Адыгэ республикэ кIэлэцIыкIу тхылъеджа­пIэм ипчъэшъхьаIу мафэ къэс пшъэшъэ
ыкIи шъэожъые пшIы пчъагъэ елъэбакъо. АхэмкIэ непэ мы чIыпIэр тхылъгъэтIылъыпIэ е гъэсэпIэ къодыеп, зэкIэ упчIабэу зыгъэгу­мэкIхэу зэлъызыIыгъхэм яджэуапхэр зычIа­гъотэщт унэшху.

Мафэ къэс мыщ кIэлэцIыкIу­хэр ыкIи Iэтахъохэр, студентхэр, егъэджакIохэр къеуалIэх. Мыщ документхэр, хэутыгъэ къыдэ­кIыгъохэр — гъэзет ыкIи журнал зэфэшъхьафхэр, электроннэ каталогэу мин 20-м нахьыбэ зытетыр щагъэфедэх.
— Мы зэкIэм япхыгъэу непэ­рэ еджэкIо цIыкIухэм тхылъыр ямыкIасэу, къырамыдзэу, IэкIыб ашIэу — Интернетым, компьютер джэгукIэхэм лъэшэу апыща­гъэ хъухэу зэраIорэм ежь тхылъеджапIэм иколлектив хэт­хэм ыкIи ащ ипащэу Елена Демьянковам мары къыраIуа­лIэрэр:
— Ащ фэдэ шIошI-еплъыкIэм дедгъаштэрэп. Мафэ къэс ти­тхылъеджапIэ кIэлэеджакIохэр, ны-тыхэр, кIэлэегъаджэхэр ыкIи зыныбжь икъугъэхэу, ау кIэлэцIыкIу литературэм дэлажьэ­хэ­рэр къытфэкIох. Хэти ежь нахь шIогъэшIэгъоным тетэу литературэр раты. Непэ кIэлэеджа­кIохэр хэти зэрэшIомышIэу бэ заджэхэрэр, «Гарри Поттер» закъоп, классическэ произведениехэри якIасэх.
— ЩыIэныгъэр зы чIыпIэ итэп, ащ фэд тхылъ­еджапIэхэри. Ащ елъытыгъэу мы аужырэ илъэс­хэм шъуиIофшIэн сыдэущтэу зэ­хъокIыгъа?

— ЫпэкIэ фэмыдэу тхылъ­еджапIэхэми пшъэрылъ гъэнэфагъэхэр яIэх ыкIи зэшIуахых; ежьхэри зэхъокIыгъэх, ашIэрэр ашIомакIэу бэ зыгъэгумэкIхэу къызкIэупчIэхэрэр. Непэ еджа­кIохэр тхылъым пэе закъоп къызкIакIохэрэр, предмет зэфэшъхьафхэмкIэ шIэныгъэхэр зэ­ра­гъэгъотых, къаратырэ тхын-­гъэ­хьазырынхэр, рефератхэр, докладхэр, лъэтегъэуцохэр ща­гъэхьазырых, а зэкIэ тхылъ­еджапIэм технологиякIэхэр
иIэ зэрэхъугъэм къагъэпсынкIэ, лъэ­шэу яшIуагъэ къэкIо, тэри тадеIэ. Яунэ зэрисхэуи зы­къытапхын алъэкIы, тхылъыкIэу къыдэкIыгъэхэм, Iофтхьабзэу зэхатщэхэрэм зафагъэнэIуасэ.
— ТхылъеджапIэр кIым-­сымыпI, ау мэфэкI Iофтхьабзэхэр щыIэ зы­хъукIэ, чэфыгъор чIиз мэхъу. Анахь якIасэхэр?
— Агу лъэшэу рехьых, якIасэх Iофтхьабзэхэу «Библионочь», «Ночь искусств», «Символы России», творческэ зэнэкъокъу зэфэшъхьафхэр. Ахэм ащыщ адыгабзэкIэ мы аужырэ илъэс­хэм редгъэкIокIырэ зэнэкъо­къоу «Сыбзэ — сидунай», нэмыкIхэри. ТхылъеджапIэм гъусэны­гъэ-зэпхыныгъэ тикъалэ иеджа­пIэ­хэм ямызакъоу, искусствэхэм­кIэ Адыгэ республикэ колледжэу У. Тхьабысымым ыцIэ зыхьырэм, творческэ гупчэхэм ­адыриI.
— Ахэр нахь чанэу къыз­хэлэжьэхэрэ Iофтхьа­бзэу зэхашъущэхэрэр ыкIи анахь ашIогъэшIэгъонэу заджэхэрэ тхылъхэр?
— ИкIыгъэ илъэсым титхылъеджапIэ мэфэкI Iофтхьэбзэ 400 фэдиз щыкIуагъ. Ахэм пшъэрылъ инэу лIэужыкIэм ипIун-лэжьын зэшIуахы. АшIэрэм хагъахъо, апIух кIэлэцIыкIухэр, зыкъарагъэгъоты. Мыхэм яхьатыркIэ тиныбжьыкIэхэр патриотхэу, Iэ­дэбныгъэ-шъыпкъагъэ ахэлъэу, дэхагъэр къагурыIоу ыкIи зэра­хьэу, ячIыпIалъэ агъэлъапIэу, ашIэу, экологие гъэсэныгъэ яIэу мэхъу. Кружок ыкIи клуб Iоф­шIэн иными мы зэкIэ зэшIуахы.
Iофтхьабзэ пэпчъ къигъэлъэ­гъукIэ амал гъэнэфагъэ фэтэшIы. ГущыIэм пае: «Библиосумерки» зыфиIорэм кIэлэеджа­кIохэм ямызакъоу, зэрэунагъоу хэлажьэ, ащ осэшIу фашIы.
— Непэрэ тхылъеджапIэр сыд фэда? Ыпэрэ­хэм зэратекIырэр?

