Джэджэ районым лъэпкъ культурэмкIэ игупчэу Нэгъой Нэфсэт ыцIэ зыхьырэм клубхэм яIофышIэхэм яфорумэу «ЗэIухыгъэ культурэр» зыфиIорэр щырекIокIыгъ.

«Культурэм иунэхэр — цIыфхэр зэзыщэлIэрэ гупч» зыфиIорэ республикэ пшъэрылъым игъэцэкIэн Iофтхьабзэр къыдыхэлъытагъ. Ащ изэхэщэн культурэмкIэ ыкIи искусствэмкIэ Советэу АР-м и ЛIышъхьэ дэжь щыIэм изэхэсыгъо щызэдаштэгъагъ. Культурэм иIофы­шIэхэм язэдэлэжьэныгъэ гъэпытэгъэныр, шIэныгъакIэхэр ягъэгъотыгъэнхэр, ащ фаблэхэрэр ыкIи республикэм икультурэ хахъо езыгъэшIы зышIоигъохэр къыхэгъэщыгъэнхэр форумымкIэ шъхьаIэ.
Район клубхэм яIофышIэхэмкIэ Iоф­тхьабзэр хъугъэ-шIэгъэ ин. Культурэм иунэхэр цIыфхэр зэзыщэлIэрэ гупчэ шIыгъэнхэмкIэ ахэм бэ ялъытыгъэр. Мы лъэныкъомкIэ Адыгеим щылэжьэрэ нэбгыри 100 фэдизыр форумым зэфищагъ. АР-м культурэмкIэ и Министерствэ ыцIэкIэ ахэм шIуфэс къарихыгъ отделым ипащэу Ацумыжъ Лианэ.
— АР-м и ЛIышъхьэ къытфигъэуцугъэ пшъэрылъэу «Культурэм иунэхэр — цIыфхэр зэзыщэлIэрэ гупч» зыфиIорэм къыдыхэлъытэгъэ апэрэ форумэу мыр щыт. Илъэсым ыкIэм нэс ащ тыдэлэ­жьэщт, нэужым зэфэхьысыжьхэр тшIыщтых. Сыда пIомэ, зы илъэскIэ упчIэхэр зэкIэ зэшIохыгъэ хъущтэп. Культурэм иунэхэр цIыфхэр зэзы­щэлIэрэ гупчэ шIыгъэнхэмкIэ непэ Джэджэ районыр республикэм щыпэрыт. Ащ ишыхьат непэрэ форумыр мыщ зэрэщырекIокIыгъэр. Мыщ фэдэ форумхэр илъэс къэс зэ­хатщэхэзэ тшIымэ ишIогъэшхо къэ­кIощт, — къы­Iуагъ ащ.
Форумыр къызызэIуахым ыуж ащ хэлэжьагъэхэм загощыгъ, сыда пIомэ ащ иIофшIэн лъэныкъо зэфэшъхьафхэмкIэ зэтеутыгъагъ. Ахэр: культурэм иунэ­хэм ятворческэ купхэм яIофшIэн, къэгъэлъэгъонхэм ягъэхьазырын, культурэм иунэхэм ащыкIощт Iофтхьабзэхэм ямэкъэгъэIухэр, хъытыу нэкIубгъохэм апае къэбархэр гъэхьазырыгъэнхэр, сурэтхэр, видео техыгъэхэр, ансамблэм хэтхэм къашъом илъэныкъо зэфэшъхьафхэм иамалхэр агъотынхэр, клубхэм къэгъэлъэгъонхэр къащытыгъэнымкIэ IофшIэныр зэрэзэхэпщэщтыр ыкIи волонтерхэм зэрадэлэжьэщт шIыкIэр. Форумым хэлэ­жьэгъэ нэбгырэ пэпчъ анахьэу зыгъэгумэкIырэ лъэныкъор къыхихыгъ. А уп­чIэм­кIэ шIэныгъэ ин зыIэкIэлъхэу Iоф­тхьабзэм къырагъэблэгъэгъэ хьакIэхэм ахэр зэращагъэх.
