Университетым щагъэцакIэ
Мы илъэсым Мыекъопэ къэралыгъо технологическэ университетым акселерационнэ программэу «ИнноВектор» зыфиIорэр щагъэцакIэ, ар едзыгъуитIоу кIощт ыкIи шэкIогъу мазэм зэфашIыжьыщт.
Непэрэ мафэм ехъулIэу ащ хэлажьэ зышIоигъохэм лъэIу тхылъи 115-рэ къатыгъ, жъоныгъуакIэм и 31-м нэс ар кIощт. узэрыхьащтыр: https://pt.2035.university/accelerator/5I3.
ШIэныгъэр, инновациехэр, технологиехэр, предпринимательствэр зышIогъэшIэгъонхэм зэкIэми МКъТУ-м иакселератор гукъэкI зэфэшъхьафхэр къырагъотэнхэ алъэкIыщт. Ащ ыуж а гукъэкIхэр стартап-проект шапхъэм ралъхьажьышъущтых.
Программэм хэлэжьэнхэу рагъэблагъэх студентхэр, аспирантхэр, шIэныгъэлэжь ныбжьыкIэхэр, шIоигъоныгъэ зиIэ цIыф къызэрыкIохэр. Ахэм ыпкIэ атыщтэп. Гъэсэныгъэ трекым иакселератор хэлэжьэнхэ ыкIи нэIуасэ зыщыфашIын алъэкIыщт мыщ хахьэхэмэ: leader-id.ru/events/497979.
“ИнноВектор” зыфиIорэм къыдыхэлъытагъэу МКъТУ-м истудентмэ стартап-проекти 150-рэ зэхагъэуцуагъ, 8-р инновациехэм адэIэпыIэгъэнымкIэ фондым изэнэкъокъоу «Студенческэ стартап» зыцIэм щытекIуагъэх ыкIи сомэ миллион зырыз къахьыгъ, ябизнеси къызэIуахыгъ. Мы илъэсым джыри лъэIу тхылъи 8 атыгъ, зэфэхьысыжьхэм яжэх. Проектхэм ятематикэу къыхахыхэрэр бизнесым ыкIи обществэм ящыкIэгъэ лъэныкъохэм афэгъэхьыгъэх: непэрэ агротехнологиехэр, биотехнологиехэр, шхыныгъохэм яинновационнэ продуктхэр, IэрышI акъылыр, цифрэ шIыкIэм тет сервисхэр, инженер технологиехэр ыкIи нэмыкIхэр.
Ящэнэрэ илъэс хъугъэу Мыекъопэ къэралыгъо технологическэ университетыр программэу «ИнноВектор» зыфиIорэм хэлажьэзэ Урысыем илъэпкъ проектхэм ягъэцэкIэн дэгъоу Iоф адешIэ. А уахътэм къыкIоцI нэбгырэ 1500-м ехъу технологическэ предпринимательствэм феджагъэх, командэм щылэжьэшъунхэу загъэсагъ.
Мы IофшIэным апшъэрэ еджапIэм икIэлэегъаджэхэри хэлажьэх. Университетым Iут нэбгыри 100-м ехъумэ хэушъхьафыкIыгъэ егъэджэнхэр акIугъэх, студенческэ командэхэм гъэсакIохэу, трекерхэу, упчIэжьэгъухэу ыкIи экспертхэу афэхъугъэх. ШIэныгъэлэжь 40-мэ статусэу «Эксперт НТИ», «Трекер НТИ» зыфиIохэрэр къафагъэшъошагъэх. Технологическэ предпринимательствэр хэпхыжьын умылъэкIынэу университетым икультурэ щыщ шъыпкъэ хъугъэ.
МКъТУ-м ипресс-къулыкъу