Адыгэ Республикэм и Къэралыгъо Совет – Хасэм ия 36-рэ зэхэсыгъо тыгъуасэ щыIагъ. Ащ хэлэжьагъэх министрэхэм я Кабинет хэтхэр, федеральнэ, шъолъыр къулыкъухэм ыкIи ведомcтвэхэм, муниципалитетхэм ялIыкIохэр.

Зэхэсыгъом Iофыгъо шъэныкъо фэдизмэ щатегущыIагъэх. Законопроекти 5-мэ затегущыIэхэм ахэм яхэплъэн фэхъугъэ кIэуххэм адиштэу республикэ хэбзэгъэуцугъэхэр аштагъэх. ДжырэкIэ кIуачIэ зиIэ шэпхъэ правовой актхэм афашIыжьыгъэ гъэтэрэзыжьынхэр зыфэгъэхьыгъэхэр кIэлэцIыкIухэм япсауныгъэ икъэухъумэн, цIыфхэр зычIэсыщт унэхэм яшIын зегъэушъомбгъугъэнымкIэ IэпыIэгъу ятыгъэным, кIэлэцIыкIухэм япсауныгъэ икъэухъумэнкIэ муниципальнэ къулыкъухэм ядепутатхэм яхэдзын, социальнэ-культурнэ ыкIи коммунальнэ мэхьанэ зиIэ псэуалъэхэмкIэ шапхъэхэм япхыгъэ Iофыгъохэр ары. Ащ нэмыкIэу инвестиционнэ проект инхэу чIыгу Iахьхэр бэджэндэу ятыгъэнхэм фэгъэхьыгъэхэм ахэплъагъэх. 2023-рэ илъэсымкIэ республикэм икъэралыгъо программэхэр гъэцэкIагъэ зэрэхъугъэхэм ыкIи шIуагъэу къатырэм афэгъэхьыгъэ къэбарым едэIугъэх. 2024-рэ илъэсым иапэрэ мэзищкIэ республикэ бюджетыр гъэцэкIагъэ зэрэхъугъэм, джащ фэдэу Адыгеим икъэралыгъо мылъку 2023 – 2024-рэ илъэсхэм приватизацие зэрашIыщтым иплан афэгъэхьыгъагъ министрэхэм я Кабинет иотчет.

Адыгэ Республикэм и Къэралыгъо Совет — Хасэм (Урысые Федерациер), депутатхэм я Могилевскэ хэку Совет (Республикэу Беларусь), Республикэу Башкортостан и Къэралыгъо ЗэIукIэ – Курултай парламент зэдэлэжьэныгъэу азыфагу илъым зегъэушъомбгъугъэнымкIэ унашъохэр аштагъэх.
Зэхэсыгъом икIэухым депутатхэр атегущыIагъэх УФ-м ишъолъырхэм яхэбзэихъухьэ къулыкъухэр кIэщакIо зыфэ­хъугъэ Iофыгъохэм.
КъыткIэхъухьэхэрэм яфитыныгъэхэр къэухъумэгъэнхэм, щыIэкIэ-псэукIэ тэрэз яIэным, кIэлэцIыкIухэр тутынымэм щыухъумэгъэнхэм, джащ фэдэу никотин зыхэлъ продукциер аIэкIэмыхьаным апае джырэкIэ кIуачIэ зиIэ федеральнэ хэбзэгъэуцугъэм тегъэпсыхьагъэу парламентариехэм аштагъ АР-м и Законэу «Адыгэ Республикэм изакон заулэмэ зэхъокIыныгъэхэр афэшIыгъэнхэм фэгъэхьыгъ» зыфиIорэр. Юридическэ лицэхэм е юридическэ лицэу щымытхэу предприниматель IофшIэныр зыгъэцэкIэрэ цIыфхэм къафэгъэзэгъэ псэуа­лъэхэу, унэхэу илъэс 18 мыхъугъэ кIэлэцIыкIухэр зыдакIохэ мыхъущтхэр агъэнэфагъэх. КIэлэцIыкIухэм япсауныгъэ, япсихикэ, цIыфыгъэ шэпхъэ дахэхэм арыгъозэнхэмкIэ пэрыохъу хъун зылъэ­кIыщт пкъыгъохэр, тутыныр, никотин зыхэлъ продукциер ыкIи нэмыкIхэр зыщащэхэрэ чIыпIэхэм нэфагъэ ахэлъхьэгъэн зэрэфаер ащ къыщеIо.
— Шъон пытэхэр зыщащэрэ чIыпIэхэу кIэлэцIыкIухэр зыдэщыIэ мыхъущтхэм ащыщ­хэр республикэм ихэбзэгъэу­цугъэ тапэкIэ къыщыдалъытэ­гъагъэх. Ахэр: пивэ зыщащэрэ ресторанхэр, санэхэр зыщагъэфедэрэ бархэр ыкIи нэмыкI чIыпIэхэр. Шапхъэхэр зымы­гъэцакIэхэрэм администра­тивнэ тазырхэр атыралъхьэщтыгъэх. Юридическэ лицэу щымытхэу предприниматель IофшIэныр зыгъэцакIэхэрэм сомэ мини 10, юридическэ лицэхэм – сомэ мин 30 арагъэтыщтыгъ. Джы зигугъу къашIыгъэ псэуалъэхэр зыгъэфедэхэрэми а тазыр дэдэхэр арагъэтыщтых, — къыхигъэщыгъ АР-м и Къэралыгъо Совет – Хасэм и Тхьаматэу Владимир Нарожнэм.