Iахьзэхэлъ обществэу «Руфа-Тур» зыфиIорэм АР-м зекIонымкIэ ыкIи зыгъэпсэфыпIэхэмкIэ и Комитет иIэпыIэгъоу «Адыгэ хьалыжъом и Мафэ» мэкъуогъум и 15-м псыкъечъэхыпIэу «Рыфабгъо» щызэхащэщт.

Хабзэ зэрэхъугъэу, хьалыжъор зышIыщт бысымгуащэхэр республикэм ирайон зэфэшъхьафхэм къарыкIыщтых, лъэныкъо зэмылIэужыгъохэмкIэ зэнэкъокъу­щтых: «Нанэ ихьалыжъу», «МэфэкI хьалыжъу», «Бысымгуащэм ихьалыжъу», «Нысэ Iап», «Къэзгъэзэжьыгъэ хьалыжъу». Адыгэ шхыныгъо IэшIоу хьалыжъом ишIынкIэ осэшI купым къахигъэщыщт бысымгуащэхэм шIухьафтынхэр къяжэх.
МэфэкI программэм зэ­нэкъокъухэм анэмыкIэу, адыгэ къуаер зэрэрахырэ шIыкIэм, къэшъокIо ыкIи орэдыIо купхэм, лъэпкъ Iэпэщысэхэм якъэгъэлъэ­гъонхэр, кIэлэцIыкIухэм апае анимационнэ программэ къыдыхэлъытагъэх.
Зэнэкъокъум хэлажьэ зы­шIоигъохэр мэкъуогъум и 5-м нахь мыкIасэу зэхэщэкIо купым макъэ рагъэIун фае.