырагъэты­нэу къэбар жъугъэм иамалхэм пшъэрылъэу къафалъэгъугъ.
Тэу Замир.