— Ар пшысэ-унэм фэд, хэти зыфаер чIегъуатэ, къэбзэ-лъабз, нэфын, дахэу зэIухыгъ, умы­шIэ­рэр зэкIэ къыозыIуатэр. Анахь тхылъеджэ чанхэр тиIофышIэхэм дэгъоу ашIэх, ахэр бэ мэхъу­хэми. Дахэу апэгъокIых, яшIои­гъоныгъэ афагъэцакIэ. Ащ фэдэ унагъоу тиIэхэр: Верещагинхэр, КIыкIхэр, Мухинхэр, Ан­дыр­хъуаехэр, Бахмутовхэр, нэ­мыкIхэри.
— КIэлэеджакIохэр непэ анахь заджэхэрэ тхылъхэр?
— Ахэр ныбжьым елъыты­гъэу зэтефыгъэх: еджапIэм джыри мыкIохэрэм сурэтхэмкIэ гъэкIэ­рэкIагъэхэу псэушъхьэхэм яхьы­лIагъэхэр якIасэх. ГущыIэм пае: «Кот да Винчи. Школа злодейства», «Лучший день в году», «Победитель монстров» Олег Рой ытхыгъэхэу. Джащ фэд «Котенок Пират или Ловкий коготь», «Мия, или Сестра русалки», «Котенок Белла или Любопытный носик» Дейза Ме­доус иеу. Нахь инхэр заджэ­хэрэр Евгений Глаголевым, Михаил Самарскэм ыкIи На­талья Щерба ятхылъхэр ары. «Сэр Мартин. Возвращение ­
на Ро­дину» (М. Самарскэм ий), Н. Щерба ытхыгъэу «Кот Сократ выходит на работу».
«Чыр цIынэзэ ауфэ, кIалэр цIыкIузэ агъасэ» — еIо адыгэ гущыIэжъым. Ащ дыригъаштэу Адыгэ республикэ кIэлэцIыкIу тхылъеджапIэм иIофшIэн зэхещэ. Ары, загъорэ шъхьэм къехьэ тапэкIэ щыIакIэр зэрэлъыкIотэщтым епхыгъэ гупшысэхэр, ау джырэкIэ тхылъеджапIэхэр гъэ­сэпIэ ыкIи пIуныгъэ гупчэ иных, ахэр мыпшъыжьхэу цIыфыкIэм ипIун дэлажьэх. Джары ахэм уасэ зэряIэр къэзыушыхьатырэр. Тхылъыр шIэныгъэ къэкIопIэ ин ыкIи гущыIэгъу гъэшIэгъон, ар уфэсакъэу зэодзэкIы, уеджэ, узIэпещэ, къыIуатэрэр зэкIэ нэм кIэкIы.
Мафэ къэс республикэ кIэлэ­цIыкIу тхылъеджапIэм куп-купэу ыкIи зырызэу, анахь цIыкIу дэдэхэр аIапэ аIыгъэу ны-тыхэм къащэх. Аузэ тхылъыр зикIасэхэм япчъагъэ хэхъо.
Дзэукъожь Нуриет.
Сурэтхэр: Адыгэ республикэ кIэлэцIыкIу тхылъеджапIэр.