Къэралыгъо тын лъапIэу я II-рэ шъуашэ зиIэ медалэу «За храбрость» зыфиIорэр хэушъхьафыкIыгъэ дзэ операцием хэлэжьэрэ старшэ сержантэу Василий Барановым ратыжьыгъ.

Ащ фэгъэхьыгъэ Iофтхьабзэм хэлэжьагъэх къэлэ администрацием, дзэ комиссариатым иIофышIэхэр, дзэкъулыкъушIэ­хэр, зэолIым иIахьыл гупсэхэр.
Мыекъопэ къэлэ дзэ комиссариатым ипащэу Алексей Санташовым къызэриIуагъэмкIэ, хэушъхьафыкIыгъэ дзэ операцием хэлэжьэрэ тидзэкIолIхэм зэрифэшъуашэу япшъэрылъ лъапIэ агъэ­цакIэ, ящыIэныгъэ емыблэжьхэу неонацизмэм пэуцужьых.
— ДзэкIолI шъыпкъэхэм ащыщэу Василий Барановыр непэ тэ­гъашIо. Ащ лIыгъэ хэлъэу и Хэ­гъэгу къыухъумэныр къыхихыгъ. Псэемыблэжьыныгъэу, лIы­хъужъныгъэу зепхьэрэм афэшI Мыекъуа­пэ къыбрэгушхо. Къэралыгъом къыпфигъэцугъэ пшъэ­рылъыр зэрифэшъуашэу зэрэб­гъэцакIэрэм Президентэу Владимир Путиным осэшIу къыфишIыгъ. А тын лъапIэмкIэ тэри тыпфэгушIо, — къы­Iуагъ къэлэ дзэ комиссарым.
УФ-м и Президент иунашъокIэ зэ­олIым къыфагъэшъошэгъэ къэралыгъо тын лъапIэр Мыекъуапэ ипащэ игуа­дзэу Юрий Томчак къыритыжьыгъ.
— ХэушъхьафыкIыгъэ дзэ операциер джыри лъэкIуатэ. Ащ епхыгъэу зэзэгъы­ныгъэкIэ къулыкъу зыхьы зышIоигъохэр аугъоих. Ти Хэгъэгу инеущ ыгъэгумэкIырэ цIыфыбэ дзэ комиссариатхэм къяуалIэх, ащкIэ тафэраз. Хъулъфыгъэ ыкIи граждан нэшанэхэр зыушэтынэу шIо­игъоныгъэ зиIэ пстэуми а амалыр къыхахын алъэкIыщт. ЗищыIэныгъэ УIэшыгъэ КIуачIэхэм языпхы зышIоигъо­хэмкIэ непэрэ тын лъапIэу тидзэкIолI пэрыт къыфагъэшъошагъэр щысэтехыпIэу щыт. КъыткIэхъу­хьэрэ ныбжьыкIэхэм япатриотическэ пIуныгъэ епхыгъэ Iоф­шIэнхэм Василий уахътэ иIэ зыхъукIэ къахэдгъэлэжьэщт, — хигъэунэфы­кIыгъ Юрий Томчак.
Джащ фэдэу дзэкIолIым ыкIи ащ иуна­гъо зафагъазэзэ, социальнэ е нэмыкI Iофыгъо горэм ыгъэгумэкIыхэ зыхъукIэ къэлэ администрацием, дзэ комиссариатым ялъэIу рахьылIэн зэралъэкIыщтыр къыхагъэщыгъ.
Василий 1978-рэ илъэсым Тбилиси къыщыхъугъ, щеджагъ. 1993-м Адыгеим ит станицэу Ханскэм къэкIожьыгъ, ыныбжьыкIэ къытефэрэ дзэ къулыкъур артиллерийскэ дзэхэм ахэтэу илъэситIурэ ыхьыгъ. 2001-рэ илъэсым зэзэгъыныгъэкIэ къулыкъу ыхьынэу илъэсищ пIалъэм кIэтхагъ, ар зеухым ядэжь къэкIожьыгъ. Бэ темышIэу УФ-м хэ­гъэгу кIоцI IофхэмкIэ и Министерствэ зэзэгъыныгъэм дыкIатхи, хэушъхьафыкIыгъэ взводэу «ОМОН-м» хэхьагъ. 2016-рэ илъэсым пенсием зэкIом къахэкIы­жьыгъ.
ХэушъхьафыкIыгъэ дзэ операциер зырагъэжьэгъэ 2022-рэ илъэсым чъэпыогъум къыщегъэжьагъэу непэ къызнэ­сыгъэм Василий Барановыр ащ хэлажьэ. Ар ежь ишIоигъоныгъэкIэ дзэкъу­лыкъу­шIэхэм ясатырэ хэхьагъ. Дзэ IофымкIэ IэпэIэсэныгъэу IэкIэлъ хъугъэр джы къы­шъхьапэжьыгъ. ГуфэкIо отрядэу «БАРС» зыфиIорэм хэтэу Луганскэ ыкIи Донецкэ народнэ республикэхэм, Запорожскэ хэкум ащыпсэурэ мамыр цIыф­хэм ящыIэныгъэ къеухъумэ.
Мы уахътэм дзэкIолIым зегъэпсэфы, охътэ кIэкIым къыкIоцI ыгъэзэжьыщт. Тын лъапIэу къыфагъэшъошагъэр къыратыжьыным епхыгъэ Iофтхьабзэм ипшъашъэхэу Полинэрэ Маргаритэрэ игъусэхэу хэлэжьагъэх.
Ежь Василий Барановым къызэриIуа­гъэмкIэ, Хэгъэгур къэухъумэгъэныр ип­шъэрылъ шъхьаIэхэм ащыщ.
— ХэушъхьафыкIыгъэ дзэ операцием хэлэжьэрэ пстэуми афэдэу сэри ащ сыкIуагъэу сипшъэрылъ сэгъэцакIэ. Тын лъапIэу къысфагъэшъошагъэр зы хъугъэ-шIагъэп зэпхыгъэр, пчъагъэу зэхэт. Щэрыонхэм, машIом тахэтэу пыим ты­пэ­уцужьызэ къауIэгъэ тиныбджэгъу­хэр пчэгум къитымынэхэу IэпыIэгъу тазэрафэхъущтым тыпылъ. ЗэуапIэм Iутхэм зэкIэми лъэпкъ зэхэдз тимыIэу тызэкъо­шым фэдэу тыщызэ­къот. ДзэкIолI пэпчъ пшъэры­лъэу ыгъэцакIэрэм мэхьанэу иIэр зэхешIыкIы, къыткъот тигупсэхэм, ти Хэгъэгу ящынэгъончъагъэ къэтэухъумэ, — хигъэунэфыкIыгъ Василий Барановым.
ЗэолIым къыфагъэшъошэгъэ тын лъа­пIэм нэмыкIэу бгъэхэлъхьэ зэфэ­шъхьаф­хэри иIэх. Ау ащ нахь лъа­пIэу ылъытэрэр уасэ къызэрэфашIы­гъэр ары.

Iэшъынэ Сусан.