ГущыIэм пае, культурэм иунэхэм яэстраднэ купхэм яIофшIэн, къаIощтым икъыхэхын, къэгъэлъэгъонхэм ягъэуцункIэ УФ-м изаслуженнэ, АР-м инароднэ артисткэу Нэхэе Тэмарэ культурэм илIыкIохэм ишIэныгъэхэмкIэ къадэго­щагъ. Ащ иIофшIэн хэлэжьагъэхэм ащыщ къуаджэу ХьакIэмзые дэт клубым иIофышIэу УпчIэжьэкъо Альбинэ. Ащ къызэриIуагъэмкIэ, форумым къызэреблэгъагъэр хьаулыеп, иIофшIэнкIэ хэукъоныгъэхэр зыхилъэгъожьыгъэх.

— Сабыйхэм орэд къэIонымкIи къа­шъохэмкIи садэлажьэ. КъэшъонымкIэ упчIэ сиIэп, ау орэдым ылъэныкъокIэ сызыгъэгумэкIыхэрэр къы­хэфэх. ЕтIани, сезыгъэджэгъэ Тамара Рашидовнар ишIэныгъэхэмкIэ къыддэгощэщтэу программэм зы­хэсэлъагъом, семыгупшысэу ащ ыдэжь зыхэстхагъ ыкIи къы­сшъхьэ­пагъ. Бэмэ гу алъысымытэу, дэгъоу сшIэу къысщыхъущтыгъэм езгъэлыекIэу къычIэкIыгъ. Джы сихэукъоныгъэхэм Iоф адэсшIэни, нэмыкIэу сылэжьэщт, — къыд­дэгощагъ Альбинэ.
Джащ фэдэу непэрэ клубхэм яIоф­шIэнкIэ мэхьэнэ ин зиIэмэ ащыщ мэкъэгъэIухэм, хъытыу къэбархэм ягъэ­хьазырын, сурэтхэм, видеохэм ятехын. Ахэр тэрэзэу, дэгъоу сыдэущтэу бгъэфе­дэщтха? Сыдэущтэу бгъэхьазырыщтха ыкIи сыда къызщебгъэжьэщтыр? Мы упчIэхэм афэгъэхьыгъэ секциеми Iоф ашIагъ.
— Непэ жъи кIи телефоныр агъэ­федэ. Апэрэу къэбарыр ары зэралъагъорэр. Сыд фэдэ Iофтхьабзэ тиIэщтми, хьакIэ къытфэкIощтми хъытыум щытиIэ нэкIубгъохэм мэкъэгъэIухэр къа­рэтэгъахьэх. Арышъ, ахэр гъэшIэгъонхэу, лъэгъупхъэ­хэу тшIынхэ фае. Непэрэ форумыр ащкIэ IэпыIэгъу къытфэхъугъ, шIыкIа­кIэхэр зыфэдгъэнэфагъэх. Зэхэзыщагъэхэм «тхьэшъуе­гъэпсэу» ясIо сшIоигъу, — тыщигъэгъозагъ Красногвардейскэ районым икультурнэ-зыгъэпсэфыпIэ Гупчэ иIофышIэу Аббэсэ Даринэ.
Форумыр гъэшIэгъонэу рекIокIыгъ, ащ ятIонэрэ Iахь зэхэгущыIэжьыр къыдыхэ­лъытэгъагъ. Адыгеим итворческэ купхэм къатыгъэ къэгъэлъэгъоныр ащ кIэух дахэ фэхъугъ. Клубхэм яIофышIэхэм шIэныгъакIэхэр зэрагъэгъотыгъэ къодыеп, зэрэлъэгъунхэ ыкIи зэрэшIэнхэ амал яIагъ, зыкIыныгъэ къахилъхьагъ. Культурэм хахъо ышIынымкIэ ари мэхьэнэ ин зиIэ лъэныкъу.
Анцокъо Ирин.