ХэушъхьафыкIыгъэ дзэ операцием зидзэ пшъэрылъхэр щызгъэцакIэзэ хэкIодэгъэ дзэкIолIхэм къафагъэшъошэгъэ къэралыгъо тын лъапIэхэр яIахьыл гупсэхэм тыгъуасэ аратыжьыгъэх.

Iофтхьабзэм хэлэжьагъэх Мыекъопэ къэлэ администрацием ипащэ игуадзэу, ветеранхэм я къэлэ Совет итхьаматэу Юрий Томчак, Мыекъуапэ идзэ комиссарэу Алексей Санташовыр, зыпсэ зы­гъэтIылъыгъэхэм яIахьылхэр.

Iофтхьабзэм ипэублэ шIуфэс гущыIэ­хэмкIэ къекIолIагъэхэм закъыфигъэзагъ къалэм идзэ комиссар.
— Зидзэ пшъэрылъхэр зыгъэцакIэхэзэ хэушъхьафыкIыгъэ дзэ операцием хэкIодагъэхэм къалэ­жьыгъэ тын лъапIэхэр яIа­хьылхэм яттыжьынхэу тызэхэхьагъ. Хэгъэгум ипатриотхэу къэралыгъор къэзыухъумэнэу къоуцуагъэхэм щытхъур адэжь. ТизэолIхэм лIыхъужъныгъэу зэрахьагъэр хэткIи щысэтехыпI, Хэгъэгур къэзыухъумэзэ зыпсэ зыгъэтIылъыгъэхэм ацIэ егъа­шIи тщыгъупшэщтэп, тхьа­шъуегъэпсэу ятэIо, шъхьащэ афэтэшIы, — хигъэунэфыкIыгъ Алексей Санташовым.
Урысые Федерацием и Президентэу Владимир Путиным иунашъокIэ лIы­хъужъныгъэу ыкIи псэемыблэжьыныгъэу къахэфагъэхэм афэшI щымыIэжьхэ рядовоеу Константин Захарьевым ЛIы­хъужъныгъэм иорден ыкIи я II-рэ шъуашэ зиIэ медалэу «За храбрость» зыфиIорэр, лейтенантэу Антон Мухиным ЛIыхъужъныгъэм иорден, гуфакIоу Роман Примак медалэу «За отвагу» ыкIи майорэу Валерий Фроловым медалэу «За боевые отличия» афагъэшъошагъ. А тын лъапIэхэр Юрий Томчак зыпсэ зыгъэтIылъы­гъэхэм яIахьылхэм аритыжьыгъэх.

— Мыекъуапэ имэрэу Геннадий Митрофановым, къэлэ ветеранхэм я Совет, зэкIэ къэлэдэсхэм, хэгъэгум ацIэкIэ тышъуфэтхьаусыхэ чIэнагъэу шъушIыгъэм­кIэ. Iофыгъо горэм шъуигъэгумэкIы зыхъукIэ муниципальнэ образованием, сэри, дзэ комиссариатми зафэжъугъэзэн шъулъэкIыщт. Зыпсэ емыблэжьхэу къэралыгъом инеущ фэбэнагъэхэм тафэраз. ТидзэкIолIхэм яшIэжь егъашIэм тыгухэм арылъыщт, — къыIуагъ Юрий Томчак.
Iэшъынэ Сусан.