Мэз парк шъолъырэу «Мэздахэ» изэтегъэпсыхьан джырэ уахътэм етIупщыгъэу макIо.

Нэгыежъ Iуашъхьэм щагъэпсы зэрэунагъоу жьыкъабзэ къащэзэ зызща­гъэпсэфышъущт чIыпIэр. Мы илъэсым ыкIэ нэс дэхьапIэр, лъэсрыкIо гъогур, экологическэ гъогужъыер ыкIи кушъхьэфачъэхэм атегъэпсыхьагъэр, къэбар­лъыгъэIэс стендхэр, хъаренэхэр, зыгъэ­псэфыпIэхэр, автомобиль уцупIэхэр мыщ щаухыщтых.

«ПсэупIэр ыкIи къэлэ щыIакIэр» зыфиIорэ лъэпкъ проектым Iэрыфэгъу къэлэ щыIакIэр гъэпсыгъэнымкIэ проект анахь дэгъум икъыхэхынкIэ Урысые зэнэкъокъум мы чIыпIэм текIоныгъэ къызэрэщыдихыгъэм мы зэпстэури къы­кIэкIуагъ.
Адыгеим и ЛIышъхьэ къыхигъэщыгъ гектар 435-у Мэздахэ зэлъиубытырэм щыщэу 2024-рэ илъэсым гектари 7,7-рэ зэтырагъэпсыхьанэу зэрэрахъухьэрэр. Экологием икъэухъумэн иIофыгъохэр къыдыхалъытэхэзэ IофшIэн пстэури рагъэкIокIы. Анахьэу мэзым фэсакъых чIыопс гъэпсыкIэм хэгъэщагъэу зы­гъэпсэфыпIэр ашIыным фэшI.

«Мэздахэр» бэшIагъэ Мыекъуапэ щыпсэухэрэм якIасэ хъугъэ чIыпIэхэм захэтыр. Ар зызэтедгъэпсыхьэкIэ ыкIи экологием ичIыпIэ Iэрыфэгъу зытшIыкIэ, къалэм ыкIи республикэм щыпсэухэрэм ямызакъоу нэмыкI шъолъыр- хэми къа­рыкIырэ хьакIэхэр къызэрэзэрищэлIэщтхэм сицыхьэ телъ!» — къыIуагъ КъумпIыл Мурат.