ГъэIорышIапIэу «Адыгеяавтодорым» къызэритыгъэмкIэ, лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм диштэу мы мафэхэм республикэм игъогушIхэм Кощхьэблэ районым игъогухэм ащыщхэр агъэцэкIэжьых. Зичэзыу псэуалъэр шъолъыр гъогоу «Мыекъуапэ – Джаджэ – Псыбай – Зеленчукская – Карачаевск» зыфиIорэм хэхьэ.

ПстэумкIи гъогухэу агъэкIэжьыщтхэм километри 3,5-рэ якIыхьэгъэщт. ПсэупIэу Дружбэм къыпэблэгъэ гъогуитIоу метрэ 800-рэ ыкIи метрэ 1200-рэ зикIыхьагъэ­хэр шапхъэхэм адиштэу зэтырагъэпсы­хьагъэх. Подряд организациеу «Кощхьэблэ ДРСУ-м» игъогушIхэр псэупIэу Казенно-Кужорскэм къыхиубытэрэ ящэнэрэ Iахьым игъэцэкIэжьын фежьагъэх. ПсэупIэм иурамэу Лениным ыцIэ зыхьырэр (километрэ 1,5-рэ хъурэр) ахэм агъэкIэжьыщт.
ГъэIорышIапIэу «Адыгеяавтодорым» къызэритыгъэмкIэ, зы муниципалитетым игъогухэу анахь лъэшэу зэщыкъуагъэхэр шапхъэхэм адиштэу зэтырагъэпсыхьажьыщтых. Сомэ миллиони 107,5-рэ зыте­фэщт IофшIэнхэм ягъэцэкIэнкIэ подряднэ организацием илъэси 5 пIалъэм телъы­тэгъэ зэзэгъыныгъэ дашIыгъ.
ПсэупIэу Казенно-Кужорскэм игъогу гъэцэкIэжьын IофшIэнэу рашIылIэщтхэм социальнэ мэхьанэшхо зэряIэр хэгъэ­унэфыкIыгъэн фае. Культурэм и Унэ, тучан заулэ, гурыт еджапIэу N 12-р Лениным иурам къеуалIэх. Жъоныгъуа­кIэм и 30-м гурыт еджапIэм гъэмэфэ кIэлэцIыкIу лагерь къыщызэIуахыщт. Федеральнэ шапхъэхэм адиштэу зэтегъэпсыхьэгъэщт, асфальт зытелъыщт гъогумкIэ ны-тыхэм якIэлэцIыкIухэр лагерым ращэлIэнхэ алъэкIыщт.
ГъогушIхэм асфальтэу тыралъхьащтыр тIоу зэтелъыщт, къехыпIэхэми ар арагъэкIущт, тамыгъэхэр зэблахъущтых, гъогухэр икIэрыкIэу агъэтхъыжьыщтых. Джащ фэдэу псэупIэм ичIыпIи 4-у общественнэ транспортыр къызыщыуцухэ­рэр шапхъэхэм адиштэу зэтырагъэпсы­хьащтых.